ސުނާމީގައި ގެއްލުން ލިބުނު މަކުނުދޫ ބަނދަރު އަލުން ހަދަނީ

.

ބަދުރުއްދީން ޙަސަން

އެއީ ރާއްޖޭގެ އެންމެ ހުޅަނގު ބިތުގައި އަތޮޅުގެ އެހެން ރަށްތަކާއި އެކަހެރިކޮށް ގުދުރަތީ  ގޮތުން މުއްސަނދި ފަޅެއް ލިބިފައިވާ ބޮޑު ރަށެކެވެ. ދެހާހާއި ގާތްކުރާ އާބާދީއެއް އޮންނަ ހދ މަކުނުދޫގައި، މައިގަނޑު ގޮތެއްގައި ގިނައީ މަސްވެރިކަން ކޮށްގެން އާމްދަނީ ހޯދާ މީހުންނެވެ. އެހެންކަމުން މަކުނުދޫގެ ބަނދަރަކީ އެމީހުންނަށް ވަރަށް މުހިއްމު ތަނެކެވެ. އޭގެ އިތުރުން މަތިއުތުރު ސަރަހައްދު ގައި މަހަށް ނުކުމެ އުޅޭ ދޯނި ފަހަރު ވެސް ވަރަށް ގިނައިން މަކުނުދޫގެ ބަނދަރު ބޭނުން ކުރެއެވެ.

2004 ވަނަ އަހަރު އެރި ސުނާމީގައި މަކުނުދޫގެ ބަނދަރަށް ވަނީ ގެއްލުންތަކެއް ލިބިފައެވެ. މަކުނުދޫ ކައުންސިލްގެ ރައީސް ރިލްވާން މުޙައްމަދު ވިދާޅުވީ، ސުނާމީގެ ކުރިން ވެސް އެބަނދަރަށް ބޮޑެތި ގެއްލުންތަކެއް ލިބިފައި ވާކަމަށެވެ.

“މިއީ ސުނާމީގައި ގެއްލުން ލިބުނު ބަނދަރެއް. އަދި އޭގެ ކުރިން ވެސް ވަނީ ރާޅެއް އަރާފައި. ބަނދަރު ހެދިތާ މާގިނަދުވަހެއް ނުވެ އެރި އެރާޅުގެ ސަބަބުން ބަނދަރަށް ބޮޑެތި ގެއްލުންތަކެއް ލިބުނު.” ރިލްވާން ވިދާޅުވި އެވެ.

ސުނާމީގައި ގެއްލުން ލިބުނު ބަނދަރުތައް މަރާމާތު ކުރުމަށް މައުމޫނުގެ ސަރުކާރުގައި ކުރެވުނު މަސައްކަތުގެ ތެރެއިން، ފްރެންޗް އެއިޑްގެ ދަށުން 3 ބަނދަރެއް މަރާމާތު ކުރުމަށް އޭރު ނިންމި އިރު، އޭގެ ތެރޭގައި މަކުނުދޫގެ ބަނދަރު ވަނީ ހިމެނިފައެވެ. ނަމަވެސް އެދުވަސްވަރު ތަކެތީގެ އަގު އުފެލެމުންދިއުމާއެކު، ފްރެންޗް އެއިޑުން ލިބުނު ފައިސާއިން ތިން ބަނދަރު ހެދޭވަރަށް ފައިސާ ނެތުމުން މަކުނުދޫ އެލިސްޓުން އުނިކުރިއެވެ. ނަމަވެސް ނަޝީދުގެ ސަރުކާރުގައި އަނެއްކާވެސް މަކުނުދޫގެ ބަނދަރު ހެދުމަށް ފައިސާ ހޯދުމުގެ މަސައްކަތް ކުރެވުންކަމަށް ރިލްވާން މަޢުލޫމާތު ދެއްވިއެވެ.

“ޔޫރަޕިއަން އިންވެސްޓްމެންޓް ބޭންކުން ފަންޑް ލިބޭ ގޮތްވެފައި އޮތްކަން އަޅުގަނޑުމެންނަށް އެނގިފައި އޮތީ. އަދި ކައުންސިލް އުފެދިގެން އެކަންކަން އޮޅުން ފިލުވުމަށް ފޮނުވުނު ސިޓީތަކުގެ ޖަވާބުގައި ބުނެފައި އޮތް އެމްޓީސީސީ އާ ހަވާލުކުރުމަށް ހުރިހާ ކަމެއް ނިމިފައިވާ ވާހަކަ.” ކައުންސިލްގެ ރައީސް ވިދާޅުވިއެވެ.

ބަނދަރު ހެދުމުގެ މަސައްކަތް ފެށުމަށް ހަވާލުކުރުމަށް ތައްޔާރުވެފައި ވަނިކޮށް ސަރުކާރު ބަދަލުވުމާއި ގުޅިގެން، ބަނދަރަށް ވާނެގޮތެއް ނޭނގުމުގެ ސަބަބުން މަކުނުދޫގެ ރައްޔިތުންނަށް މާޔޫސްކަން ލިބުނެވެ. ނަމަވެސް އެމާޔޫސްކަމައިގެން މޮޅިވެ ތިބުމުގެ ބަދަލުގައި، މަކުނުދޫ ކައުންސިލްގެ ފަރާތުން ވަފުދެއް  އާސަރުކާރުގެ ހައުސިންގ މިނިސްޓަރާ ބައްދަލު ކުރުމަށް މާލެ ދިޔައެވެ.

“އަޅުގަނޑުމެން ހައުސިންގ މިނިސްޓަރާ ބައްދަލު ކުރުމުން ވިދާޅުވި މަހެއް ދެމަހެއްހައި ދުވަހުގެ ތެރޭގައި މަސައްކަތް ފެށޭގޮތަށޭ އޮތީ.” ރިލުވާން ވިދާޅުވި އެވެ. “އެހެންކަމުން ކޮންމެ ސަރުކާރެއްގައި ވެސް ބަނދަރުގެ މަސައްކަތް އެބައޮތް ކޮންމެ ވެސް ގޮތަކަށް ކުރިއަށް ގޮސްފައި.”

300 ދުވަހުގެ މުއްދަތުގައި ބަނދަރު ނިންމުމަށް އެމްޓީސީސީ އާއެކު ހައުސިންގ މިނިސްޓްރީން ވަނީ ހޯމަ ދުވަހު އެއްބަސްވުމެއްގައި ސޮއިކޮށްފައެވެ. މަކުނުދޫގެ ބަނދަރުގައި ކުރިން 750 ފޫޓު ހުރިކަމުގައި ވިޔަސް، ބަނދަރު މަރާމާތުކޮށް ނިމޭއިރު، އާބަނދަރުގައި 1000 ފޫޓު ހުންނާނެ އެވެ. އެމްޓީސީސީ އިން ބުނެފައިވަނީ ކުރިއަށް އޮތް ހަތަރު ހަފްތާގެ ތެރޭގައި ބަނދަރު ހެދުމުގެ އަމަލީ މަސައްކަތް ފަށާނެ ކަމަށެވެ.

“މިއީ އަޅުގަނޑުމެންނަށް ލިބުނު ވަރަށް ބޮޑު ހިތްހަމަޖެހުމެއް.” ކުޅުދުއްފުށީ ޖަލާލުއްދީން ސްކޫލުގައި ތަޢުލީމު ހާސިލް ކުރި ޒުވާން ކައުންސިލަރ ރިލުވާން ވިދާޅުވި އެވެ.

މަކުނުދޫ އާގުޅޭ ލިޔުން

މާމަކުނުދޫ އިކޯ ޓޫރިޒަމަށް!