ހަނިމާދޫ އެއާޕޯޓު އަވަސް މުސްތަގުބަލެއްގައި އިންޓަނޭޝަނަލް އެއަރޕޯޓަކަށް ބަދަލުކުރެވޭނެ ކަމަށް ރައީސުލްޖުމުހޫރިއްޔާ ވިދާޅުވެއްޖެ

ހދ ހަނިމާދޫ އެއާޕޯޓް އަވަސް މުއްދަތެއްގައި އިންޓަނޭޝަނަލް އެއާރޕޯޓަކަށް ބަދަލުވެގެންދާނެ ކަމަށް ރައީސުލްޖުމުހޫރިއްޔާ ޑރ މުހައްމަދު ވަހީދު ހަސަން މަނިކު ވިދާޅުވެއްޖެ އެވެ.

ރައީސް މިހެން ވިދާޅުވީ، ހަފުތާ ބަންދުގައި ހއ އަތޮޅަށް ކުރެއްވި ދަތުރުފުޅުގައި ހއ ކެލާގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައި އެވެ. ރައީސް ވިދާޅުވީ، މިވަގުތު ސީދާ ތާރީޚެއް ނުދެއްނެވުނު ކަމުގައިވިޔަސް ކައިރި މުސްތަގުބަލެއްގައި ހަނިމާދޫ އެއާޕޯޓް އިންޓަނޭޝަނަލް އެއާރޕޯޓަކަށް ބަދަލުކުރާނެ ތާރީޚެއް އިއުލާނުކުރެވޭނެ ކަމަށެވެ.

ރައީސް ޑރ ވަހީދުގެ ވާހަކަފުޅުގައި ހަނީމާދޫ އެއާރޕޯޓް އިންޓަނޭޝަނަލް އެއާރޕޯޓަކަށް ބަދަލުވެ ފްލައިޓްތައް ޖައްސަން ފެށުމުން ފަތުރުވެރިކަމުގެ ސިނާއަތަށް ކުރިއެރުން ލިބިގެންދާނެ ކަމަށް ވިދާޅުވި އެވެ. އަދި އެއީ އަތޮޅުގެ ތަރައްޤީއަށް ލިބިގެންދާނެ ބޮޑު ބާރެއްކަމަށް ރައީސް ވިދާޅުވި އެވެ.

ހަނިމާދޫ އިންޓަނޭޝަނަލް އިއާޕޯޓް އިންޓަނޭޝަނަލް ކުރުމަށް ފުރަތަމަ ފަހަރަށް ބިޑަށް ލާފައިވަނީ ކުރީ ސަރުކާރު ވެރިކަމަށް އެރިތާ ކުޑަ ދުވަސްކޮޅެއްގެ ތެރޭގައި އެވެ. އެހެންނަމަވެސް އެފަހަރު އެއާޕޯޓާއެކު ގިނަ އަދަދެއްގެ ޓުއަރިސްޓް ބެޑްތަކެއް ދޭން ނިންމުމާ ގުޅިގެން މަޝްރޫއަށް ބަދަލުތަކެއް ގެނެސް ފަހުން އެމަޝްރޫއު ވަނީ އިއުލާނުކޮށްފައި އެވެ.

ދެވަނަ ފަހަރަށް ހުޅުވާލި ހުޅުވާލި ފުރުޞަތުގައި 19 ފަރާތަކުން ޝައުގުވެރިކަން ފާޅުކޮށްފައިވެއެވެ. އޭގެތެރެއިން ޝޯޓްލިސްޓު ކުރެވިގެން ބިޑު ހުށަހެޅުމުގެ ފުރުސަތު ހުޅުވާލާފައި ވަނީ 8 ފަރާތަކަށެވެ. ޝޯޓު ލިސްޓް ކުރި ފަރާތްތަކުގެ ތެރޭގައި ރާއްޖޭގެ އިތުރުން އިންޑިޔާ، ތުރުކީ ވިލާތާއި އެމެރިކާ އަދި އިނގިރޭސިވިލާތުގެ ކުންފުނިތައް ހިމެނެ އެވެ. އޭގެ އިތުރުން ސިންގަޕޫރުގެ ކުންފުންޏަކާއި ތައިލެންޑްގެ ކުންފުންޏެއް ހިއްސާވާ ކޮންސޯޓިއަމްއަކުން ޝައުގުވެރިކަން ފާޅުކޮށްފައިވާ ކަމަށް ކުރިން އިކޮނޮމިކް މިނިސްޓްރީން ކުރިން މައުލޫމާތު ދެއްވާފައި ވެއެވެ.

މިއަހަރުގެ މާރޗް 20 ވަނަ ދުވަހު ސޮއިކުރަން ކުރިން ކަނޑައަޅާފައިވާ އެ ޕުރޮޖެކްޓް ހޯލްޑް ކޮށްފައި ކަމަށް ކުރިން ބުނިނަމަވެސް އެޕުރޮޖެކްޓް ގެ ހުރިހާ މަސައްކަތެއް ހުއްޓާލުމަށްފަހު އަލުން އެމަސައްކަތް މިއަހަރުތެރޭ ފަށާނެ ކަމަށް އިކޮނޮމިކް މިނިސްޓްރީން ވަނީ ބުނެފައި އެވެ.

އިކޮނޮމިކް މިނިސްޓްރީގެ އޮފިޝަލެއް ވިދާޅުވީ މާޗު މަހުގެ 20 ވަނަ ދުވަހު ކުރިން ސޮއިކުރަން ހަމަޖައްސާފައި އޮތް ޕުރޮޖެކްޓް ޓާރމިނޭޓް ކޮށް އަލުން އިއުލާން ކުރާއިރު މިހާރު ހުރި ބައެއް ކަންކަން ބަދަލުވެދާނެކަމަށެވެ. އެކަމަށްޓަކައި ކުރިން އޮތް ޕްލޭން ބަދަލުކޮށް މުޅި މަޝްރޫއު އަލުން ރިވައިޒް ކުރަމުން އަންނަ ކަމަށް އޭނާ ވިދާޅުވި އެވެ.

ހަނިމާދޫ އެއާޕޯޓްގެ ހަބަރުތައް:

ހަނިމާދޫ އެއާޕޯޓު އިންޓަނޭޝަނަލް ކުރުން ތިންވަނަ ފަހަރަށް ބީލަމަށް؟ (09/04/2012)

ހަނިމާދޫ އެއާޕޯޓް ތަރައްގީ ކުރުމުގެ މަސައްކަތް ހޯލްޑް ކޮށްފައި (18/03/2012)

ހަނިމާދޫ އެއާޕޯޓް ތަރައްޤީ ކުރުމުގެ މަސައްކަތް ދެ މަހެއްހާ ދުވަހުގެތެރޭ ބަޔަކާ ހަވާލު ކުރެވޭނެ: އިކޮނޮމިކް މިނިސްޓްރީ (22/01/2012)

ހަނިމާދޫ އެއާޕޯޓް ޖީއެމްއާރަށް ނުދީ އަލުން ބީލަމަށް (05/06/2011)