ކުޅުދުއްފުށީގައި މި އަހަރުގެ ތެރޭގައި ބްލަޑް ބޭންކެއް ގާއިމުކުރެވޭނެކަމަށް ހެލްތް މިނިސްޓަރ ވިދާޅުވެއްޖެ

ކުޅުދުއްފުށީގައި މިއަހަރު ނިމުމުގެ ކުރިން ބްލަޑް ބޭންކެއް ގާއިމުކުރެވިގެން ދާނެ ކަމަށް ހެލްތް މިނިސްޓަރ ޑރ. ޖަމްޝީދު ވިދާޅުވެއްޖެ އެވެ.

ހެލްތް މިނިސްޓަރ މިހެން ވިދާޅުވީ، ހެލްތް މިނިސްޓްރީގެ މަސައްކަތްތަކާ ގުޅޭގޮތުން މައުލޫމާތު ދިނުމަށް މިދިޔަ ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ނެވެ.

މިނިސްޓަރ ވިދާޅުވީ، ކުޅުދުއްފުށީގެ އިތުރުން އައްޑޫގައި ވެސް މިއަހަރުގެ ތެރޭގައި ބްލަޑް ބޭންކްގެ ހިދުމަތް ދޭން ފެށޭނެ ކަމަށެވެ. އަދި މިމަޝްރޫއު ހިންގަނީ ހަމައެކަނި ސަރުކާރުގެ ބަޖެޓަކުން ނޫން ކަމަށާއި އަމިއްލަ ފަރާތްތަކެއްގެ އެހީތެރިކަން އެމަޝްރޫއަށް ލިބިފައިވާ ކަމަށް މިނިސްޓަރ ވިދާޅުވި އެވެ.

އެ ބައްދަލުވުމުގައި ވާހަކަ ދައްކަވަމުން މިނިސްޓަރ ވިދާޅުވީ، ކުޅުދުއްފުށީ ހޮސްޕިޓަލަށް ދިމާވެފައިވާ ޖާގައިގެ ދަތިކަން ހައްލުކުރުމަށްޓަކައި މަސައްކަތްތަކެއް ކުރެވެމުން އަންނަ ކަމަށެވެ. އަދި ކުޑަކުދިންގެ އައިސީޔޫ އާއި ބޮޑެތި މީހުންގެ އައިސީޔޫއެއް ވެސް އަމިއްލަ ފަރާތެއްގެ އެހީގައި އިމާރާތްކުރުމަށް ނިންމާފައިވާ ކަމަށެވެ. އެމަޝްރޫއު މިހާރު އޮތީ ބިޑްކުރުމުގެ މަރުހަލާ ނިންމާ ބަޔަކާ ހަވާލުކުރުމުގެ މަރުހަލާގައި ކަމަށް މިނިސްޓަރ ވިދާޅުވި އެވެ.

މިނިސްޓަރ ޑރ. ޖަމްޝީދު ވިދާޅުވީ ކުޅުދުއްފުށީ ހޮސްޕިޓަލަކީ އުތުރުގެ ތިން އަތޮޅުގެ ގިނަ އަދަދެއްގެ ރައްޔިތުން ހިދުމަތް ހޯދަމުން އަންނަ ހޮސްޕިޓަލެއް ކަމަށް ވާތީ ހިދުމަތް ހޯދުމަށް ކުޅުދުއްފުއްޓަށް އަންނަ ފަރާތްތަކަށް ހެޔޮ އަގެއްގައި ތިބެވޭނެ އެކޮމޮޑޭޝަން ބުލޮކެއް ހެދުމުގެ މަސައްކަތް މިހާރު ބިޑް އިވެލުއޭޝަން މަރުހަލާގައިވާ ކަމަށެވެ. އެކަމަށް ބޭނުންވާ ފަންޑު ލިބިފައިވާ ކަމަށްވެސް ޖަމްޝީދު ވިދާޅުވި އެވެ.

ހެލްތް މިނިސްޓަރ ވިދާޅުވީ، ލެބޯޓަރީ ނުހުންނަ ރަށްރަށުގެ މީހުންނަށް ވެސް ރަށުގައި ހުރެގެން ހެލްތު ޓެސްޓްތައް ހެދޭނެ ނިޒާމެއް ގާއިމުކުރުމުގެ މަސައްކަތްކުރަމުން އަންނަ ކަމަށެވެ. ލެބޯޓްރީއެއް ނެތް ރަށެއްގައި ހުންނަ މީހަކަށް ވެސް ލޭ ފަދަ ތަކެތި ފޮނުވައިގެން ޓެސްޓްކުރެވޭނެ މަގު މި ޕްރޮގްރާމްގެ ދަށުން ތަނަވަސްވެގެންދާނެ ހެލްތް މިނިސްޓަރ ޑރ ޖަމްޝީދު ވިދާޅުވި އެވެ.

ޑރ ޖަމްޝީދު ވިދާޅުވީ މި ނިޒާމް ތަޖުރިބާކުރުމަށް މި މަހުގެ ތެރޭގައި ޕައިލެޓް ޕްރޮގްރާމެއް ހދ. އަތޮޅުގައި ފަށާނެ ކަމަށެވެ. އަދި މި އަހަރުގެ ތެރޭގައި މި ނިޒާމް މުޅި ރާއްޖެ އަށް ތައާރަފްކުރާނެ ކަމަށް މިނިސްޓަރު ވިދާޅުވި އެވެ.