އަތޮޅު ރަށްވެހިގޭގެ މައްސަލަ އެންމެ ފަހުން ކޯޓަށް

.

ހދ އަތޮޅު ރަށްވެހިގެ ކުއްޔަށް ހިފާފައިވާ ސޭލާރ ގްރޫޕް އިން އެއްބަސްވުމާ ހިލާފުވެފައިވާ ކަމަށް ބުނެ ހދ އަތޮޅު ކައުންސިލުން ކޯޓަށް މައްސަލަ ހުށަހަޅައިފި އެވެ.

ހދ އަތޮޅު ކައުންސިލުގެ ރައީސް މުހައްމަދު ޝުކޫރު ވިދާޅުވީ، އަތޮޅު ރަށްވެހިގެ ކުއްޔަށް ހިފި ސެއިލަ ގްރޫޕުން އެތަން ކުއްޔަށް ދިނުމަށްޓަކައި ކޮށްފައި އޮތް އެގްރީމެންޓްއާ ހިލާފުވެގެން ރަށްވެހިގެ ހުސްކުރުމަށް ނޯޓިސް ދިނުމުން ވެސް އެމުއްދަތުގެ ތެރޭގައި އެފަރާތުން ރަށްވެހިގެ އިން ނުކުމެފައި ނުވާކަމަށެވެ. އެހެންވުމުގެ ސަބަބުން ކައުންސިލުގެ ޖަލްސާއިން ފާސްކޮށްގެން މިހާރު އެމައްސަލަ ކޯޓަށް ހުށަހަޅާފައިވާ ކަމަށް ޝުކޫރު ވިދާޅުވި އެވެ.

“ހދ. އަތޮޅު ރައްވެހިގެ ކުއްޔަށް ދޫކޮށްފައިވާ ކުޅުދުއްފުށީ ސޭލާރ ގުރޫޕުން އެގްރީމެންޓާއި ހިލާފްވެފައިވާތީ ކައުންސިލުގެ ބައްދަލުވުމަކުން ނިންމާ ސިޓީއަކުން ސޭލާރ ގުރޫޕުގެ ވެރިޔާ ހުސެއިން އާދަމަށް މިއަހަރުގެ ފެބްރުއަރީ މަހުގެ 22 ވަނަ ދުވަހުގެ ކުރީން އިމާރާތުން ނިކުންނަ  އަންގާފައިވާނެ” ރައީސް ވިދާޅުވިއެވެ.

އަތޮޅު ކައުންސިލުގެ ރައީސް ވިދާޅުވީ، ރަށްވެހިގޭގެ މައްސަލަ ކޯޓުގައި ކުރިއަށްދާތީ މިހާރު އެތަނުގެ ކުލި ބަލައިގަތުން ކައުންސިލުން ހުއްޓާލާފައިވާ ކަމަށެވެ.

މިމައްސަލައާބެހޭ ގޮތުން ސޭލާރ ގްރޫޕުގެ ވެރިޔާ ހުސެއިން އާދަމް ވިދާޅުވީ، އެފަދަ މައްސަލައެއް ކޯޓަށް ހުށަހަޅާފައިވާ ކަން ރަސްމީ ހައިސިއްޔަތަކުން އަދި އެނގިވަޑައި ނުގަންނަވާ ކަމަށާއި އެހެންނަމަވެސް ނުރަސްމީކޮށް ކޯޓަށް އެމައްސަލަ ހުށަހެޅިކަން އެނގިވަޑައިގެންފައިވާ ކަމަށެވެ.

ހުސެން ވިދާޅުވީ، ސޭލާރ ގްރޫޕަށް ރަށްވެހިގެ ދީފައިވަނީ 10 އަހަރު ދުވަހުގެ މުއްދަތަށް ކަމަށާއި އެތަން ކުއްޔަށް ހިފި ފަހުން އަދި މިވީ އެންމެ 2 އަހަރު ކަމަށެވެ. އަދި، އެތަން ކުއްޔަށް ހިފި ފަހުން އަބަދުވެސް އެތަން އަތުލުމުގެ މަަސައްކަތް ކައުންސިލުން ކުރަމުން އަންނަކަމަށް އޭނާ ތުހުމަތު ކުރެއްވި އެވެ. އެހެންވުމުގެ ސަބަބުން ރަށްވެހިގޭގައި އިންވެސްޓް ކުރުމަށް ދަތިތަކެއް ދިމާވިކަމަށް އޭނާ ވިދާޅުވި އެވެ.

“އެތަން ލިބުނު ދުވަހުން ފެށިގެން އެތަނުން ނެރެން ކައުންސިލުން މަސައްކަތް ކުރޭ. އެކަމުގެ ސަބަބުން އެތަނުގައި އެއްވެސް ކަހަލަ އިންވެސްޓެއްވެސް ނުކުރެވިފައި އެހުރީ. ތަފާތު ފަހަރު މަތިން އިންވެސްޓްކުރަން ބޭރުގެ ފަރާތްތަކާއި މާލޭގެ ފަރާތްތަކާއިއެކު ވާހަކަ ދައްކާ (އިންވެސްޓަރުން) ކުޅުދުއްފުއްޓަށް ގެނެސްފައި ވާނީ” ހުސެން ވިދާޅުވި އެވެ.

ހުސެން ވިދާޅުވީ ކޮންމެ މަހެއްގައި ބަރާބަރަށް ކުލި ދައްކަމުން އަންނަ ކަމަށާއި އެހެން ނަމަވެސް އެންމެ ފަހުން ކުލި ދައްކަން ދިއުމުން ކުލި ބަލައިގެންފައި ނުވާކަމަށެވެ. އަދި ދަށު ކޯޓުން މައްސަލަ ނިމޭގޮތަކުން އިސްތިއުނާފަށް ވެސް ދާނެ ކަމަށާއި 2 އަހަރު ދުވަސްތެރޭ ސޭލާރ ގުރޫޕަށް ލިބުނު ގެއްލުމުގެ ބަދަލުވެސް ހޯދާނެ ކަމަށް އޭނާ ވިދާޅުވި އެވެ.

ސޭލާރ ގުރޫޕަށް ހދ އަތޮޅު ރަށްވެހިގެ ދީފައިވަނީ މަހަކު 32700 ރުފިޔާ އަށެވެ. ހދ އަތޮޅު ރަށްވެހިގެ ސޭލާރ ގުރޫޕަށް ދީފައިވަނީ ކޮރަޕްޝަނަށް މަގުފަހިވާ ގޮތަށް ކަމަށް އެކައުންސިލުގެ ކުރީގެ ރައީސް އާދަމް ވަހީދު ވަނީ ކުރިން ވިދާޅުވެފައި އެވެ.

އެއްބަސްވުމާ ހިލާފަށް ސޭލާރ ގުރޫޕުން ކޮށްފައިވާ ކަންތައްތަކެއް ކަމަށް ކައުންސިލް މެމްބަރެއް ކުރިން ވިދާޅުވެފައި ވަނީ، އަތޮޅު ރަށްވެހިގޭގައި އެމްޑީޕީގެ ދިދަ ނަގައި، އަތޮޅު ކައުންސިލަށް އެންގުމެއް ނެތި ރަށްވެހިގޭގައި ހަދާފައި ހުރި ގުދަނެއް ހަލާކުކޮށްފައި ވުމާއި ސޭލާރ ގުރޫޕުން ހުށަހެޅި ޕުރޮޕޯސަލްއާ އެއްގޮތަށް އެއްވެސް ކަމެއް ކޮށްފައި ނުވުމެވެ. އެހެންނަމަވެސް މިތުހުމަތުތައް ސޭލާރ ގުރޫޕުން ދޮގު ކުރެއެވެ.