ކުޅުދުއްފުށީ ރީޖަނަލް ހޮސްޕިޓަލްގައި ކުޑަކުދިންގެ އާ އައިސީޔޫ ހެދުމަށް ކޮންޓްރެކްޓަރާއެކު ސޮއިކޮށްފި

.

ކުޅުދުއްފުށީ ރީޖަނަލް ހޮސްޕިޓަލްގައި ހަދާ ކުޑަކުދިންގެ އާ އައިސީޔޫ އިމާރާތްކުރުމަށް ކޮންޓްރެކްޓަރާއެކު އެއްބަސްވުމުގައި ސޮއިކޮށްފިއެވެ.

ނިއޯނޭޓަލް އިންޓެންސިވް ކެއަރ ޔުނިޓް (އެން.އައި.ސީ.ޔޫ) ނުވަތަ ކުޑަކުދިންގެ އައިސީޔޫ ގެ އިމާރާތްކުރުމަށް މިއަދު ސޮއި ކުރެވުނު އެއްބަސްވުމުގައި ކުޅުދުއްފުށީ ރީޖަނަލް ހޮސްޕިޓަލްގެ ފަރާތުން ސޮއި ކުރެއްވީ އެ ހޮސްޕިޓަލް ވަގުތީގޮތުން ހިންގުމާއި ހަވާލުވެގެން ހުންނެ ސީނިއަރ ލެބޯޓަރީ ޓެކްނޮލޮޖިސްޓް މުޙައްމަދު ޙަސަންއެވެ. މިމަސައްކަތް ހަވާލުކޮށްފައިވަނީ ކުޅުދުއްފުށީ، ނެދުންގެ، ހުސެއިން އަލީ އާއެވެ.

5 ޖޫން ވީދުވަހު ކުރެވުނު އިޢުލާނާއި ގުޅިގެން މަސައްކަތުގެ އަގެއްގެ ގޮތުގައި 1،267،039 ރުފިޔާ ހުށަހެޅި ހުސެއިން އަލީ އާއެކު ކުރެވުނު އެއްބަސްވުމުގެ ދަށުން މަސައްކަތް ނިންމުމަށް ހަމަޖެހިފައިވަނީ 178 ދުވަހުގެ މުއްދަތުގެ ތެރޭގައި އެވެ. ކުޅުދުއްފުށީ ރީޖަނަލް ހޮސްޕިޓަލްގެ ގޯތިތެރޭގައި މިހާރުގެ ސަރޖިކަލް ވޯޑުގެ ހުޅަނގުގައި ހެދުމަށް ހަމަޖެހިފައިވާ އިމާރާތުގެ ދިގުމިނުގައި 40 ފޫޓު އަދި ފުޅާމިނުގައި 28 ފޫޓު ހުންނާނެކަމަށް ކުޅުދުއްފުށީ ރީޖަނަލް ހޮސްޕިޓަލް އިން މަޢުލޫމާތު ދެއްވި އެޑްމިނިސްޓްރޭޓިވް އޮފިސަރ އަބްދުލް ޤަފޫރު ވިދާޅުވިއެވެ.

ސަރަހައްދުގެ ގިނަބަޔަކު ޚިދުމަތް ހޯދަމުން އަންނަ ހޮސްޕިޓަލްގައި ގާއިމުކުރާ އެންއައިސީޔޫއަކީ އިޓަލީގެ ކެރިޓަސް އިޓާލިއާނާ ޕްރޮޖެކްޓްގެ ދަށުން އެހީ ލިބިގެން ގާއިމު ކުރެވޭ އައިސީޔޫއެކެވެ. ކުޑަކުދިންގެ އައިސީޔޫ ނިމުމުން އެތަނުގައި އެއްފަހަރާ 10 ކުދިންނަށް ފަރާވާ ދެވޭނެއެވެ.

އެންއައިސީޔޫ ގާއިމު ކުރުމަށް ހަދަން ޖެހޭ އިމާރާތް ހެދުމުގެ މަސައްކަތް ކޮށްދޭނެ ފަރާތެއް ހޯދުމަށް މިދިޔަ އަހަރުގެ ފަހުކޮޅު އިއުލާންކޮށް މިނިސްޓްރީއަށް ފޮނުވާފައިވާކަމަށް ހޮސްޕިޓަލްއިން މަޢުލޫމާތު ލިބިފައިވެއެވެ. ނަމަވެސް ސަރުކާރު ބަދަލުވުމާއި ގުޅިގެން އެވޯޑް ނުކުރެވި ލަސްވެފައިވާތީ، ބިޑް ތަކުގެ މުއްދަތު ހަމަވުމުގެ ސަބަބުން ޖޫން މަހު އަލުން އިއުލާން ކުރީކަމަށް ވެސް ހޮސްޕިޓަލްގެ އޮފިޝަލެއް ވިދާޅުވިއެވެ.

އެންއައިސީޔޫ އިމާރާތުގައި ބޭނުންކުރުމަށް އެހީގެ ދަށުން ގެނެވޭ ބައެއް ތަކެތި މިހާރު ހޮސްޕިޓަލްއަށް ލިބިފައިވާ ކަމަށާއި އިތުރު ތަކެތި ވެސް ވަރަށް އަވަހަށް ލިބޭނެ ކަމަށް ހޮސްޕިޓަލްގެ އޮފިޝަލެއް މަޢުލޫމާތު ދެއްވިއެވެ.