ބޮޑެތި ކުށްތައް މަދުކުރުމަށްޓަކައި ކްރައިމް ރިޑަކްޝަން ކޯޑިނޭޓިން ކޮމިޓީއަކާއި ޓާސްކްފޯހެއް އުފައްދައިފި

ރާއްޖޭގައި ހިންގަމުންދާ ބޮޑެތި ކުށްތައް މަދުކޮށް އަމާން ވެއްޓެއް ގާއިމުކުރުމަށްޓަކައި، ރައީސުލްޖުމުހޫރިއްޔާ ޑރ. މުހައްމަދު ވަހީދު ހަސަން މަނިކު، ކްރައިމް ރިޑަކްޝަން ކޯޑިނޭޓިންގ ކޮމިޓީއަކާއި ކްރައިމް ޕްރިވެންޝަން ޓާސްކްފޯހެއް މިއަދު އުފައްދަވައިފި އެވެ.

ސަރުކާރުން މިއަދު އެކުލަވާލި ކްރައިމް ރިޑަކްޝަން ކޯޑިނޭޓިންގ ކޮމިޓީގައި ހިމެނިވަޑައިގަންނަވާ ބޭފުޅުންނަކީ، ރައީސުލްޖުމުހޫރިއްޔާ އާއި ރައީސުލްޖުމްހޫރިއްޔާގެ ނައިބު މުޙައްމަދު ވަޙީދުއްދީނާއި، މިނިސްޓަރ އޮފް ހޯމް އެފެއާޒް ޑޮކްޓަރ މުޙައްމަދު ޖަމީލު އަޙްމަދާއި، މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ މުޙައްމަދު ނާޒިމާއި، އެޓަރނީ ޖެނެރަލް ޢާއިޝަތު އާޒިމާ ޝަކޫރާއި، ޕްރޮސެކިއުޓަރ ޖެނެރަލް އަޙްމަދު މުޢިއްޒާއި، ކްރިމިނަލް ކޯޓުގެ އިސް ޤާޒީ އަލްއުސްތާޛު ޢަބްދުﷲ މުޙައްމަދާއި، ކޮމިޝަނަރ އޮފް ޕޮލިސް ޢަބްދުﷲ ރިޔާޒެވެ.

މިކޮމިޓީގެ މަސައްކަތްތައް ހިނގަމުންދާނީ، ސީދާ ރައީސުލްޖުމްހޫރިއްޔާގެ ބެއްލެވުމުގެ ދަށުން ކަމަށް ރައީސް އޮފީހުން މިއަދު ނެރެފައިވާ ބަޔާނެއްގައި ބުނެފައި ވެއެވެ.

މިއަދު އުފެއްދި ކްރައިމް ޕްރިވެންޝަން ޓާސްކްފޯހުގައި ހިމެނިވަޑައިގަންނަވަނީ، މިނިސްޓަރ އޮފް ހޯމް އެފެއާޒާއި، މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީއާއި، އެޓަރނީ ޖެނެރަލާއި، ކޮމިޝަނަރ އޮފް ޕޮލިސްއާއި، ޑިޕާޓްމަންޓް އޮފް ޕެނިޓެންޝަރީ އެންޑް ރިހެބިލިޓޭޝަން ސަރވިސަސްގެ ފަރާތުން ބޭފުޅަކާއި، ޗީފް އޮފް ޑިފެންސް ފޯސް މޭޖަރ ޖެނެރަލް އަޙްމަދު ޝިޔާމާއި، ރައީސުލްޖުމްހޫރިއްޔާގެ އޮފީހުން ބޭފުޅަކާއި، މިނިސްޓަރީ އޮފް ފިނޭންސް އެންޑް ޓްރެޜަރީން ބޭފުޅެކެވެ.

އެޓާސްކްފޯސްގެ ޗެއާމަނަކަށް ހަމަޖައްސަވާފައިވަނީ ރައީސުލްޖުމުހޫރިއްޔާގެ ނައިބު މުހައްމަދު ވަހީދުއްދީން އެވެ. އަދި އެޓާސްކްފޯސްގެ އެންމެ އިސްފަރާތެއްގެ ގޮތުގައި ހިމެނިވަޑައިގަންނަވަނީ ޑިފެންސް މިނިސްޓްރީގެ ފަރާތުން ކަނޑައަޅައި ބޭފުޅެއް ކަމަށް ރައީސް އޮފީހުގެ ބަޔާނުގައި ވެއެވެ.

ކުށްކުރުން އިތުރުވަމުންދާއިރު، ދެވަނަ ފުރުސަތު ޕްރޮގްރާމްގެ ދަށުން މިހާތަނަށް 438 ކުށްވެރިންވަނީ މުޖުތަމަޢަށް ދޫކޮށްލާފައިވާ ކަމަށާއި އޭގެ ތެރެއިން 125 މީހުންވަނީ އެކި ކުށްކުށުގައި އަލުން ހައްޔަރުކޮށްފައި ކަމަށް ރައީސް އޮފީހުން މިއަދު ނެރުނު ބަޔާނުގައި ބުނެފައި ވެއެވެ. އަދި 313 އެއްހާ މީހުން އަދިވެސް މިނިވަންކަމާއެކު އުޅެމުން އެބަގެންދާ ކަމަށް އެބަޔާނުގައި ވެއެވެ.

ކުށްމަދު ކުރުމަށް ސަރުކާރުން ކޮމެޓީއަކާއި ޓާސްކްފޯހެއް މިއަދު އެކުލަވާލިއިރު، އިއްޔެ ވަނީ ވަރަށް ރަހުމް ކުޑަ ގޮތަކަށް މަޝްހޫރު ވަކީލަކު އަވަހާރަކޮށްލާފައި އެވެ. އަދި މާރާމާރީގެ މައްސަލަތަކުގައި ފާއިތުވެ ދިޔަ ދެތިން އަހަރު ގިނަ ބަޔަކު ވަނީ މަރުވެފައި އެވެ.