އެތުލެޓިކްސް މީޓުގައި ބައިވެރިވާން މާލެދިޔަ ޖަލާލުއްދީން ސްކޫލުގެ ކޮންޓިންޖެންޓް “ހާލުގައި ޖެހިފައި” 14 ގަޑިއިރު

މާދަމާ ފެށޭ އިންޓަރ ސްކޫލު އެތުލެޓިކްސް މީޓުގައި ބައިވެރިވާން މާލެ ދިޔަ ކުޅުދުއްފުށީ ޖަލާލުއްދީން ސްކޫލުގެ ކޮންޓިންޖެންޓް އެކޮމޮޑޭޝަނެއް ނުލިބި “ހާލުގައި ޖެހިފައި” 14 ގަޑިއިރު ތިބެން ޖެހިއްޖެ އެވެ.

ޖަލާލުއްދީން ސްކޫލުގެ ޓީމު ހޯމަ ދުވަހުގެ ހަވީރު ބަހާދަރު ބޯޓުގައި ކުޅުދުއްފުށިން ފުރައިގެން މިއަދު ފަތިހު މާލެ ދިޔައީ 5:30 ހާއިރުއެވެ. 24 ދަރިވަރުންނާއި 6 އޮފިޝަލުންގެ  މައްޗަށް އެކުލެވޭ ކޮންޓިންޖެންޓްގެ އެކޮމޮޑޭޝަން އެތުލެޓިކްސް އެސޯސިއޭޝަނުން ހަމަޖައްސައިދީފައިވަނީ މިއަދު އިރުއޮށްސި ހަތްގަޑި ތިރީސް ހާއިރު އެވެ. ފަތިހުން ފެށިގެން ޓީމުގެ ހުރިހާ މެމްބަރުން ތިބެންޖެހުނީ ކުޅިވަރު އެކުވެނި ދަނޑުގެ ކްރިކެޓް ހޯލުގައި ކޭމްޕް ޖަހައިގެންނެވެ.

ކުޅުދުއްފުށީ ޖަލާލުއްދީން ސްކޫލުގެ ސްޕޯޓްސް ސުޕަވައިޒަރ އަދި ޓީމުގެ ކޯޗު މުޙައްމަދު ޙަސަން ކުޅުދުއްފުށީ އޮންލައިން އަށް މަޢުލޫމާތު ދެއްވަމުން ވިދާޅުވީ، ޓީމު ކުޅުދުއްފުށިން އިއްޔެ ފުރާފައިވަނީ އެކޮމޮޑޭޝަން  ހަމަޖެހިފައިވާކަމަށް އެތުލެޓިކްސް އެސޯސިއޭޝަނުން އެންގުމުންނެވެ.  ނަމަވެސް މާލެ އަށް ފައިބައި، އެކޮމޮޑޭޝަން ހަމަޖެހިފައިވާކަމަށް އެންގި ގަލޮޅުދަނޑުގެ ޔޫތު އެކޮމޮޑޭޝަން ބްލޮކަށް ދިއުމުން   އެސޯސިއޭޝަނުން އެތަން ހަމަޖައްސާފައި ނުވާކަމަށް އެތަނުން ބުނިކަމަށެވެ. އަދި އެކަން އެސޯސިއޭޝަނަށް އެންގުމުން، އެކޮމޮޑޭޝަން ހަމަޖެހޭނެ ކަމަށާއި ކުޅިވަރު އެކުވެންޏަށް ދިއުމަށް   އެންގިކަމަށް މުޙައްމަދު ވިދާޅުވި އެވެ.

ދިރާގު ބްރޯޑްބޭންޑް ރޯޑްރޭހުގައި ބައިވެރިވި ޖަލާލުއްދީން ސްކޫލުގެ ޓީމާއެކު މާލެއައި ކޯޗު އިތުރަށް ވިދާޅުވީ، މެންދުރުފަހު އެކޮމޮޑޭޝަން ހަމަޖެހޭނެކަމަށް ބުނެ ޓީމު ބައިތިއްބާފައި ވަނީ އެކުވެނިދަނޑުގެ ކްރިކެޓް ހޯލުގައެވެ. ނަމަވެސް މެންދުރުފަހު އެސޯސިއޭޝަނަށް ދިއުމުން ބުނެފައިވަނީ ހަވީރު އެކޮމޮޑޭޝަން ލިބޭނެ ކަމަށާއި ހަވީރު ދިއުމުން ބުނެފައިވަނީ “ކުދިން ނިދަންވާއިރަށް” އެކޮމޮޑޭޝަން ލިބޭނެ ކަމަށެވެ. އަދި އޭގެ ފަހުން މާގިނައިރުތަކެއް ނުވެ އެކޮމޮޑޭޝަން ނުލިބޭނެކަމަށް އެސޯސިއޭޝަނުން އެންގިއެވެ. އަދި މާލޭގައި ތިބެންބޭނުންނަމަ ކުލީ ކޮޓަރި ހަމަޖެއްސުމަށް އަންގާފައިވެއެވެ.

“ކުލީކޮޓަރި ލިބޭތޯވެސް އަޅުގަނޑުމެން ބެލިން. ނަމަވެސް އެއްފަހަރާ އެހާގިނަ ކުދިންނަށް އެއްތަނަކުން ކޮޓަރި ހޯދުމަކީ ފަސޭހަކަމަކަށް ނުވާނެ. އަދި އެއްތަނެއްގައި ކުދިން ނުބޭތިއްބޭނަމަ އެއީ އެހާ ރަނގަޅު ކަމެއް ކަމަކަށް ނުދެކެން. އެހެންކަމުން ސްކޫލުގެ ޕްރިންސިޕަލް އަށް އެންގުމުން ޕްރިންސިޕަލް ވިދާޅުވީ ފުރައިގެން ރަށަށް ދިއުމަށް. އަޅުގަނޑުމެން ބޯޓާ ވާހަކަދައްކައިގެން މިރޭ ފުރަންވެސް ތައްޔާރު ވެފައި ތިއްބާ، އެސޯސިއޭޝަނުން އަންގާފައި ބުނީ އެކޮމޮޑޭޝަން ހަމަޖެހިއްޖޭ.” މުޙައްމަދު ވިދާޅުވި އެވެ.

އެކޮމޮޑޭޝަން ހަމަޖެހިގެން ޓީމުތައް މިހާރު ތިބީ ގަލޮޅުދަނޑުގެ ޔޫތު އެކޮމޮޑޭޝަން ބްލޮކްގައެވެ. އެތުލެޓިކްސް މީޓު މާދަމާ ހެނދުނު ފަށާއިރު، ޖަލާލުއްދީން ސްކޫލުގެ ކުދިން ބައިވެރިވާ ބައެއް ކުޅިވަރުތައް މާދަމާ ހެނދުނު އޮންނާނެއެވެ.