ކުޅުދުއްފުށި އޮންލައިންގެ ކުރުވާހަކަ ލިޔުމުގެ މުބާރާތް މިއަދު ޖަލާލުއްދީން ސްކޫލުގައި ބާއްވައިފި

އަބްދުލްވާހިދު ހަސަން

ކުޅުދުއްފުށީ ޖަލާލުއްދީން ސްކޫލާއި ގުޅިގެން މިދިޔަ އަހަރު ބާއްވަން ފެށި ކުޅުދުއްފުށި އޮންލައިން ކުރުވާހަކަ ލިޔުމުގެ މުބާރާތް މިއަދު އެ ސްކޫލުގައި ބާއްވައިފި އެވެ.

ކުޅުދުއްފުށީ އޮންލައިންގެ ކުރުވާހަކަ ލިޔުމުގެ މުބާރާތުގައި މިއަދު 34 ދަރިވަރަކު ވަނީ ވާހަކަ ލިޔެފައެވެ. މިމުބާރާތް އޮތީ މިއަދު ހެނދުނު ޖަލާލުއްދީން ސްކޫލް ހޯލުގައި އެވެ.

ކުރުވާހަކަ ލިޔުމުގެ މުބާރާތުގެ ނަތީޖާ ފާޅުކުރުން މި ރަމަޟާން މަސް ނިމުމުން ބާއްވާނެ ކަމަށް ކުޅުދުއްފުށީ އޮންލައިންގެ މެނޭޖުމަންޓުން ބުނެއެވެ.

ޖަލާލުއްދީން ސްކޫލުގެ ގްރޭޑް 10، 11 އަދި 12 ގެ ދަރިވަރުންނަށް އަމާޒުކޮށްގެން ކުރިއަށް ގެންދާ އެ މުބާރާތުން ހޮވާލެވޭ އެންމެ މޮޅު 15 ވާހަކަ “ކުޅުދުއްފުށި އޮންލައިން” ގައި ޝާއިއު ކުރާނެއެވެ.

މިއީ ކުޅުދުއްފުށި އޮންލައިން އިން ބާއްވާ މިފަދަ 2 ވަނަ މުބާރާތެވެ. މިދިޔަ އަހަރު ބޭއްވި ކުރުވާހަކަ ލިޔުމުގެ މުބާރާތުގައި ޖަލާލުއްދީން ސްކޫލުގެ 90 ދަރިވަރަކު ވަނީ ވާހަކަ ލިޔެފައި އެވެ. އެ މުބާރާތުގެ ސީނިއަރ ގުރޫޕުން އެއްވަނަ ގްރޭޑް 11 ބީ ގެ ދަރިވަރު ޝާމިލް އިބްރާހީމް އަށް ލިބުނު އިރު ޖޫނިއަރ ގްރޫޕުން އެއްވަނަ ލިބިފައިވަނީ ގްރޭޑް 9 ޖީގެ ދަރިވަރު އިނާޔަތު އަލީ އެވެ. މިއަހަރުގެ މުބާރާތުގައި ޖޫނިއަރ ގުރޫޕު ބައިވެރި ކޮށްފައެއް ނުވެއެވެ.