މާލޭ މެޑިކަލްސްގެ ފަރާތުން ކުޅުދުއްފުށީގައި ދަތުގެ ކޭމްޕެއް ފެށިގެން ކުރިއަށް އެބަދޭ

.

އިބްރާހީމް ހަމީދު

މާލޭ މެޑިކަލްސްގެ ފަރާތުން ކުޅުދުއްފުށީގައި ދަތުގެ ފަރުވާއަށް ހާއްސަ ކޭމްޕެއް ފެށިގެން ކުރިއަށް އެބަދެއެވެ.

ކުޅުދުއްފުށީގައި މިދިޔަ ހުކުރު ދުވަހުން ފެށިގެން ކުރިއަށްދާ މި ކޭމްޕާއި ބެހޭގޮތުން ކުޅުދުއްފުށި އޮންލައިނަށް މައުލޫމާތު ދެއްވަމުން ކޭމްޕްގެ ކޯޑިނޭޓަރ މުހައްމަދު ދާއޫދު ވިދާޅުވީ، މާލޭ މެޑިކަލްސްގެ ފަރާތުން ކުރިއަށްގެންދާ ކޭމްޕުގައި، ދަތް އުފުރުމާއި، ދަތް ސާފުކުރުން، ފުޓުނި އެޅުން، ރޫޓް ކެނެލް އަދި ނަރުގަޑު އެޅުވުމާއި ނަރުގަނޑު ބާރުކޮށްދިނުމުގެ ހިދުމަތް ދޭނެ ކަމަށެވެ.

މުހައްމަދު ދާއޫދު ވިދާޅުވީ، ދަތުގެ ފަރުވާގެ ކޭމްޕް ކުޅުދުއްފުށީގައި ކުރިއަށްދާ އިރު ކުޅުދުއްފުށީގެ ޕްރީ ސްކޫލެއް ކަމަށްވާ އަމީރު އަމީން ސްކޫލުގެ ދަރިވަރުންނަށް ހިލޭ ޑެންޓަލް ޗެކަޕެއް ހަދައިދީފައިވާ ކަމަށެވެ.

މިމަހުގެ 19 ވަނަ ދުވަހާ ހަމައަށް ކުރިއަށްދާ މި ކޭމްޕްގައި ފަރުވާދެނީ އިންޑިޔާގެ ޓްރިވެންޑްރަމްގެ އިމޭގާ ޑެންޓަލް ކްލިނިކްގެ ޑޮކްޓަރ ޖޯޖީ ސެލްވަރާޖް އެވެ.

ކުޅުދުއްފުށީ މުރަކަ ގޭގައި ކުރިއަށްދާ މި ކޭމްޕްގައި ކޮންމެ ދުވަހެއްގެ ހެނދުނު އަށަކުން ރޭގަނޑު 12 އަށް ހިދުމަތް ދޭ އިރު ޑޮކްޓަރަށް ދެއްކުމުގެ ފީ އަކީ 150 ރުފިޔާ އެވެ. މިހާރުވެސް ބޮޑު ތަރުހީބެއް ލިބެމުންދާ ކަމަށް ކޯޑިނޭޓަރ މުހައްމަދު ދާއޫދު ވިދާޅުވި އެވެ.