ޑެންގީ ހުން އިތުރުވަމުންދާތީ އެކަމަށް ސަމާލުވުމަށް ސީސީއެޗްޑީސީން އިލްތިމާސްކޮށްފި

.

މާލެއާއި ރާއްޖޭގެ އެކި ސަރަހައްދުތަކުގައި މިދުވަސްވަރު ޑެންގީ ހުންޖެހޭ މިންވަރު އިތުރުވަމުންދާ ކަމަށް ސެންޓާރ ފޯ ކޮމިއުނިޓީ އެންޑް ހެލްތް ޑިޒީޒް ކޮންޓްރޯލް (ސީސީއެޗްޑީސީ) އިން ބުނެފި އެވެ.

ސީސީއެޗްޑީސީން އިއްޔެ ނެރެފައިވާ ނޫސްބަޔާނެއްގައި ބުނެފައިވަނީ މިއަހަރުގެ މިހާތަނަށް ޑެންގީ ހުންޖެހިގެން 455 މީހުން ރިޕޯޓްކޮށްފައިވާ ކަމަށެވެ. އޭގެތެރެއިން މާލެއިން ޑެންގީ ހުންޖެހިގެން 222 މީހުން ފެނިފައިވާއިރު އަތޮޅުތެރެއިން 233 މީހުން ރިޕޯޓްކޮށްފައިވާ ކަމަށެވެ.

ސީސީއެޗްޑީސީން ބުނީ މި ދުވަސްވަރަކީ ވިއްސާރަ ދުވަސްވަރަކަށްވާތީ މަދިރި އުފެދި އާލާވުމުގެ ފުރުސަތު މާލެ އާއި އަތޮޅުތަކުގެ ހުރިހާ ހިސާބެއްގައި ވެސް ބޮޑު ކަމަށެވެ. އަދި ޑެންގީ ކޮންޓްރޯލްކުރުމަށް ރާއްޖޭގައި ކެމްޕޭނެއް ކުރިއަށް ދާ ކަމަށާއި މިދިޔަ މެއި މަހުން ފެށިގެން 12 ހަފުތާ އަށް ކުރިއަށް ގެންދަން ހަމަޖައްސާފައިވާ އެ ކެމްޕޭނަށް އެއްބާރުލުންދީ، މަދިރި އަލާވާ ފަދަ ތަންތަން ނައްތާލުމަށް އެ ސެންޓަރުން ވަނީ އިލްތިމާސްކޮށްފަ އެވެ. މީގެ އިތުރުން ކުޑަކުދިންނަށް ޑެންގީ ހުން ޖެހުނަ ނުދިނުމަށްޓަކައި މޮސްކިޓޯ ރިޕްލެންޓް ފަދަ ތަކެތި ބޭނުންކޮށް، ހަށިގަނޑު ނިވާކުރެވޭ ފަދަ ހެދުން ލެއްވުމަށް ވެސް ސީސީއެޗްޑީސީން އިލްތިމާސްކުރެ އެވެ.

އެސެންޓަރުގެ ތަފާސްހިސާބުތަކުން ދައްކާ ގޮތުގައި މިދިޔަ އަހަރު ޑެންގޫ ޖެހިގެން 12 މީހުން މަރުވެފައިވާއިރު ޑެންގޫގެ 2909 މައްސަލައެއް ރިޕޯޓް ކޮށްފައިވެ އެވެ. ޑެންގޫ ޖެހިގެން މިއަހަރު އެކަކު ވަނީ މަރުވެފައެވެ.