ހަނިމާދޫ އެއާޕޯޓުގައި ބޭންކް އޮފް މޯލްޑިވްސްގެ އޭޓީއެމްއެއް ބަހައްޓައިފި

.

އަބްދުލް ވާހިދު ޙަސަން

ހދ. ހަނިމާދޫ އެއާޕޯޓް ސަރަޙައްދުގައި ބޭންކް އޮފް މޯލްޑިވްސްގެ އޭޓީއެމްއެއް ބަހައްޓައި ޚިދުމަތް ދޭން ފަށައިފި އެވެ.

އުތުރުގެ ގިނަ ބަޔަކު ބޭނުންކުރާ ހަނިމާދޫ އެއާޕޯޓްގައި ބޭންކްގެ އޭޓީއެމްއެއް މިދިޔަ ބުރާސްފަތި ދުވަހު ބަހައްޓާފައި ވަނީ މޯލްޑިވްސް ޕޯސްޓް ލިމިޓެޑް އާއެކު ބޭންކް އޮފް މޯލްޑިވްސް އިން ވެފައިވާ ކޮމިއުނިޓީ ބޭންކިންގ ގެ އެއްބަސްވުމުގެ ދަށުންކަމަށް ބޭންކް އޮފް މޯލްޑިވްސް އިން ހާމަކުރެއެވެ.

ބޭންކް އޮފް މޯލްޑިވްސް އިން މަޢުލޫމާތު ދޭ ގޮތުގައި ހަނިމާދޫ އެއާޕޯޓްގައި ހުންނަ ޕޯސްޓް އޮފީހާއި އިންވެގެން ބެހެއްޓި އޭޓީއެމްގެ ސަބަބުން ހަނިމާދޫގެ ރައްޔިތުންނާއި ހަނިމާދޫ އެއާޕޯޓް ބޭނުންކުރަށްވާ ފަރާތްތަކުގެ އިތުރުން އެ ސަރަހައްދުގެ އެހެން ރަށްރަށުގެ ރައްޔިތުންނަށް ވެސް ލުއިފަސޭހަ ގޮތެއްގައި ބޭންކިންގ ގެ ޚިދުމަތް ލިބޭނެއެވެ.

ހަނިމާދޫގައި އޭޓީއެމްގެ ޚިދުމަތް އިފްތިތާހު ކޮށްދެއްވީ މޯލްޑިވްސް ޕޯސްޓް ލިމިޓެޑް ގެ ޗެއަރމަން އަހުމަދު ނާޒިމް އާއި ބޭންކް އޮފް މޯލްޑިވްސްގެ ޗެއަރމަން ޑރ. އަބްދު ﷲ ޝިހާމް ޙަސަން އެވެ.

ބޭންކް އޮފް މޯލްޑިވްސް އިން އަންނަނީ ކުޅުދުއްފުށީގައި ވެސް އޭޓީއެމްގެ ޚިދުމަތް ދެމުންނެވެ.

ރޯދަމަހަށް ހާއްސަކޮށްގެން ބޭންކުން ވަނީ އޭޓީއެމްތަކުން ފައިސާ ނެގޭ މިންވަރު ވެސް މިހާރު އިތުރުކޮށްފަ އެވެ.  އެމެކްސް ގޯލްޑްކާޑުން ދުވާލަކު ފައިސާ ނެގޭ މިންވަރު 15،000ރ. އަށް އިތުރުކޮށްފައިވާއިރު އެމެކްސް ގްރީން ކާޑާއި ވިސާ ޑެބިޓްކާޑުން ނެގޭ މިންވަރު 10،000ރ. އަށް ވަނީ އިތުރުކޮށްފަ އެވެ.