މީރާ އާއި މޯލްޑިވްސް ޕޮލިސް ސަރވިސްއާ ދެމެދު އެމް.އޯ.ޔޫއެއްގައި ސޮއިކޮށްފި

.

މޯލްޑިވްސް އިންލަންޑް ރެވެނިއު އޮތޯރިޓީ އާއި މޯލްޑިވްސް ޕޮލިސް ސަރވިސް އާ ދެމެދު މެމޮރެންޑަމް އޮފް އަންޑަސްޓޭންޑިންގ އެއްގައި ސޮއި ކޮށްފިއެވެ.

މީރާ އިން މަޢުލޫމާތު ދޭ ގޮތުގައި މިއެމް.އޯ.ޔޫގެ ސަބަބުން ދެ މުއައްސަސާއިން ތަންފީޒުކުރާ ޤާނޫނުތައް މިހާރަށްވުރެ ފުރިހަމަ ގޮތެއްގައި ތަންފީޒުކުރުމުގެ ފުރުޞަތު ހުޅުވިގެންދާނެކަމަށާއި، ދެ މުއައްސަސާގެ ވަސީލަތްތައް ހިއްސާކުރުމަށް މަގުފަހިވެގެންދާނެއެވެ. އަދި ޓެކްސްގެ ދާއިރާއިން ކުރެވޭ ޖިނާއީ ކުށްތައް ތަހުޤީޤުކޮށް، ދަޢުލަތަށް ލިބެންޖެހި ނުލިބިހުރި ފައިސާ ހޯދުމުގައި މޯލްޑިވްސް ޕޮލިސް ސަރވިސްގެ އެއްބާރުލުމާއި އެހީތެރިކަން ލިބިގެންދާނެއެވެ.

މީގެ އިތުރުން ކޮމަރޝަލް ކްރައިމްސް ތަހުޤީޤުކުރުމުގައި ޓެކުހާ ގުޅުންހުރި ދާއިރާތަކުގައި މީރާގެ މުވައްޒަފުންގެ ޓެކްނިކަލް ނޮލެޖް މޯލްޑިވްސް ޕޮލިސް ސަރވިސްއަށް ލިބިގެންދާނެ ކަމަށް އެ އޮތޯރިޓީއިން މަޢުލޫމާތު ދެއްވައެވެ.

މީރާގައި މިކަމަށްޓަކައި ބޭއްވުނު ރަސްމިއްޔާތުގައި އެމް.އޯ.ޔޫގައި މީރާގެ ފަރާތުން ސޮއިކުރެއްވީ ކޮމިޝަނަރ ޖެނެރަލް އޮފް ޓެކްސޭޝަން، ޔަޒީދު މުޙައްމަދު އެވެ. އަދި މޯލްޑިވްސް ޕޮލިސް ސަރވިސްގެ ފަރާތުން ސޮއިކުރެއްވީ ކޮމިޝަނަރ އޮފް ޕޮލިސް އަލްފާޟިލް ޢަބްދުﷲ ރިޔާޒު އެވެ.