ކުޅުދުއްފުށީ ބިން ހިއްކުމަށް ގެނައި ބޮސްކާލިސްގެ ބާރޖުގެ ބަނދަރު ފީ ދައްކާފައިވަނީ ގަވައިދާ ހިލާފަށް: އޮޑިޓް ރިޕޯޓް

.

މުހައްމަދު އިސްމާއީލް

ކުޅުދުއްފުށީގެ ބިން ހިއްކުމަށް ހަވާލުކުރި ބޮސްކާލިސް އިންޓަރނޭޝަނަލްގެ ފަރާތުން ކުޅުދުއްފުއްޓަށް ގެނައި އެކަމޮޑޭޝަން ބާރޖުގެ ފީ ކުރީގެ ޕުރޮވިންސް އޮފީހުން ދައްކާފައިވަނީ މާލިއްޔަތު ގަވާއިދާ ހިލާފަށް ކަމަށް އޮޑިޓް ރިޕޯޓުން ހާމަވެއްޖެ އެވެ.

އޮޑިޓަރ ޖެނެރަލް އިއްޔެ ނެރުއްވާފައިވާ އޮޑިޓް ރިޕޯޓުގައި ބުނެފައިވަނީ ކުޅުދުއްފުށީގެ ބިން ހިއްކުމުގެ މަސައްކަތަށް ބޮސްކާލިސްގެ ފަރާތުން ގެނައި ބާރޖު، ކުޅުދުއްފުށީ ސަރަހައްދީ ބަނދަރުގައި ބަނދަރުކުރުމަށް ކުޅުދުއްފުށީ ރީޖަނަލް ޕޯޓަށް ދައްކަން ޖެހުނު 156,133.24 ރުފިޔާ ޕުރޮވިންސް އޮފީހުގެ ބަޖެޓުން ދައްކާފައިވަނީ، އެފައިސާއަކީ ކޮންފަރާތަކުން ދައްކަންޖެހޭ ފައިސާއެއް ކަމެއް އެނގެން ނެތިއެވެ. އަދި އެއީ ޕުރޮވިންސް އޮފީސް މެދުވެރިވެގެން ކޮށްފައިވާ މަސައްކަތަކަށް ނުވެފައި އެއީ އެއޮފީހުން ހަރަދުކުރުމަށް ބަޖެޓު ކޮށްފައި ފައިސާ އެއް ނޫން ކަމަށެވެ. އެސަބަބުތަކާހުރެ އެހަރަދަކީ ދައުލަތުގެ މާލިއްޔަތު ގަވާއިދާ ހިލާފަށް ކޮށްފައިވާ ހަރަދެއްކަމަށް އޮޑިޓް ރިޕޯޓުގައި ބުނެފައި ވެއެވެ.

އޮޑިޓް ރިޕޯޓުގައި އިތުރަށް ބުނެފައިވަނީ ޕޭމަންޓް ވައުޗަރުގައިވާ 156133.24 ރުފިޔާއަކީ ބޮސްކާލިސްގެ ބާރޖު ސަރަހައްދީ ބަނދަރު ބޭނުންކުރުމުގެ ޗާރޖަށް ދައްކަން ޖެހުނު ފައިސާއެއް ކަމަށް އޮތްނަމަވެސް، އެވައުޗަރާ ގުޅިގެން ފައިސާ ދެއްކި ކުޅުދުއްފުށީ ރީޖަނަލް ޕޯރޓުގެ އިންވޮއިސްގައި ބައެއް އަމިއްލަ ކުންފުނިތަކުގެ އުޅަނދުފަހަރު، ބަނދަރު ބޭނުންކުރުމުން ދައްކަންޖެހުނު ފައިސާވެސް އެ އިންވޮއިސްގައި ހިމަނާފައިވާކަމަށެވެ.

ކުޅުދުއްފުށީ ރީޖަނަލް ޕޯޓުގެ އިންވޮއިސްގައި ރާއްޖޭގެ ބައެއް އަމިއްލަ ކުންފުނިތަކުގެ އުޅަނދުފަހަރު، ބަނދަރު ބޭނުންކުރުމުން ދައްކަންޖެހުނު ފައިސާ ހިމަނާފައިވާތީ އެންޓިކޮރަޕްޝަން ކޮމިޝަން މެދުވެރިކޮށް އެމައްސަލަ އިތުރަށް ތަހުގީގު ކުރެއްވުމަށް އޮޑިޓް ރިޕޯޓުގައި އޮޑިޓަރ ޖެނެރަލް ލަފާ ދެއްވާފައި ވެއެވެ. އަދި މިމައްސަލައިގައި މާލިއްޔަތު ގަވާއިދާ ހިލާފަށް ހަރަދުކޮށްފައިވުމުން އެކަމުގައި އިހުމާލުވާ ފަރާތްތަކާމެދު ފިޔަވަޅު އެޅުމަށްވެސް އޮޑިޓަރ ޖެނެރަލް ލަފާދެއްވާފައި ވެއެވެ.

އިއްޔެ ނެރުނު ހޯމް މިނިސްޓްރީގެ 2010 ވަނަ އަހަރުގެ އޮޑިޓް ރިޕޯޓުގައި ކުރީގެ ޕުރޮވިންސް އޮފީހުން ގަވާއިދާ ހިލާފަށް ކޮށްފައިވާ ގިނަ ކަންތައްތަކެއް ފާހަގަކޮށްފައި ވެއެވެ. އަދި ކުރީގެ ސްޓޭޓް މިނިސްޓަރާއި ހއ އަތޮޅު ކޯޑިނޭޓަރގެ މައްޗަށް ކުރެވޭ ކޮރަޕްޝަންގެ މައްސަލައެއްގައި ދައުވާކުރުމަށް އޭސީސީ އިން ވަނީ ޕީޖީ އޮފީހަށް ފޮނުވާފައި އެވެ.