ކުޅުދުއްފުށީގައި ފުޓްބޯޅަ ކޯޗިން ކޭމްޕެއް ބާއްވަނީ

މުހައްމަދު އިސްމާއީލް

ކުޅުދުއްފުށީ ކައުންސިލްއާއި ކުޅުދުއްފުށީ ޕޮލިސް އަދި ރަށުގެ ކްލަބް ޖަމިއްޔާތަކާއި ގުޅިގެން ޒުވާނުންނަށް އަމާޒުކޮށްގެން ފުޓްބޯޅަ ކޯޗިން ކޭމްޕެއް ބާއްވަން ނިންމައިފި އެވެ.

މިމަހުގެ 26 ން އަންނަ ސެޕްޓެމްބަރ މަހުގެ 7 ވަނަ ދުވަހާ ހަމައަށް ބާއްވަން ހަމަޖެހިފައިވާ މި ކޯޗިން ކޭމްޕުގައި އިރުޝާދު ދެއްވާނީ ރާއްޖޭގެ ފުޓްބޯޅައިގެ މައިދާނުގައި އުފެދުނު އެންމެ މޮޅު އެއް ކުޅުންތެރިޔާ ކަމުގައިވާ މަޝްހޫރު ކޯޗު މޫސާ މަނިކު (ކުޑަ މޫސަ) އެވެ.

މި ކޯޗިން ކޭމްޕްގައި ސްކޫލު ކުދިންނާއި އަންހެނުންނަށް ވެސް ބައިވެރިވެވޭނެ ކަމަށް ކޯޗިން ކޭމްޕް ރޭވުމުގައި ހަރަކާތްތެރިވާ އޮފިޝަލެއް މައުލޫމާތު ދެއްވައެވެ. ކޯޗިން ކޭމްޕް ކުރިއަށްދާނީ ކޮންމެ ބައެއް ވެސް ވަކިން ކަމަށް އޮފިޝަލް ވިދާޅުވި އެވެ.

ކޯޗިން ކޭމްޕުގައި ބައިވެރިވުމުގެ މިހާރު ހުޅުވާލާފައި ވާއިރު ބައިވެރިވުމަށް އެދި ހުށަހަޅާ ފޯމް ކުޅުދުއްފުށީގައި ހުންނަ ޒޯން ސްޓޭޑިއަމް އިން ލިބެން ހުންނާނެ ކަމަށް ރަށު ކައުންސިލް އިދާރާއިން މައުލޫމާތު ދެއެވެ.

ކޯޗިން ކޭމްޕްގައި އެސިސްޓެންޓުންގެ ގޮތުގައި ހަރަކާތްތެރިވާން ބޭނުންވާ ފަރާތްތަކަށް އެކަމަށް އެދި ހުށަހެޅުމުގެ ފުރުޞަތުވެސް ވަނީ ހުޅުވާލާފައި އެވެ. ކުޅުދުއްފުށީ ފުލުހުންގެ އިސްނެގުމަކަށް ކުރިއަށް ގެންދާ މި ކޯޗިން ކޭމްޕް ފުރިހަމަ ކުރާ ފަރާތްތަކަށް ސެޓްފިކެޓެއް ދޭނެ ކަމަށް އޮފިޝަލް ވިދާޅުވި އެވެ.

ކޯޗިން ކޭމްޕްގައި ބައިވެރިވާން އެދޭ ފަރާތްތަކުން މިމަހުގެ 23 ވަނަ ދުވަހު ކައުންސިލް އިދާރާއަށް ފޯމު ހުށަހަޅަން ޖެހެއެވެ.