ކުޅުދުއްފުށީ ރީޖަނަލް ހޮސްޕިޓަލްގެ ލޯންޗެއް ފެލިވަރު ކައިރިން އެކްސިޑެންޓް ވެއްޖެ

.

ބަދުރުއްދީން ޙަސަން

ކުޅުދުއްފުށީ ރީޖަނަލް ހޮސްޕިޓަލްގެ ލޯންޗެއް މާލެއިން ފުރައިގެން ކުޅުދުއްފުއްޓަށް ދަތުރު ކުރަމުން ދަނިކޮށް އެހެން ލޯންޗެއްގައި ޖެހި އެކްސިޑެންޓް ވެއްޖެއެވެ.

ރީޖަނަލް ހޮސްޕިޓަލް އިން އައިޖީއެމްއެޗް އަށް ރެފަރ ކުރި ބަލިމީހެއް ގޮވައިގެން މިއަދު ހެނދުނު މާލެ އައި ލޯންޗް، މިއަދު ހަވީރު 4:30 ގައި ފުރައިގެން ކުޅުދުއްފުއްޓަށް ދަތުރު ކުރަމުން ދަނިކޮށް އެކްސިޑެންޓް ވެފައިވަނީ މިރޭ 7:15 ހާއިރު ޅ. އަތޮޅު ފެލިވަރު ކައިރިންނެވެ.

މިހާދިސާ ހިނގިއިރު ހޮސްޕިޓަލްގެ ލޯންޗްގައި ތިބީ ކެޕްޓަނާއި ފަޅުވެރިން އެކަންޏެވެ. ހޮސްޕިޓަލްގެ ލޯންޗްގައި ތިބި އެއްވެސް މީހަކަށް އަނިޔާ ވެފައެއް ނުވެއެވެ. ނަމަވެސް ލޯންޗުގައި ޖެހުނު ކުޑަ ލޯންޗުގައި އިން އެކަކުގެ އަނގަމަތި ފަޅައިގެން ދިޔައެވެ. އަދި އެހެން މީހަކަށް ވެސް ކޮންމެވެސް ވަރަކަށް އަނިޔާވިކަމަށް މަޢުލޫމާތު ލިބިފައިވެއެވެ.

ހޮސްޕިޓަލްގެ އޮފިޝަލެއް ކުޅުދުއްފުށީ އޮންލައިން އަށް މަޢުލޫމާތު ދެއްވަމުން ވިދާޅުވީ، ލޯންޗް ޖެހިފައިވަނީ ދަތުރު ކުރަމުން ދަނިކޮށް އެއްފަރާތުން އައި ވޭލަރު ވައްތަރުގެ ކުޑަ ލޯންޗެއްގައި އެވެ. ނަމަވެސް އެކްސިޑެންޓް ވުމުން އެލޯންޗް ވަނީ މަޑުނުކޮށް ގޮސްފައިކަމަށް އޮފިޝަލް މަޢުލޫމާތު ދެއްވިއެވެ.

ލޯންޗްގެ ކެޕްޓަންއާ ހަވާލާދީ އޭނާ އިތުރަށް ވިދާޅުވީ، ލޯންޗް އެކްސިޑެންޓްވެ ދިޔަވާން ފެށުމުން ފެލިވަރު ފަޅުތެރެއަށް ވަނީ ކަމަށެވެ. މިހާރު ލޯންޗު އޮތީ ފެލިވަރު ފަޅުތެރޭގައި އެވެ. މިހާރު އެމްއެންޑީއެފްގެ ފަޔަރ އެންޑް ރެސްކިއު ގެ އެހީތެރިކަމާއެކު ލޯންޗުން ދިޔަ ހިއްކުމުގެ މަސައްކަތް އަންނަނީ ކުރަމުންނެވެ.

މިރޭ އެކްސިޑެންޓްވި ހޮސްޕިޓަލްގެ ލޯންޗަކީ އާއްމުކޮށް ކުޅުދުއްފުށީ ރީޖަނަލް ހޮސްޕިޓަލް އާއި ހދ. މަކުނުދޫ ސިއްހީ މަރުކަޒާ ދެމެދު ދަތުރު ކުރުމަށް ބޭނުންކުރާ ލޯންޗެކެވެ. ހޮސްޕިޓަލްގައި އާއްމުކޮށް ބޭނުންކުރާ ލޯންޗް މިވަގުތު މަރާމާތު ކުރަމުން ދާތީ، މަކުނުދޫ އާދެމެދު ދަތުރު ކުރާ ލޯންޗް މިހާރު އާއްމުކޮށް ބޭނުންކުރަމުން ދެއެވެ.