ރައީސާއި ނައިބު ރައީސްގެ މަގާމުގެ މުއްދަތު ހަމަވުމުން ކައުންސިލް ވަގުތީ ގޮތުން ހިންގާނެ ފަރާތެއް ކަނޑައަޅައިފި

ހދ އަތޮޅު ކައުންސިލުގެ ރައީސާއި ނައިބު ރައީސްކަމުގެ މަގާމުގެ މުއްދަތު ހަމަވެފައިވާތީ، އެމަގާމަށް މެމްބަރަކު އައްޔަން ކުރެވެންދެން، ކައުންސިލް ހިންގުން ހދ ހަނިމާދޫ ދާއިރާގެ މެމްބަރު މުހައްމަދު ޤާސިމްއާ ހަވާލުކޮށްފި އެވެ.

ހދ އަތޮޅު ކައުންސިލުން މައުލޫމާތު ދޭ ގޮތުގައި، ކައުންސިލުން އެގޮތަށް ނިންމާފައިވަނީ އެކައުންސިލުގެ ގަވާއިދުގައި ރައީސާއި ނާއިބު ރައީސްގެ ކަމުގެ މަގާމުގެ މުއްދަތަކީ އެއް އަހަރު ކަމަށް ވެފައި މިހާރު ތިއްބެވި ރައީސާއި ނައިބު ރައީސްގެ މަގާމުގެ މުއްދަތު ހަމަވުމުން ނެވެ.

ކައުންސިލުން މިގޮތަށް ނިންމީ، ގަވާއިދުގައި ބުނާ އެއްއަހަރު ހަމަވެގެން ދިޔައިރުވެސް ރިޔާސަތުން ގަވާއިދާ އެއްގޮތަށް އަމަލުކޮށްފައި ނުވާތީ، ކައުންސިލުގައި ކުމުންދޫ ދާއިރާ ތަމްސީލުކުރައްވާ މެމްބަރު ޒަކަރިއްޔާ ހަސަން ހުށަހެޅި ކުއްލި މައްސަލައަކަށް ބަހުސް ކުރުމަށްފަހު 7 ކައުންސިލަރުންގެ އިއްތިފާގުންނެވެ. އެ ނިންމުމުގައި ވަނީ ކައުންސިލުގެ ރައީސާއި ނާއިބު ރައީސްކަމުގެ މަގާމުގެ ގާނޫނީ ހައިސިއްޔަތު ގެއްލިފައިވާ ކަމަށެވެ. އަދި އެގޮތުން އެ ދެމަގާމަށް އަލުން މެމްބަރަކު އިންތިހާބު ކުރެވެންދެން ކައުންސިލް ހިންގުން ހަނިމާދޫ ދާއިރާގެ ކައުންސިލް މެމްބަރާ ހަވާލުކުރުމަށެވެ.

މިހާތަނަށް ކައުންސިލުގެ ރައީސް ކަމުގައި ހުންނެވީ ކުޅުދުއްފުށީ އުތުރު ދާއިރާއަށް ނިސްބަތްވާ ކައުންސިލަރ މުހައްމަދު ޝުކޫރެވެ. ނައިބު ކަމުގެ މަގާމުގައި ހަނިމާދޫ ދާއިރާގެ ކައުންސިލަރ މުހައްމަދު ގާސިމެވެ. އެދެ ބޭފުޅުން އެމަގާމުތަކަށް އިންތިހާބު ކޮށްފައިވަނީ މިދިޔަ އަހަރުގެ ޖުލައި މަހުގެ 21 ވަނަ ދުވަހު އެވެ.

ހދ އަތޮޅު ކައުންސިލުގެ ހިންގާ ގަވާއިދުގައި ކޮންމެ އަހަރަކު އެއް ފަހަރު ރައީސް އާއި ނައިބު ރައީސް ބަދަލުވާ ގޮތަށް ހަމަޖައްސާފައިވާއިރު އެއީ ލާމަރުކަޒީ ގާނޫނުގައި ވަކި ގޮތެއް ކަނޑައަޅާފައިވާ ކަމެއް ނޫނެވެ. ލާމަރުކަޒީ ގާނޫނުގައި ރައީސާއި ނައިބު ރައީސްކަމުގެ މަގާމުގެ މުއްދަތެއް ކަނޑައަޅާފައެއް ނުވެއެވެ.