ކޯނީގެ ރިޕޯޓާ ގުޅިގެން ސަރުކާރު ގަބޫލު ކުރުމާމެދު ކުޅުދުއްފުށީ ކައުންސިލްގެ ސީދާ ޖަވާބެއް ނެތް!

.

ވެރިކަން ބަދަލުވިގޮތް ބެލުމަށް އުފެއްދި ކޮމިޝަން އޮފް ނެޝަނަލް އިންކުއަރީ (ކޯނީ) އިން، މިހާރުގެ ސަރުކާރަކީ ސައްހަ ސަރުކާރެއް ކަމަށް ނިންމުމާ ގުޅިގެން ކުޅުދުއްފުށީ ކައުންސިލުން މިހާރުގެ ސަރުކާރު ގަބޫލުކުރޭތޯ ސުވާލު ދެންނެވުމުން ކައުންސިލުން އެކަމަށް ސީދާ ޖަވާބެއް ނުދެއްވި އެވެ.

ފެބްރުއަރީ 7 ވަނަ ދުވަހު ދިވެހި ރާއްޖޭގެ ވެރިކަން ބަދަލުވި ގޮތް ތަހުގީގު ކުރުމަށް އުފެއްދި ކޮމިޝަން އޮފް ނެޝަނަލް އިންކުއަރީ (ކޯނީ) އިން، އެދުވަހު ވެރިކަން ބަދަލުވެފައިވަނީ ރައީސުލްޖުމްހޫރިއްޔާ އަށް މަޖުބޫރު ކޮށްގެން ނޫންކަމަށާއި، މިހާރު މިއޮތް ސަރުކާރަކީ ގާނޫނީ ސަރުކާރެއް ކަމަށް ނިންމާފައި ވާތީ، ކުޅުދުއްފުށީ ކައުންސިލްގެ ފަރާތުން ސަރުކާރު ގަބޫލު ކުރަންތޯ ކުޅުދުއްފުށީ އޮންލައިން އިން ސުވާލު ކުރުމުން، ކުޅުދުއްފުށީ ކައުންސިލްގެ ރައީސް އިބްރާހިމް ރަމީޒު ވިދާޅުވީ، އެ ކައުންސިލްގެ ފަރާތުން އެއްވެސް އިރެއްގައި މިސަރުކާރަކީ “ބާޣީ” ސަރުކާރެއް ކަމުގައި ބުނެފައި ނުވާނެ ކަމަށެވެ.

“ކައުންސިލް އިން އެއްވެސް އިރެއްގައި މިއީ ބާޣީ ސަރުކާރެކޭ ބުނެ ނޫސްބަޔާނެއް ނެރެފައެއް ނުވާނެ.” ރަމީޒު ވިިދާޅުވިއެވެ.

މީގެ އިތުރުން ކުޅުދުއްފުށީގެ ތަރައްގީ އަށް މިހާރު ފެށިފައި އަދި ހުއްޓިފައި ހުރި ޕްރޮޖެކްޓްތައް ކުރިއަށް ގެންދިއުމަށް މިސަރުކާރާއެކު މަސައްކަތް ކުރާނަންތޯ ތަކުރާރުކޮށް އެހުމުން ވެސް ކައުންސިލްގެ ރައީސް ވިދާޅުވީ، ހަމަ އެޖަވާބެވެ.

ނަމަވެސް ފެބްރުއަރީ 7 ވަނަ ދުވަހު ދިވެހިރާއްޖޭގެ ވެރިކަން ބަދަލުވި ގޮތާބެހޭގޮތުން ފެބްރުއަރީ 19 ވަނަ ދުވަހު ކުޅުދުއްފުށީ ކައުންސިލުން ވަނީ ނޫސްބަޔާނެއް ނެރެފައެވެ. އެ ނޫސްބަޔާނުގައި، މިމަހުގެ 7 ވަނަ ދުވަހު އިސްތިއުފާ ދެއްވި ކުރީގެ ރައީސް މުހައްމަދު ނަޝީދުގެ ސަރުކާރު ވައްޓާލާފައިވަނީ ބަޣާވާތަކުން ކަމަށާއި އަދި މިހާރު އޮތް ސަރުކާރު ގަބޫލުނުކުރާނެ ކަމަށް ކައުންސިލުން ބުނެފައި ވެއެވެ.

ނޫސްބަޔާނުގައި ބުނެފައިވަނީ 2008 ނޮވެމްބަރު 11 ވަނަ ދުވަހުން ފެށިގެން 5 އަހަރު ދުވަހުގެ މުއްދަތަށް ރާއްޖޭގެ ރައްޔިތުންގެ ވޯޓުގެ އަގުލަބިއްޔަތުން ރާއްޖޭގެ ރައީސުލްޖުމްހޫރިއްޔާ ކަމުގެ މަގާމަށް ހޮވާފައިވަނީ ގ. ކެނެރީގެ މުހައްމަދު ނަޝީދު ކަމަށާއި މިމަހުގެ 7 ވަނަ ދުވަހު ގާނޫނުއަސާސީއާ ހިލާފަށް ދިވެހި ފުލުހުންނާއި އަސްކަރިއްޔާގެ މަދު ބަޔަކާއި ގުޅިގެން ހިންގި ބަގާވާތަކުން ސަރުކާރު ވައްޓާލާފައިވާ ކަމަށެވެ. އަދި މިހާރު އުފެދިފައިވާ ސަރުކާރަކީ ޣައިރު ގާނޫނީ ސަރުކާރެއް ކަމަށް ބުނެފައިވެއެވެ.

އަދި އޭގެ ފަހުން ކުޅުދުއްފުށީ ކައުންސިލުން ނެރުނު ނޫސްބަޔާނެއްގައި، ވެރިކަން ބަދަލުކުރީ ސިފައިންނާއި ފުލުހުންގެ ތެރޭގައި އުޅޭ “މޮޔަކުދިން ކޮޅެއް” ލައްވައި، ދައުލަތުގެ މާލިއްޔަތު އަންބޮނޑިއަށް ލުމަށްޓަކައި ކަމަށް ބުނެފައި ވެއެވެ.

ވެރިކަން ބަދަލުވުމާއި ގުޅިގެން އެމްޑީޕީގެ މެޖޯރިޓީ އޮންނަ ބައެއް ކައުންސިލްތަކުން ސަރުކާރު ގަބޫލުނުކުރާނެ ކަމަށާއި ސަރުކާރަށް އެއްބާރުލުން ނުދެއްވާނެ ކަމަށް ބުނެ ބަޔާންތަކާއި ގަރާރުތައް ނެރެފައި ވެއެވެ. އަދި ކޯނީގެ ރިޕޯޓާއި ގުޅިގެން މާލޭ ސިޓީ ކައުންސިލާއި އައްޑޫ ސިޓީ ކައުންސިލުން ކުރިން ނެރުނު ގަރާރުތައް އަނބުރާ ގެންގޮސް ސަރުކާރަށް އެއްބާރުލުން ދިނުމަށް ވަނީ ނިންމަވާފައި ވެއެވެ.

ކުޅުދުއްފުށީ ކައުންސިލުން މީގެ ކުރިން ވަނީ، މަޖިލީހުގެ މެމްބަރަކު މުޒާހަރާއެއްގައި ބައިވެރިވެފައިވާތީ އެކަން ކުށްވެރިކޮށްވެސް ބަޔާނެއް ނެރެފައި އެވެ.