ބެރިންމަދޫގައި ރިސޯޓު ހަދަން ހަތަރު ފަރާތަކުން ހުށަހަޅައިފި

.

ހއ ބެރިންމަދޫގައި 200 އެނދުގެ ރިސޯޓެއް ހެދުމަށް ހުޅުވާލި ބީލަމަށް ހަތަރު ފަރާތަކުން ޝައުގުވެރިކަން ފާޅުކޮށްފައިވާ ކަމަށް ޓޫރިޒަމް މިނިސްޓްރީ އިން ބުނެފި އެވެ.

ހއ. ބެރިންމަދޫގައި ތަރައްޤީ ކުރާ 200 އެނދުގެ ރިސޯޓު ހެދުމަށް ޝައުގުވެރިކަން ފާޅުކޮށްފައިވަނީ ބޭރުގެ އެއް ފަރާތަކުންނާއި ރާއްޖޭގެ ތިން ފަރާތަކުން ނެވެ. އެހެންނަމަވެސް އެފަރާތްތަކުގެ ނަންތަކެއް އަދި އާންމުކޮށްފައެއް ނުވެއެވެ.

ކުރިން މީހުން ދިރިއުޅުނު ހއ ބެރިންމަދޫއިން މީހުން ބަދަލުކޮށް އެރަށުގައި ރިސޯޓެއް ހަދަން ނިންމި ފަހުން ދެފަހަރެއްގެ މަތިން އެރަށް ބީލަމަށް ލާފައި ވެއެވެ.

2006 ވަނަ އަހަރު ބެރިންމަދޫ މީހުން ހއ. ހޯރަފުއްޓަށް ބަދަލުކުރުމަށްފަހު ޖެހިގެން އައި އަހަރު އެރަށް ވަނީ ރިސޯޓެއްގެ ގޮތުގައި ތަރައްޤީކުރުމަށް ބަޔަކާ ހަވާލުކޮށްފައި އެވެ. އެހެންނަމަވެސް ފަހުން އެރަށުގެ ބަދަލުގައި އެފަރާތަށް އެހެން ރަށެއް ވަނީ ދީފައި އެވެ. ހއ. އަތޮޅުގައި މިހާރު 3 ރިސޯޓް އޮޕަރޭޓް ކުރަމުން އެބަދެއެވެ.