ހަފްތާ ބަންދުގައި ކުޅުދުއްފުށީގައި ދެ މެޑިކަލް ކޭމްޕެއް ހިންގައިފި

.

ނިމިދިޔަ ހަފްތާ ބަންދާ ދިމާކޮށް ކުޅުދުއްފުށީގައި ދެ މެޑިކަލް ކޭމްޕް ހިންގައިފި އެވެ.

މާލެއިން ޑޮކްޓަރުން ގެނެސްގެން ހިންގި މި ދެކޭމްޕުގެ ތެރެއިން އެއް ކޭމްޕަކީ އެސް.އެފް އިންވެސްޓްމަންޓްގެ ފަރާތުން ހިންގި ކޭމްޕެކެވެ.

ސެޕްޓެމްބަރ 14 ވީ ހުކުރު ދުވަހުގެ ރޭ އެސް.އެފް ކުލިނިކުގައި 19:30 ގައި ފެށުނު މިކޭމްޕުގައި 3 ޑަކްޓަރަކު ވަނީ ބަލިމީހުން ބައްލަވާފައެވެ. އެއީ ކުޑަކުދިންގެ ޚާއްސަ ޑަކްޓަރު، ޑރ. އަހުމަދު ސައީދާއި، ކަށީގެ ޑޮކްޓަރު، ޑރ ހުސައިން ފައިސަލް، އަދި ކުޑަކަމުދާ ނިޒާމްގެ ޚާއްސަ ޑަކްޓަރު، ޑރ އަހުމަދު އަޝްރަފެވެ. މިގޮތުން ކުޑަކުދިންގެ ޚާއްސަ ޑަކްޓަރާއި ކުޑަކަމުދާ ނިޒާމްގެ ޚާއްސަ ޑޮކްޓަރަށް ގިނަ އަދަދެއްގެ ބަޔަކު އެޕޮއިންޓްމެންޓު ހަމަޖައްސާފައިވާކަމަށް އެސްއެފްގެ މެނޭޖަރ އަބްދުއްސަލާމް މައުލޫމާތު ދެއްވިއެވެ.

މީގެ އިތުރުން ކުރިން މި ކޭމްޕްގައި ބައިވެރިވުމަށް ހަމަޖެހިފައިވާ ސްކޭނިންގ ޑަކްޓަރު، ޑރ އިބްރާހިމް ރަޝީދު މިވަގުތު ރާއްޖޭގައި ނޫޅުއްވާތީ ބައިވެރި ނުވެވުނު ކަމަށް ސަލާމް އިތުރަށް ވިދާޅުވިއެވެ.

މިފަދަ ކޮންމެ ކޭމްޕަކަށްވެސް ކުޅުދުއްފުށީގެ ރައްޔިތުން ދެއްވާ ތަރުޚީބު ފާހަގަ ކުރައްވާ އަންނަ މަހުވެސް އިތުރު ޑަކްޓަރުންނާއެކު މީގެ އެހެން ކޭމްޕެއް ބާއްވާނެކަމަށް އެސްއެފް އިން ހާމަކުރެއެވެ.

ހަފްތާބަންދުގައި ހިންގި އަނެއް ކޭމްޕް ހިންގާފައިވަނީ މާލޭ މެޑިކަލްސްގެ ފަރާތުންނެވެ. ކުޅުދުއްފުށީ މަތިވަރު ގޭގައި ހިންގި މިކޭމްޕުގައި ބަލިމީހުން ބަލާފައިވަނީ ޑރ. ހައިކަލް އާއި އަންހެނުންގެ ޑޮކްޓާރ ދިޕާލީ އާއި ދަތުގެ ޑޮކްޓަރު ޖޮޖީ ސެލްވަރާޖް އެވެ.