ހދ. އަތޮޅު ކައުންސިލުން ކުމުންދޫ ރައްޔިތުންނާއި ބައްދަލުކޮށްފި

ހދ އަތޮޅު ކައުންސިލްގެ ފަރާތުން ހދ އަތޮޅު ކުމުންދޫގެ ރައްޔިތުންނާއި ބައްދަލުކޮށްފި އެވެ.

މިހަފްތާގެ އާދީއްތަ ދުވަހުގެ ރޭ، ކުމުންދޫ ސްކޫލްގެ ގޯތިތެރޭގައި އޮތް މިބައްދަލުވުމާބެހޭ ގޮތުން ކައުންސިލުގެ ނައިބު ރައީސް ވިދާޅުވީ، ބައްދަލުވުމުގެ މައިގަނޑު މަޤްޞަދަކީ ލާމަރުކަޒީ ޤާނޫނުން ކައުންސިލަށް ލާޒިމް ކުރާ މައުލޫމާތުތައް ރައްޔިތުންނަށް ފޯރުކޮށްދިނުން ކަމަށެވެ.

މިނޫހަށް މައުލޫމާތު ދެއްވަމުން އަތޮޅު ކައުންސިލްގެ ނައިބް ރައީސް ވިދާޅުވީ، މިބައްދަލުކުރުމުގައި ކައުންސިލުން މިހާރު ކުރަމުންދާ މަސައްކަތްތަކާއި ރޭވިފައިވާ ކަންތައްތަކާއި، ދިމާވާ ގޮންޖެހުންތަކާއި އަދި އަތޮޅު ކައުންސިލަރުން މާލެއަށް ކުރި ޒިޔާރަތުގެ މައުލޫމާތު ރައްޔިތުންނާއި ހިއްސާކޮށްފައިވާނެ ކަމަށެވެ.

ވޭތުވެދިޔަ އެމް.ޑީ.ޕީގެ ސަރުކާރުން ހދ އަތޮޅު އޮތީ ވަރަށް ބޮޑަށް އެކަހެރިކޮށް އިހުމާލުވެފައިކަން ފާހަގަކުރައްވަމުން ޒަކަރިއްޔާ ތަކުރާރުކޮށް ވިދާޅުވީ ކުމުންދޫގެ ރައްޔިތުން ތިބީ ވަރަށް ބޮޑަށް މާޔޫސް ވެފަ ކަމަށާއި އެބޭފުޅުންގެ ފަރާތުން އެއްވެސް އެދެވޭ ސުވާލެއް އަމާޒުވެފައި ނުވާކަމަށެވެ.

“ހދ އަތޮޅުގެ ކަމެއްނަމަ ސަރުކާރުން ވަރަށް ބޮޑަށް ފަހަތުފަޔަށް ބުރަވޭ. އެހެންވީމާ ލާމަރުކަޒީ ޤާނޫނު ނަގަހައްޓަން ވަރަށް އުނދަގޫވޭ.” ނައިބު ރައީސް ވިދާޅުވިއެވެ.

މި ބައްދަލުކުރެއްވުމުގައި ކުމުންދޫގެ ނެރުގެ މައްސަލަ ހައްލުކުރުމަށްޓަކައި ކުރަމުން އަންނަ މަސައްކަތާއި ބެހޭގޮތުން ހައުސިން މިނިސްޓްރާއެކު ކުރެވުނު މަޝްވަރާތައް ރައްޔިތުންނާ ހިއްސާކޮށްފައި ވެއެވެ. އަދި ފަތުރުވެރިކަމުގެ ދާއިރާއިން ހދ އަތޮޅު އޮތީ ވަރަށް ފަހަތުގައި ކަމަށް ވިދާޅުވެ އެކަން ބަދަލުކުރުމަށް ކައުންސިލުން މަސައްކަތް ކުރައްވާނެ ކަމަށް ކައުންސިލުގެ ރައީސް ހުސައިން ރަޝީދު އެބައްދަލުވުމުގައި ވިދާޅުވެފައިވާ ކަމަށް ކައުންސިލުން މައުލޫމާތު ދެއެވެ.

އަތޮޅު ކައުންސިލުން ކުމުންދޫއަށް ކުރެއްވި ދަތުރުގައި، ކުމުންދޫ ރަށު ކައުންސިލާއި، ޞިއްޙީ މަރުކަޒު އަދި ސްކޫލުގެ އިސްވެރިންނާ ވަކިވަކިން ބައްދަލުކުރައްވައި، އެތަންތަނުގައި މިވަގުތު ހުރި ދަތިތައް އޮޅުން ފިލުއްވައި، އެކަންކަމާބެހޭގޮތުން މަޝްވަރާކުރެއްވި ކަމަށް ހދ އަތޮޅު ކައުންސިލުން މައުލޫމާތު  ދެއްވައި އެވެ.

ކުމުންދޫގެ ގިނަ އަދަދެއްގެ ރައްޔިތުން ބައިވެރިވި މި ބައްދަލުކުރުމުގައި އަތޮޅު ކައުންސިލްގެ ރައީސް އާއި ނައިބްރައީސް ހިމެނޭ ގޮތަށް 4 މެމްބަރުން ވަނީ ބައިވެރިވެފައެވެ. މީގެ އިތުރު ބައްދަލުކުރުންތަކެއް ރާވަމުންދާ ކަމަށާއި، ކުޅުދުއްފުށީގެ ރައްޔިތުންނާއި ވަރަށް އަވަހަށް ބައްދަލުކުރައްވާނެ ކަމަށް އަތޮޅުކައުންސިލުން މައުލޫމާތު ދެއްވައެވެ.

ހދ އަތޮޅު ކައުންސިލުގެ ވަފްދެއް މިމަހުގެ ތެރޭ މާލެއަށް ޒިޔާރަތްކޮށް ސަރުކާރުގެ ބައެއް އިސް އޮފިޝަލުންނާ ވަނީ ބައްދަލުކުރައްވާފައި އެވެ.