ހަނު ހުރުމުގެ ހައްޤުގެ އުޞޫލުތައް ކަނޑައެޅުމުގެ ބިލްއެއް ރައްޔިތުންގެ މަޖިލީހަށް ހުށަހަޅައިފި

.

ގާނޫނުއަސާސީން ލިބިދޭ ހަނުހުރުމުގެ ހައްޤުގެ އުޞޫލުތައް ކަނޑައެޅުމުގެ ބިލްއެއް ކުޅުދުއްފުށީ ދެކުނު ދާއިރާގެ މެމްބަރު މުހައްމަދު ނަޝީދު ރައްޔިތުންގެ މަޖިލީހަށް ހުށަހަޅުއްވައިފި އެވެ.

މެމްބަރު މުހައްމަދު ނަޝީދު ހުށަހެޅުއްވި މި ބިލުގެ މަޤުޞަދެއްކަމަށް އެ ބިލްގައި ބުނެފައިވަނީ، ގާނޫނުއަސާސީގެ 48 ވަނަ މާއްދާގެ ނ އިން ލިބިދޭ ހަނުހުރުމުގެ ހައްގުގެ މަފްހޫމް އެކަށައަޅައިދިނުމާއި، ގާނޫނުއަސާސީގެ 51 ވަނަ މާއްދާގެ ނ އިން ލިބިދޭ ތިމާއާ ދެކޮޅަށް ޝަރީއަތުގައި ބަޔާނެއް ނުދިނުމުގެ ހައްގުގެ މަފްހޫމް އެކަށައަޅައި ދިނުން ކަމަށެވެ. އަދި، ހަނުހުރުމުގެ ހައްޤުގެ ދާއިރާގެ ތެރޭގައި ހިމެނޭ ކަންކަމާއި ނުހިމެނޭ ކަންކަން ބަޔާންކޮށްދިނުމާއި ތިމާއާ ދެކޮޅަށް ޝަރީއަތުގައި ބަޔާނެއް ނުދިނުމުގެ ހައްޤުގެ ދާއިރާގެ ތެރޭގައި ހިމެނޭ ކަންކަމާއި ނުހިމެނޭ ކަންކަން ބަޔާންކޮށްދިނުމަކީވެސް މިބިލްގެ މަގްޞަދެއްކަމަށް ބުނެފައި ވެއެވެ.

މިހާރު މަޖިލީހަށް ހުށަހަޅާފައިވާ މި ބިލާ ބެހޭ ގޮތުން ކުޅުދުއްފުށީ ދެކުނު ދާއިރާ ތަމްސީލް ކުރައްވާ މެމްބަރު އެބޭފުޅާގެ އަމިއްލަ ބްލޮގްގައި ވިދާޅުވެފައިވަނީ، ހަނުހުރުމުގެ ޙައްޤާއި ޝަރީޢަތުގައި ތިމާއާ ދެކޮޅަށް ބަޔާނެއް ނުދިނުމުގެ ޙައްޤާ މި ދެ ޙައްޤު، ރާއްޖެއަށް ތަޢާރުފުވީ ދާދިފަހުން ޤާނޫނުއަސާސީގެ ފެންވަރުގައި އެކަނިކަމަށާއި، ރާއްޖޭގައި ކަމާގުޅޭ ގޮތުން ދިވެހިބަހުން ފެންނަންއޮތް ފޮތެއް، ދިރާސާއެއް، ލިޔުމެއް، ނުވަތަ އެ ޙައްޤާގުޅޭ ޤާނޫނީ ފިޤުހުގެ އެހީތެރިކަމެއް ނެތް ކަމަށެވެ. އަދި، އެ ދެ ހައްޤަކީ ރާއްޖޭގައި އުފެދިގެންއައި ޙައްޤަކަށް ނުވާތީ، އެ ޙައްޤު އުފެދި ބޭނުންކުރެވެމުން އަންނަގޮތުގެ ތާރީޚެއް ނުވަތަ އާދައެއް ދިވެހިންގެ ތެރެއަކު ނެތްކަމަށް ނަޝީދު ވިދާޅުވެފައި ވެއެވެ.

ނަޝީދު ހުށަހެޅުއްވި ބިލް ފާސްވެ ގާނޫނަކަށް ވެއްޖެނަމަ އެއީ،  ހަނުހުރުމުގެ ޙައްޤާއި ތިމާއާ ދެކޮޅަށް ޝަރީޢަތުގައި ބަޔާނެއް ނުދިނުމުގެ ޙައްޤުގެ ޤާނޫނީ އުސޫލުތަކާއި، އެ ދެ ޙައްޤު ބޭނުންކުރެވޭ ގޮތާއި، އެ ދެ ޙައްޤުގެ ތެރޭގައި ހިމެނިގެންވާ ކަންކަން އެ ދެ ޙައްޤު ބޭނުންކުރާ މީހުންނަށާއި، ތަޙްޤީޤީ އިދާރާތަކަށާއި، ދަޢުވާގެ އިދާރާތަކަށާއި، ޝަރުޢީ އިދާރާތަކަށް ދެނެގަތުމަށް ފަސޭހަވެގެންދާނެ ކަމެއް ކަމަށް ވިދާޅުވެފައި ވެއެވެ. ނަޝީދު ވިދާޅުވީ މިބިލްގެ ސަބަބުން އެ ދެ ޙައްޤާމެދު އެ ހުރިހާ ފަރާތްތަކަކުންވެސް، އެއްފޮތަކުން، އެއް ލޮލަކުން، ބެލުމަށް މަގުފަހިވާނެ ކަމަށެވެ.

“ހަނުހުރުމުގެ ހައްޤާއި ތިމާއާ ދެކޮޅަށް ބަޔާނެއް ނުދިނުމުގެ ހައްޤަކީ، ގާނޫނުއަސާސީން ކަށަވަރުކޮށްދޭ އަސާސީ ދެ ހައްޤަށްވާއިރު، އެ ދެ ހައްޤު ގާނޫނުއަސާސީން ތައާރަދުކުރުމާ ހަމައަށްވެސް އަދި އޭގެ ފަހުންވެސް، އެ ދެ ހައްޤުގެ މަފްހޫމާއި އިލްމާއި ފިޤްހު ދިވެހިރާއްޖޭގައި ދިވެހިބަހުން ދެނެގަނެވޭނެ ގޮތެއް ނެތުމުން، އެ ދެ ހައްޤުގެ ތައުރީފާއި މުހިއްމުކަމާއި އެ ދެ ހައްޤުގެ ތެރޭގައި ހިމެނިގެންވާ ކަންކަމާއި ހިމެނިގެންނުވާ ކަންކަން ސާފުކޮށް ބަޔާންވެގެންވާ ގާނޫނީ ޝަރުޢީ މަސްދަރެއް ނެތުމުން ދިމާވާ ދަތިތައް ހައްލުކޮށް، އެ ދެހައްގުގެ މާނައާއި ދާއިރާއާއި ހާލަތް ގާނޫނެއްގައި ތަފްސީލުކޮށް ބަޔާންވެގެންވުމީ ދިވެހި ގާނޫނީ ޝަރުޢީ ނިޒާމަށް މުހިއްމު ކަމެއްކަމަށް ގަބޫލުކުރެވުން” ބިލް މަޖިލީހަށް ހުށަހެޅި ސަބަބެއްކަމަށް ނަޝީދު އެ ބިލުގައި ލިޔެފައިވެއެވެ.