އިހަވަންދޫގައި ހަދަމުންދާ ބަނދަރުގެ މަސައްކަތް އެރަށުގެ ރައްޔިތުން ނުކުމެ ހުއްޓުވައިފި

.

ހއ. އިހަވަންދޫގައި އެމް.ޓީ.ސީ.ސީ އިން ހަދަމުންދާ ބަނދަރުގެ މަސައްކަތް ރަށުގެ ގިނައަދަދެއްގެ ރައްޔިތުންތަކެއް ނުކުމެ ހުއްޓުވައިފި އެވެ.

މީގެ ދެދުވަހެއްވަރު ކުރިން ރައްޔިތުން ނުކުމެ ބަނދަރުގެ މަސައްކަތް ހުއްޓުވާލާފައި މިވަނީ ބަނދަރު ހެދުމަށް ކުރިން އޮތް ޕްލޭނާއި ޚިލާފަށް މަސައްކަތް ކުރަމެން ގެންދިޔުމުގެ ސަބަބުން ކަމަށް އިހަވަންދޫ އިން ވާހަކަ ދެއްކި މީހަކު ވަނީ ބުނެފައެވެ.

މިކަމާ ގުޅިގެން އިހަވަންދޫ ކައުންސިލްގެ ރައީސް މުހައްމަދު ސަމީރު މިނޫހަށް މައުލޫމާތު ދެއްވަމުން ވިދާޅުވީ، ރައްޔިތުންގެ ތެރެއިން ގިނަ ބަޔަކު އެތައް ފަހަރެއްގެ މަތިން ކައުންސިލާ ބައްދަލުކޮށް މިކަމާމެދު ކަންބޮޑުވުން ފާޅުކޮށްފައިވާ ކަމަށާއި، ސީދާ ހަރަކާތަކަށް ނުކުންނަން ޖެހިދާނެ ކަމުގެ އިންޒާރު ރައްޔިތުން ދީފައިވާ ކަމަށެވެ.

“ކުރިން އޮތް ޕްލޭނަށް އެއްްވެސް ބަދަލެއް ގެންނާނެކަމެއް ކައުންސިލަށް އަންގާފައެއްނުވޭ. މިކަން އެނގުނު ހިސާބުން ފެށިގެން ސަރުކާރުގެ ސަމާލުކަމަށް އަޅުގަނޑުމެން މިކަން ގެނައިން. އެހެން ނަމަވެސް މިނިސްޓްރީން އެއްވެސް އެދެވޭ ޖަވާބެއް އަޅުގަނޑުމެންނަކަށް ނުލިބޭ.” ސަމީރު ވިދާޅުވިއެވެ.

1300 ފޫޓް 250 ފޫޓްގެ މި ބަނދަރު ހެދުމުގައި ބަޖެޓްގެ ދަތިކަން ހުރިކަމަށް ބުނެ ބަނދަރަށް އެއްވެސް ޕްރޮޓެކްޝަނެއް ނޯންނަގޮތަށް، މަދުހިލަތަކެއް ގެނެސް ފަސޭހަ ގޮތަކަށް މިކަންކުރަން ރައްޔިތުން ބޭނުން ނުވާކަން ރައީސް ފާހަގަ ކުރެއްވިއެވެ.

ބަނދަރު ސަރަހައްދުގައި އަލިކަމެއް ނެތްކަމަށާއި، އެސަރަހައްދާއި 50 ފޫޓަށް ވުރެ ދުރުނޫން ހިސާބެއްގައި ގެތައް އިމާރާތް ކުރެވިފައިވާ ސަމީރު އިތުރަށް ވިދާޅުވިއެވެ.

ކުރިން ހަމަޖެހިފައިވާގޮތުން މިމަހުގެ ތެރޭގައި މަސައްކަތް ނިމޭނެ ކަމަށް އޮތް ނަމަވެސް، މަސައްކަތް ހުއްޓުވިފަހުން އެއްވެސް ކަމެއް އެސަރަހައްދުގައި ކުރައަށް ގެންގޮސްފައެއް ނުވެއެވެ. އަލުން މަސައްކަތް ފެށޭނެ ދުވަހެއް ބުނަން ނޭނގޭ ކަމަށް ކައުންސިލުން މައުލޫމާތު ދެއްވައެވެ.