ރަށްރަށުގައި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށް ކުރިމަތިލުމުގެ ފުރުޞަތު ހުޅުވާލައިފި

.

ރަށްރަށުގައި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށް މެމްބަރުން އިންތިޚާބު ކުރުމަށްޓަކައި ބާއްވާ އިންތިޚާބަށް ކުރިމަތިލުމުގެ ފުރުޞަތު ހުޅުވާލައިފި އެވެ.

މި އަހަރުގެ ނޮވެމްބަރު މަހުގެ 7 ވަނަ ދުވަހު އޮންނަ އިންތިޚާބަށް ކުރިމަތިލުމުގެ ފުރުޞަތު އެލްޖީއޭގެ އިއުލާނަކުން ޤައުމީ ފެންވަރެއްގައި ހުޅުވާލިއިރު، ކުޅުދުއްފުށީ ކައުންސިލުން ވެސް މިއަދު ވަނީ އެފުރުޞަތު ހުޅުވާލާފައެވެ. މި އިންތިޚާބަށް ކުރިމަތި ލުމުގެ އެންމެ ފަހުގެ ތާރީޚަކީ މިއަންނަ އޮކްޓޯބަރު މަހުގެ 9 ވަނަ ދުވަހެވެ.

ކުޅުދުއްފުށީގެ އާބާދީގެ ނިސްބަތުން ބަލާއިރު އަންހެނުންގެ ތަރައްޤީއަށް މަސައްކަތްކުރާ ކޮމިޓީއަށް ހޮވަންޖެހެނީ 9 މެމްބަރުންނެވެ. މި އިންތިޚާބުގައި ސިޔާސީ ޕާޓީތަކުގެ ނަމުގައި އެއްވެސް ފަރާތަކަށް ކުރިމައްޗެއް ނުލެވޭނެއެވެ.

މި އިންތިޚާބަކީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނުގެ 35 ވަނަ މާއްދާ އާއި 57 ވަނަ މާއްދާގެ ދަށުން ކައުންސިލްތަކުގެ ބެލުމުގެ ދަށުގައި އުފައްދަންޖެހޭ ކޮމިޓީ އެކެވެ.