ޕީޕީއެމްގެ ކުޅުދުއްފުށީ ގޮފީގެ އިންތިހާބު ފެށިގެން ކުރިއަށްދަނީ

.

ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ކުޅުދުއްފުށީ “އަސުރުމާ ގޮފީގެ” ހިންގާ ކޮމިޓީއަށް މެމްބަރުން ހޮވުމަށް ބާއްވާ އިންތިހާބުގެ ވޯޓުލުން މިއަދު ކުޅުދުއްފުށީގައި ފެށިއްޖެ އެވެ.

ކުޅުދުއްފުށީ “އާހަމަ” ގޭގައި މިއަދު މެންދުރު 2 ޖެހިއިރު ފެށުނު ވޯޓްލުން މިރޭގެ 9 ޖެހުމާއި ހަމައަށް ކުރިއަށްދާނެ ކަމަށް ޕީޕީއެމް އިން މައުލޫމާތު ދެއެވެ.

މި އިންތިޚާބުގައި އަސުރުމާގޮފީގެ ރައީސް ކަމަށް ކުރިމަތިލާފައިވަނީ 3 މެމްބަރުންނެވެ. އެއީ، އާވެލި، މުހައްމަދު އަލީ، މުހައްމަދު މޫސާ ،ފަސްތަރި، އަދި ރަޝާދު ހަސަން ،އާހަމަ އެވެ.

ނައިބު ރައީސް ކަމަށް ކުރިމަތިލާފައިވަނީ އަލީ ހުސައިން ރޯޝަނީގެ، އިބްރާހިމް އަހުމަދު ފުޅަފި، އަބްދުއްސައްތާރު ހަސަން ސިގްނަލް އަދި އަލީ އިބްރާހިމް އަބަދަށްފެހި އެވެ.

މީގެ އިތުރުން ޚަޒާންދާރުގެ މަޤާމަށް 3 މީހުން ކުރިމަތިލާފައިވާއިރު، ރަޖިސްޓްރާ ގެ މަޤާމަށް 2 މީހުން ވަނީ ކުރިމަތިލާފައެވެ.  ސެކެޓްރީގެ މަޤާމަށް ކުރިމަތިލާފައިވަނީ އެކަކު ކަމުން އެފަރާތް ވަނީ ވޯޓްލުމަކާއި ނުލާ އިންތިޚާބް ވެފައެވެ. މީގެ އިތުރުން ޒުވާނުންގެ މެމެބަރުކަމަށް 3 މީހުން އަދި އަންހެނުންގެ މެމްބަރުކަމަށް 7 މީހަކު މިއިންތިޚާބުގައި ވާދަކުރެއެވެ.

ރާއްޖޭގައި 17533 މީހުން ޕީޕީއެމެގައި ރަޖިސްޓްރީ ވެފައިވާއިރު، ކުޅުދުއްފުށީގައި ރަޖިސްޓްރީވެފަވާ ޕީޕީއެމްގެ 1200 އަށް ވުރެ ގިނަ މީހުން އެބަތިއްބެވެ.