ވިލާ ކޮލެޖަށް ބައިނަލްއަޤްވާމީ އެވޯޑެއް ލިބިއްޖެ

.

ވިލާ ކޮލެޖަށް ކޮލިޓީ އެންޑް އިނޮވޭޝަން އިން ބިޒްނަސް އިނިޝިއޭޓިވް އެވޯޑް ލިބިއްޖެ އެވެ.

ވިލާ ކޮލެޖަށް މި  އެވޯޑް ލިބިފައިވަނީ މިދިޔަ އާދިއްތަ ދުވަހު ސްވިޒަލޭންޑްގެ ޖެނީވާގައި ބޭއްވުނު 37 ވަނަ ބިޒްނަސް އިނިޝިއޭޓިވް ޑައިރެކްޝަންސް ކޮންވެންޝަންގައެވެ.

ބިޒްނަސް އިނިޝިއޭޓިވް ޑައިރެކްޝަންސްގެ ރައީސް މރ ޖޯސް އީ ޕްރިއެޓޯ ވިލާ ކޮލެޖާއި ހަވާލުކުރެއްވި މި އެވޯޑާ ވިލާ ގެ ފަރާތުން ހަވާލުވެލެއްވީ އެ ކޮލެޖްގެ ރެކްޓަރ ޑރ. އަހުމަދު އަންވަރެވެ.

ޖެނީވާގެ ކޮންޓިނެންޝަލް ހޮޓެލްގައި ބޭއްވުނު މިހަފްލާގައި ވިލާ ކޮލެޖަށް ލިބިފައި މިވަނީ ގޯލްޑް ކެޓަގަރީއިން “އިންޓަރނޭޝަނަލް ސްޓަރ ފޯރ ކޮލިޓީ އެވޯޑެވެ”.

ބިޒްނަސް އިނިޝިއޭޓިވް ޑައިރެކްޝަންސްއަކީ ފެންވަރު ދެމެހެއްޓުމާއި އުފެއްދުންތެރި ދާއިރާ ތައް ތައާރަފް ކުރާ މުއައްސަސާތައް ފާހަގަކުރާ ބައެކެވެ. އެހެންކަމުން މިއެވޯޑްގެ ސަބަބުން ކުރިއަށް އޮތް ދެއަހަރު މިފަރާތުގެ އެއްބާރުލުން ވިލާ ކޮލެޖަށް ލިބިގެންދާނެ އެވެ. އަދި އައި އެސް އޯ ގެ ކޮލިޓީ މިންގަނޑުތަކާއި ހަމައަށް ވާސިލްވުމަށް އެހީތެރިވެދޭނެއެވެ.

މިއެވޯޑް ލިބިފައިވާ މަޝްހޫރު ފަރާތްތަކުގެ ތެރޭގައި މިވަގުތު ހުރި އެންމެ ދިގު އިމާރާތް ކަމަށްވާ ” ބާރޖް ޚަލީފާ” ބިނާކުރެއްވި ޓާރނާ ކޮންސްޓްރަކްޝަންސްއާއި، ހައުސިން ޑެވެލޮޕްމެންޓް ކޯޕަރޭޝަނާއި އިންޑިޔާގެ ތެޔޮ ކޯޕަރޭޝަނާއި އަދިވެސް ދުނިޔޭގެ މަޝްހޫރު ފަރާތްތައް ހިމެނެއެވެ.

މިއަހަރުގެ މި ހަފްލާގައި ތިރީހަށްވުރެ ގިނަ ޤައުމުގެ ފާހަގަކޮށްލެވޭ ކުންފުނިތަކުގެ އިސްވެރިން ބައިވެރިވެފައި ވެއެވެ.