ދިވެހިބަހުގެ އެކަޑަމީގެ “ތިލަދުންމަތީ ފޮތް މައުރަޒު” ރޭ ފެށިއްޖެ

.

 

ދިވެހިބަހުގެ އެކަޑަމީގެ “ތިލަދުންމަތީ ފޮތް މައުރަޒު” ރޭ ކުޅުދުއްފުށީގައި ފެށިއްޖެ އެވެ.

ހދ އަތޮޅު ތައުލީމީ މަރުކަޒުގެ ރިސޯސެންޓަރުގައި ރޭ 8:30 ގައި ފެށުނު މި މައުރަޒް ހުޅުއްވައިދެއްވީ ޝަރަފުވެރި މެހެމާނު ޤައުމީ ޔުނިވަރސިޓީގެ ލެކްޗަރަރ މުހައްމަދު އުމަރެވެ. މިއީ ދިވެހިބަހުގެ އެކަޑަމީ އާއި ކުއްލިއްޔަތުއް ދިރާސާތުލް އިސްލާމިއްޔާ އަދި ސެންޓަރ ފޯރ ކޮންޓިނިއުއިންގ އެޑިޔުކޭޝަނާއި ހދ އަތޮޅު ކައުންސިލް ގުޅިގެން ބާއްވާ މައުރަޒެކެވެ.

މައުރަޒު ހުޅުވުމުގެ ރަސްމިއްޔާތުގައި ޝަރަފްވެރި މެހެމާނު ވިދާޅުވީ، ތަނެއް ތަރައްޤީވެ ކުރިއަރައިދާނީ އެތަނެއްގައި ދިރިއުޅޭ ބައެއްގެ ޢިލްމާއި، ހުނަރއިާ، ފިކުރުގެ ތަހުޒީބުގެ ސަބަބުން ކަމަށާއި، ތަރައްޤީ ދިރުވެންއޮތް އެންމެ ރަނގަޅު އެއް ވަޞީލަތަކީ މުޖުތަމަޢުގައި ކިޔުންތެރިކަމުގެ ޘަޤާފަތެއް އަށަގެންނެވުން ކަމަށެވެ. އެހެންކަމުން މި މައުރަޒްގެ ބޭނުން އެންމެ ފުރިހަމަ އަށް ހިފުމަށް ޝަރަފުވެރި މެހެމާނު ނަސޭހަތްތެރިވެލެއްވި އެވެ. މި ހުޅުވުނު ފޮތް މައުރަޒަކީވެސް ކުޅުދުއްފުށީގެ ތަރައްޤީގެ ޕްލޭނެއް ފަދަ ކަމެއް ކަމަށް މުހައްމަދު އުމަރު ވިދާޅުވިއެވެ.

މިރަސްމިއްޔާތުގައި، ދިވެހި ބަހުގެ އެކަޑަމީގެ ރައީސް، އަޝްރަފް ޢަލީ ވިދާޅުވީ މިފޮތް މައުރަޒުގެ އެންމެ ބޮޑު މަޤުޞަދަކީ މާލެއެކޭ އެއްފަދައިން އަތޮޅު ތަކުގެ ރައްޔިތުންނަށްވެސް، ދިވެހި ބަހުގެ ޤަވާޢިދާ އަދަބިއްޔާތާއި ތާރީޚާ ގުޅުންހުރި ފޮތްތައް ފަސޭހަކަމާއެކު ހެޔޮއަގުގައި ލިބޭނެ އިންތިޒާމް ހަމަޖައްސައި ދިނުން ކަމަށެވެ. ފޮތް ކިޔުމުގެ މުހިއްމުކަމުގެ މައްޗަށްވެސް އެކަޑަމީގެ ރައީސް ވާހަކަދެއްކެވި އެވެ.

މިރަސްމިއްޔާތުގައި ހދ އަތޮޅު ތަޢުލީމީ މަރުކަޒުގެ ދަރިވަރުން ވަޒަން  ބަހުރުވައިގެ ތަފާތު ހުށަހެޅުންތަކެއް ވަނީ ހުށަހަޅައި ދީފައެވެ.

މިމައުރަޒް މާދަމާ ރޭގެ 11 ޖަހަންދެން ކުރިއަށް ދާނެއެވެ. ކޮންމެ އަހަރަކުވެސް މަދުވެގެން އެއް ފޮތް މައުރަޒު އަތޮޅު ތަކުގައި ބޭއްވުމަށް ދިވެހި ބަހުގެ އެކަޑަމީން މިހާރު ވަނީ ނިންމާފައި އެވެ.