އަމީރު އަމީން ސްކޫލުން މަސައްކަތު ދުވަހެއް ފާހަގަކޮށް ބައިލައްކައެއްހާ ރުފިޔާ ހޯދައިފި

ކުޅުދުއްފުށީގެ ޕްރީ ސްކޫލެއްކަމަށްވާ އަމީރު އަމީން ސްކޫލުން އިއްޔެ މަސައްކަތު ދުވަހެއް ފާހަގަކޮށް ބައިލައްކައެއްހާ ރުފިޔާ ހޯދައިފިއެވެ.

އިއްޔެ ހެނދުނު ކުރިއަށް ގެންދިޔަ މި ހަރަކާތުގައި އެ ސްކޫލުން ވަނީ 49606 ރުފިޔާ ހޯދާފައެވެ. އަދި މިހަރަކާތުގައި އަމަލީ ގޮތުން ބައިވެރި ނުވެވޭ ބެލެނިވެރިންނަށް ސްކޫލަށް ފައިސާ ދިނުމަށް ހުޅުވާލި ފުރުޞަތުގައި 2925 ރުފިޔާވަނީ ލިބިފައެވެ. މަސައްކަތު ދުވަހުގެ ހަރަކާތުން އިއްޔެއާ ހަމައަށް ލިބިފައިވަނީ 46681 ރުފިޔާއެވެ.

ސްކޫލުގެ ޕީޓީއޭއިން ހިންގި މިހަރަކާތުގެ މައިގަނޑު މަޤްޞަދަކީ ސްކޫލުގެ އޭވީ ސިސްޓަމް އިތުރަށް ހަރުދަނާ ކުރުމާއި އަންނަ އަހަރު ދަރިވަރުންނަށް އެންމެ އެކަށީގެންވާ ގޮތުގައި ޚިދުމަތްތައް ފޯރުކޮށްދިނުމަށް ތަކެތި ހޯދައިދިނުން ކަމަށް އެ ސްކޫލުން މައުލޫމާތު ދެއްވައެވެ.

އަމީރު އަމީން ސްކޫލަކީ ކުޅުދުއްފުށީގައި ހުރި އެންމެ ގިނަދުވަސްވީ އެއް ސްކޫލެވެ.