މާރާމާރީއާ ގުޅިގެން 4 މީހަކު ހައްޔަރުކޮށްފި

ކުޅުދުއްފުށީގައި ރޭ ހިންގި މާރާމާރީއާ ގުޅިގެން 4 މީހަކު ހައްޔަރުކޮށްފި އެވެ.

ފުލުހުން ބުނީ މިމައްސަލައިގައި ހައްޔަރުކޮށްފައިވަނީ 22 އަހަރުގެ މީހަކާއި 20 އަހަރުގެ މީހެއްގެ އިތުރުން 19 އަހަރުގެ ދެމީހުން ކަމަށެވެ.

ފުލުހުން ބުނީ މި އެންމެން ހައްޔަރުކޮށްފައިވަނީ ހޯމަ ދުވަހުގެ ރޭ ކުޅުދުއްފުށީ ބަރާބަރު ފިހާރަ ކައިރީ ހުންނަ ހޮޅުއަށީގައި އިން މީހެއްގެ ގައިގައި ތަޅައި މާރާމާރީ ހިންގިކަމުގެ ތުހުމަތުގައި ކަމަށެވެ. އަދި މާރާމާރީ ހުއްޓުވަން އެތަނަށް ދިޔަ ދެ މީހެއްގެ ގައިގައި ތަޅައި މާރާމާރީ ހިންގިކަމުގެ ތުހުމަތުވެސް އެމީހުންގެ މައްޗަށް ކުރެވޭކަމަށް ފުލުހުން ބުނެފައިވެއެވެ.

ކުޅުދުއްފުށީ ޕޮލިސް ސްޓޭޝަނުން މި މައްސަލަ  ތަހުގީގުކުރަމުން  އަންނައިރު މިމައްސަލައިގައި ހިމެނޭ އެއްވެސް ފަރާތެއްގެ ނަމެއް ފުލުހުން އާންމުކޮށްފައެއް ނުވެއެވެ.

ކުޅުދުއްފުށި އޮންލައިންއަށް އެނގިފައިވާ ގޮތުގައި މިމާރާމާރީގައި އަނިޔާވެފައިވަނީ ކުޅުދުއްފުށީ މޫމިޔާގެ އާސިފް އަހުމަދު އަށެވެ. މާރާމާރީގައި އޭނާގެ ބޮލަށް ލިބުނު އަނިޔާއަށް ރޭ ކުޅުދުއްފުށީ ހޮސްޕިޓަލުން ފަރުވާ ހޯދާފައި ވެއެވެ.