ދުވަސްތަކަކަށްފަހު ހދ އޭއީސީ އަށް ޕްރިންސިޕަލަކު ހަމަޖައްސައިފި

ހދ އަތޮޅު ތައުލީމީ މަރުކަޒުގައި ޕްރިންސިޕަލަކު ނެތި ގިނަ ދުވަސްތަކެއް ވުމަށްފަހު އެ ސްކޫލަށް އާ ޕްރިންސިލެއް ހަމަޖައްސައިފި އެވެ.

ތިލަދުންމަތީގައި ހުރި އެންމެ ބޮޑު އަދި އެންމެ ދުވަސްވީ އެއް ސްކޫލް އަށް އަލަށް ގުޅުނު ޕްރިންސިޕަލް ޒިޔާދު ރަޝާދު ވިދާޅުވީ، އެ ސްކޫލާމެދު ވަރަށް ހިތްޕުޅު ހަމަޖެހިވަޑައިގަންނަވާ ކަމަށެވެ.

“ސްކޫލާ ދޭތެރޭ އަޅުގަނޑު ވަރަށް ހިތްހަމަޖެހޭ. ހުރިހާ މުއައްޒަފުން ވެސް ވަރަށް އެކުވެރި.” ޅ. ހިންނަވަރަށް އުފަން ޒިޔާދު ރަޝާދު ވިދާޅުވި އެވެ.

ޒިޔާދު ވިދާޅުވީ އަހަރު ނިމުމާއި ދާދި ގާތްވެފައިވާއިރު، މިއަހަރު އިތުރު ކަންތައްތަކެއް ރާވާ ހިންގުމުގެ ފުރުޞަތު ހަނި ވެފައި ވީނަމަވެސް އަންނަ 2013 ވަނަ އަހަރު ގިނަ ކަންތައްތަކެއް ކުރުމަށް ވިސްނަވާފައިވާ ކަމަށެވެ.

އޭއީސީ ގައި މިހާރު ބޭނުން ކުރެވެމުންދާ ހޯލަކީ ތަނާއި އެކަށީގެން ނުވާ ހޯލެއްކަން ޒިޔާދު ވިދާޅުވި އެވެ. އަދި އިއްޔެ ރަށު ކައުންސިލަށް އެބޭފުޅާ ކުރެއްވި ޒިޔާރަތުގައި ސްކޫލުގެ އެކަމާމެދު މަޝްވަރާ ކުރެއްވި ކަމަށް ވިދާޅުވިއެވެ.

ޕްރިންސިޕަލެއް ނެތި ގާތްގަނޑަކަށް 3 މަސް ދުވަސް ހޭދަކޮށްފައިވާއިރު މި ސްކޫލުގައި މިހާރު ދަނީ 695 ދަރިވަރުން ތައުލީމް ހާސިލްކުރަމުންނެވެ.