ކެފޭތަކަށާއި ފިހާރަތަކަށް 24 ގަޑިއިރު ހިދުމަތްދިނުމަށް ދޫކޮށްފައިވާ ހުއްދަތައް ބާތިލް ކޮށްފި

ސައުވީސް ގަޑިއިރު ހުޅުވައިގެން ހިދުމަތްދޭ ވިޔަފާރިކުރާ ތަންތަނަށް ދޫކޮށްފައިވާ ހުއްދަތައް ވަގުތީ ގޮތުން ބާޠިލް ކޮށްފި އެވެ.

ޓްރޭޑް މިނިސްޓްރީން މިއަދު ނެރުނު އިއުލާނެއްގައި ބުނެފައިވަނީ މާދަމާއިން ފެށިގެން އެފަދަ ތަންތަނަށް ދީފައިވާ ހުއްދަތައް ބާތިލްކޮށްފައިވާ ކަމަށެވެ. އަދި އިތުރު ފަރާތްތަކަށް ހުއްދަ ދޫކުރުންވެސް ހުއްޓާލާފައިވާ ކަމަށް އެމިނިސްޓްރީން ބުނެއެވެ.

ސައުވީސް ގަޑިއިރު ހިދުމަތްދޭ ތަންތަނަށް ދީފައިވާ ހުއްދަ ބާޠިލުކޮށްފައި މިވަނީ ގައުމުގެ ސަލާމަތަށާއި ރައްކާތެރިކަމަށް މިހާރުން މިހާރަށް އެޅުމަށް ސަރުކާރުން ކަނޑައަޅާފައިވާ ހާއްސަ ފިޔަވަޅެއްގެ ގޮތުންނެވެ.

މިގޮތަށް ނިންމުމާ ގުޅިގެން މިހާރު ހިދުމަތް ދެވޭނީ ފަތިހު 5:00 އާއި ރޭގަނޑު 11:00 އާދެމެދު އެވެ. އަދި ސައިހޮޓާ ފަދަ ތަންތަން މެންދަމު 1:00 ޖެހުމާ ހަމައަށެވެ. އެނޫން ގަޑިތަކުގައި އެފަދަ ވިޔަފާރިތައް ކުރުމަކީ މަނާކަމެއްކަމަށް ޓްރޭޑް މިނިސްޓްރީން މިއަދު ނެރުނު އިއުލާނުގައި ބުނެފައި ވެއެވެ.