މޫދަށް އެރެވޭނެ ސަރަހައްދެއް ޤާއިމް ކޮށްދެއްވުމަށް ކައުންސިލްގެ ރައީސް ސްވިމިންގ އެސޯސިއޭޝަންގެ ރައީސްގެ އަރިހުން އެދިވަޑައިގެންފި

.

ކުޅުދުއްފުށީގައި މޫދަށް އެރެވޭނެ ޚާއްސަ ސަރަހައްދެއް ޤާއިމް ކޮށްދެއްވުމަށް ކައުންސިލްގެ ރައީސް ސްވިމިންގ އެސޯސިއޭޝަންގެ ރައީސްގެ އަރިހުން އެދިވަޑައިގެންފިއެވެ.

ކައުންސިލްގެ ރައީސް އިބްރާހިމް ރަމީޒް މިކަމަށް އެދިވަޑައިގަތީ ސްވިމިން އެސޯސިއޭޝަނުން މިމަހުގެ 4 އިން 18 ގެ ނިޔަލަށް ބޭއްވި ފަތަން ދަސްކޮށްދޭ އިންސްޓްރަކްޓަރުން ތަމްރީން ކުރާ ކޯސް ނިންމުމަށް ރޭ ޤައުމީ އިދާރާގެ ހޯލުގައި ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.

މިރަސްމިއްޔާތުގައި ސްވިމިންގ އެސޯސިއޭޝަންގެ ރައީސް މުހައްމަދު ކަލީމް ދެއްކެވި ވާހަކާގައި މި ޕްރޮގްރާމުން ބައިވެރިންނަށް ދަސްވި ބައިތައް އެހެން ފަރާތްތަކަށް ފޯރުކޮށްދެއްވުމަށް ނަސޭހަތްތެރިވި އެވެ.

ރޭގެ މިރަސްމިއްޔާތުގައި ބައިވެރިންނަށް ސެޓްފިކެޓް ބައްސަވާދެއްވީ ސްވިމިންގ އެސޯސިއޭޝަންގެ ރައީސް އެވެ. މިތަމްރީން ޕްރޮގްރާމް ނިންމި 19 ބައިވެރިއަކު ވަނީ މިރޭ ސެޓްފިކެޓް ހާސިލްކޮށްފައެވެ.