އަފީފުއްދީން ސްކޫލުގެ ގްރޭޑް 1 ގެ ދަރިވަރުންގެ “ފަން ޑޭ” ކޭމްޕް ބާއްވައިފި

.

އަފީފުއްދީން ސްކޫލުގެ ގްރޭޑް 1ގެ ދަރިވަރުންގެ “ފަން ޑޭ” ކޭމްޕް މިއަދު އެސްކޫލުގައި ބާއްވައިފި އެވެ.

މިއަދު ހެނދުނު ފެށި މި ދުވަހުގެ މައިގަނޑު މަޤްޞަދަކީ ކިޔެވުމުގެ މާހައުލުގައި ނުކުރެވޭ ކަންތައްތައް ދަރިވަރުން ލައްވާ ކުރުވުމާއި، އަމިއްލަ ތަޖުރިބާ ހޯދަން ދަސްކޮށްދިނުމާއި، އެހެން ކުދިންނާއި ގުޅިގެން އުޅެން ދަސްކޮށްދިނުން ކަމަށް ސްކޫލުގެ ޕްރިންސިޕަލް އާދަމް މޫސާ ވިދާޅުވި އެވެ.

މިއަދު ކުރިއަށް ދިޔަ ފަން ޑޭ ގެ ހަރަކާތްތަކުގައި، މިއަދު ހެނދުނު، ގޭގައިކުރާ މަސައްކަތްތައްވަނީ ދަރިވަރުންނަށް ދައްކާލާފައެވެ. މިގޮތުން ރޮށި ފިހުމާއި، މަސްކެނޑުމާއި، ރިހަ ފުނޑުމާއި، ބޮނބި ތެޅުމާއި، އެއްޗެހި ދޮވުމާއި، އިސްތިރިކުރުމާއި، ދަރު ފެޅުން ފަދަ މަސައްކަތްތައް ދަރިވަރުން ވަނީ ތަޖްރިބާކޮށްފައެވެ. މިއީ މިކުދިންގެ ދިވެހި ފޮތުގައި ހިމެނޭ ބައިތަކުގެ ތެރެއިން ބައެއް ކަމަށް އެ ސްކޫލުގެ ޕްރިންސިޕަލް މިނޫހަށް މައުލޫމާތު ދެއްވަމުން ވިދާޅުވި އެވެ.

މީގެ އިތުރުން ދޫނި ގެންގުޅޭ ގެއަކަށާއި މަސް ގެންގުޅޭ ގެއަކަށް އެ ދަރިވަރުން މިއަދު ދާނެ ކަމަށް ސްކޫލުން މައުލޫމާތު ދެއެވެ. އެގޮތުން ތަފާތު ވައްތަރުގެ މަސް ބަލާލުމަށް ދަރިވަރުން ޒިޔާރަތް ކުރާނީ “ލައިޓް ހައުސް”ގެ އަށެވެ. އަދި ދޫނި ބަލާލުމަށް ޒިޔާރަތް ކުރުމަށް ހަމަޖެހިފައިވަނީ “ކަރިޝްމާ”ގެ އަށެވެ. މީގެ އިތުރުންވެސް ބަނދަރު ސަރަހައްދަށް ދަރިވަރުން ޒިޔާރަތް ކުރުމަށް ހަމަޖެހިފައިވާ ކަމަށް ވެސް އެ ސްކޫލުން ބުންޏެވެ.

މިއަދު މި ބޭއްވި ފަން ޑޭ އަކީ ކުރިން މިމަހުގެ 18 ވަނަ ދުވަހަށް ޝެޑިއުލް ކޮށްފައިވާ ހަރަކާތެކެވެ.  މިއަދުގެ މި ފަން ޑޭގައި ގްރޭޑް 1ގެ 51 ދަރިވަރުން ވަނީ ބައިވެރިވެފައެވެ.