ހަކުރު ބަލީގެ ދުވަސް ފާހަގަ ކުރުމަށް ކުޅުދުއްފުށީގައި ހިނގާލުމެއް ބާއްވައިފި

.

ދުނިޔޭގެ ހަކުރު ބަލީގެ ދުވަސް ފާހަގަކުރުމުގެ ގޮތުން ޑައިބެޓީސް ސޮސައިޓީ އޮފް މޯލްޑިވްސް އިން އިންތިޒާމްކޮށްގެން ބާއްވަމުންގެންދާ ހިނގާލުން މިއަދު ކުޅުދުއްފުށީގައި ބާއްވައިފި އެވެ.

“ހަކުރުބައްޔަށް ފިޔަވަޅެއް” މިނަމުގައި ކުރިއަށްގެންދާ ހިނގާލުން ކުޅުދުއްފުށީގައި ފެށިފައިވަނީ މިއަދު ހެނދުނު އަމީރު އަމީން ސްކޫލާދިމާ އަތިރިމަތިންނެވެ. ހެނދުނު މި ހިނގާލުމުގައި ހަކުރުބައްޔާއި ބެހޭގޮތުން ތަފާތު މެސެޖްތަކާއި ޝިއާރުތައް ލިޔެފައިވާ ފޮތިގަނޑުތައް ވަނީ ބޭނުންކޮށްފައެވެ. އަދި ހަކުރުބަލި ޖެހުމަށް މެދުވެރިވާ ސަބަބުތަކާއި އަދި އަލާމާތްތަކާއި ބެހޭ ލުއި މައުލޫމާތު ވަނީ އަޑުގަދަކުރާއިން ރައްޔިތުންނާއި ހިއްސާކޮށްފައެވެ.

ރާއްޖޭގެ މީހުންދިރިއުޅޭ ހުރިހާ ރަށެއްގައި ކުރިއަށްގެންދާ މިހިނގާލުން އެންމެ ފުރަތަމަ ބާއްވާފައިވަނީ މިމަހުގެ 20 ވަނަ ދުވަހު ހއ. ބާރަށުގައެވެ. އަދި މި ހިނގާލުންތަކުގެ އެންމެ ފަހު މަންޒިލެއް ގޮތުގައި ހަމަޖެހިފައިވަނީ ނޮވެމްބަރ 20 ވަނަ ދުވަހު ސ. ފޭދޫ އެވެ.

ގަޑިއެއްގެއިރަށް ކުޅުދުއްފުށީގައި ކުރިއަށްދިޔަ މި ހިނގާލުމުގައި ހޮސްޕިޓަލްގައި މަސައްކަތްކުރާ މުވައްޒަފުން ވަނީ ބައިވެރިވެފައެވެ.

ކުޅުދުއްފުށީ ރީޖަނަލް ހޮސްޕިޓަލްގެ ތަފާސް ހިސާބުތަކުން ދައްކާގޮތުން އެ ހޮސްޕިޓަލްގައި 2010 ވަނަ އަހަރުގެ ނިޔަލަށް 105 މީހުން ވަނީ މިބަލިޖެހިގެން ރަޖިސްޓްރީ ކުރެވިފައެވެ. އަދި ލެބޯޓްރީ ޓެސްޓްތަކުން މަހަކު އެކަކު ދަނީ މިބައްޔަށް ޕޮސިޓިވް ވަމުންނެވެ.

ޑައިބެޓިކްސް ސޮސައިޓީ އޮފް މޯލްޑިވްސްގައި 1240 މީހުން ދަނީ ރަޖިސްޓްރީވެ ފަރުވާ ހޯދަމުންނެވެ. ބައިނަލްއަޤްވާމި ހަކުރުބަލީގެ މީހުންގެ ދުވަހުގެ ގޮތުގައި ފާހަގަކުރަނީ ކޮންމެ އަހަރެއްގެވެސް ނޮވެމްބަރ މަހުގެ 14 ވަނަ ދުވަހެވެ.