އެސްޓީއޯގެ ސާފު ފައިދާ ވަރަށް ބޮޑުތަން އިތުރުވެއްޖެ

ރައްޔިތުންނާއި ސަރުކާރު ހިއްސާވާ ކުންފުނި، އެސްޓީއޯގެ ތިންވަނަ ކުއާޓަރގެ މާލީ ހިސާބުތައް ނެރުނުއިރު ކުންފުނީގެ ފައިދާ ވަރަށް ބޮޑުތަން އިތުރުވެއްޖެ އެވެ.

މިއަހަރުގެ ތިންވަނަ ކުއާޓަރގައި ސާފު ފައިދާގެ ގޮތުގައި އެސްޓީއޯއަށް ވަނީ 104 މިލިޔަން ރުފިޔާ ލިބިފައި އެވެ. މިއަހަރުގެ ދެވަނަ ކުއާޓަރގައި އެކުންފުނީގެ ސާފު ފައިދާގެ ގޮތުގައި ރިޕޯޓް ކޮށްފައިވަނީ 34 މިލިޔަން ރުފިޔާއެވެ. މާލީގޮތުން އެކުންފުންޏަށް މިލިބުނު ކުރިއެރުމާއެކު މިއަހަރުގެ ތިންވަނަ ކުއާޓަރ ނިމުނު އިރު އެކުންފުންޏަށް ވަނީ ޖުމްލަ 181 މިލިޔަން ރުފިޔާ ސާފު ފައިދާގެ ގޮތުގައި ލިބިފައި އެވެ.

އެސްޓީއޯގެ ވިޔަފާރިން އާމްދަނީގެ ގޮތުގައި ތިންވަނަ ކުއާޓަރގައި ވަނީ 1.8 ބިލިޔަން ރުފިޔާ ލިބިފައި އެވެ. އަދި މުދާގަތުމާއި ހިންގުމުގެ ޚަރަދުތައް ކެނޑުމަށްފަހު، 187 މިލިޔަން ރުފިޔާ ވަނީ ހިންގުމުގެ ފައިދާގެ ގޮތުގައި ލިބިފައިއެވެ.

މިއަހަރު މިހާތަނަށް އެސްޓީއޯއިން ވަނީ 5.8 ބިލިޔަން ރުފިޔާގެ ވިޔަފާރިކޮށްފައެވެ.

ނިމިދިޔަ ކުއާޓަރގެ ތެރޭގައި އެސްޓީއޯއިން ވަނީ ވިލިމާލޭގައި ފިހާރައެއް ހުޅުވާފައެވެ. އަދި މާލޭގައި ވަނީ އަތޮޅު ތެރެއިން ގެންނަ ތަރުކާރީ ވިއްކުމަށް އައިލް ފްރެޝް ގެ ފިހާރައެއް ވެސް ހުޅުވާފައެވެ.