ބޭންކް އޮފް މޯލްޑިވްސް އިން އިތުރު 19 އޭޓީއެމް ބަހައްޓަނީ

ބޭންކް އޮފް މޯލްޑިވްސް އިން ކަސްޓަމަރުންނަށް ދޭ ޚިދުމަތުގެ ފެންވަރު ރަނގަޅު ކުރުމުގެ ގޮތުން މުޅިން އާ 19 އޭޓީއެމް ބެހެއްޓުމަށް ނިންމައިފި އެވެ.

ބޭންކް އޮފް މޯލްޑިވްސް އިން ބުނީ މި 19 އޭޓީއެމް މިމަހުގެ ތެރޭގައި ލިބި އޭޓީއެމްތައް ބެހެއްޓުމުގެ މަސައްކަތް ވަރަށް އަވަހަށް ފެށޭނެއެވެ.

ބޭންކުން ހާމަ ކުރާގޮތުގައި މި މަޝްރޫޢުގެ ދަށުން އޭޓީއެމް ބަހައްޓާނެ ތަންތަން ކަނޑައެޅުމުގައި ކަސްޓަމަރުންގެ ޚިޔާލަށް ބަލައި، ބޭންކުން ނިންމާފައިވަނީ މިހާރުދެވޭ ޚިދުމަތުގެ ފެންވަރު ރަނގަޅު ކުރުމަށެވެ. މިގޮތުން އަލަށް ގެނެވޭ ގިނަ އޭޓީއެމް ތައް ބެހެއްޓޭނީ މިހާރުވެސް ޚިދުމަތް ދެވޭ ތަންތަނުގައެވެ. އަަދި އާބާދީ ބޮޑު ބައެއް ރަށްރަށުގައި މި މަޝްރޫޢުގެ ދަށުން އިތުރު އޭޓީއެމް ބެހެއްޓުމަށްވެސް ވަނީ ހަމަޖެހިފައެވެ.

އެންމެ ޒަމާނީ ފެންވަރުގެ މި އޭޓީއެމް ތަކަކީ ދުނިޔޭގެ ފެންވަރުގެ ސަލާމަތީ ފިޔަވަޅުތަކުގެ އިތުރުން މުޅިން

އައު ޚިދުމަތްތަކެއް ތަޢާރަފް ކުރުމުގެ ޤާބިލްކަންވެސްް އެކުލެވޭ މެޝިންތަކެއް ކަމަށް ބޭންކުން ހާމަކުރެއެވެ. މި އާ އޭޓީއެމް ތަކަކީ ދުނިޔޭގައި އޭޓީއެމް އުފެއްދުމުގައި އެންމެ ކުރިއަރާފައިވާ އެއް ކުންފުނިކަމަށްވާ އެމެރިކާގެ ޑީބޯލްޑް ކުންފުނީގެ އުފެއްދުން ތަކެކެވެ.

ބޭންކުން ނެރެފައިވާ ބަޔާނުގައި ބުނާ ގޮތުން މިފަދަ ފެންވަރު ރަނގަޅު އޭޓީއެމް ތަކަކަށް އިންވެސްޓް ކުރުމުގެ ބޭނުމަކީ ބޭންކުން ފޯރުކޮށްދޭ ޚިދުމަތުގެ ފެންވަރު ރަނގަޅުކޮށް ސަލާމާތީ ފިޔަވަޅުތައް ވަރުގަދަ ކުރުމެވެ. ކަސްޓަމަރުންނަށްދޭ ޚިދުމަތުގެ ފެންވަރު ރަނގަޅު ކުރުމުގެ ގޮތުން ބޭންކް އޮފް މޯލްޑިވްސް އިން ދާދިފަހުން ވަނީ މާލޭގައި ބެހެއްޓިފައިވާ ހުރިހާ އޭޓީއެމްއެއްހެން ބަދަލުކޮށް އެންމެ މިޒަމާނުގެ އޭޓީއެމް ބަހައްޓާފައެވެ.

ބޭންކް އޮފް މޯލްޑިވްސް އިން ކުޅުދުއްފުށީ ގައި ބަހައްޓާފައި ހުރި އޭޓީއެމް މިދިޔަ މަހުގެ ތެރޭގައި ހަލާކުވުމާ ގުޅިގެން، އެހެން އޭޓީއެމް އެއް މިހާރު ވަނީ ކުޅުދުއްފުށީގައި އިންސްޓޯލް ކޮށްފައެވެ.