ކުޅުދުއްފުށީގައި ދަނޑުވެރިކަމުގެ ކޯހަކާއި ކައްކަން ދަސްކޮށްދޭ ކޯހެއް ހިންގަނީ

އެސްއެފް އިންވެސްޓްމަންޓްގެ ފަރާތުން ކުޅުދުއްފުށީގައި ދަނޑުވެރިކަމުގެ ކޯހަކާއި ކައްކަން ދަސްކޮށްދޭ ކޯހެއް ހިންގުމަށް ހަމަޖައްސައިފި އެވެ.

މިމަހުގެ 15 އިން ފެށިގެން 12 ދުވަހުގެ މުއްދަތަށް ކުރިއަށް ގެންދާ ދަނޑުވެރިކަމާ ބެހޭ ކޯހުގައި، ގަސްގަހާގެހި ހެދިބޮޑުވުމަށް ބޭނުންވާ އަސާސީ ބައިތަކުން ފެށިގެން ގަސް ހައްދާނެ ގޮތާއި، ގަހަށް ބޭނުންވާ ބޭހާއި، ގަހުގައި އަޅާ ފަނިފަކްސައާއި، ބަލިތައް ދެނެގަންނާނެ ގޮތްތައް ކިޔަވައިދެވޭނެ ކަމަށް އެސްއެފްއިން ބުންޏެވެ.

ދެމެހެއްޓެނިވި ދަނޑުވެރިކަމާއި ބެހޭ މި ކޯހުގައި ކިޔަވައިދެއްވާނީ ދަނޑުވެރިކަމާބެހޭ ތަޖްރިބާކާރެއް ކަމަށްވާ މުހައްމަދު ޔާސިރެވެ. އެސްއެފްއިން މައުލޫމާތު ދެއްވާ ގޮތުގައި ދަނޑުވެރިކަމުގެ ކޯހުގައި ބައިވެރިވުމުގެ ފީ އަކީ 1500 ރުފިޔާ އެވެ.

އެސްއެފްގެ ފަރާތުން ކުރިއަށް ގެންދިއުމަށް ހަމަޖެހިފައިވާ ކައްކާ ކޯސް ބޭއްވުމަށް ހަމަޖެހިފައިވަނީ މިމަހުގެ 15 އިން ފެށިގެން 10 ދުވަހުގެ މުއްދަތަށެވެ. މިކޯހުގައި ކިޔަވައިދެއްވާނީ މަޝްހޫރު ކެއްކުންތެރިޔާ ނަޒީހް އަބްދުލް ޤަފޫރު ކަމަށް އެސްއެފް އިންވެސްޓްމަންޓް އިން ބުންޏެވެ. 1700 ރުފިޔާގެ މި ކޯސް ނިމުމުން ކެއްކުމުގެ މުބާރާތެއް ބޭއްވުމަށްވެސް ވަނީ ހަމަޖެހިފައެވެ.

އެސްއެފް އިން ބުނިގޮތުގައި މި ދެ ކޯހުގެ އިތުރުން ފަހާ ކޯހުގެ އިތުރު ބުރެއް އަންނަ ޑިސެމްބަރ ގައި ބޭއްވުމަށްވެސް އެސްއެފްއިން ދަނީ ރާވަމުންނެވެ. އެއީ އެޑްވާންސް އަދި ބޭސިކް ފަހާ ކޯހާއި ފެޝަން ޑިޒައިނިން ކޯހެކެވެ. އެސްއެފް އިން ބުނިގޮތުގައި ކޮންމެ ކޯހެއްވެސް ހިންގުމަށް ހަމަޖެހިފައިވަނީ މަދުވެގެން 20 ބައިވެރިން ނަންނޯޓް ކޮށްފައިވާނަމައެވެ.

އެސްއެފް އިންވެސްޓްމަންޓްގެ ފަރާތުން ކުޅުދުއްފުށީގައި ގިނަ ކޯސްތަކެއް ހިންގަމުން އަންނައިރު އެތަނުގެ ފަރާތުން ފެންވަރު ރަނގަޅު ޑޮކްޓަރުންގެ ޓީމުތައް ކުޅުދުއްފުއްޓަށް ގެނެސް މެޑިކަލް ކޭމްޕްތައް ވެސް އަންނަނީ ބާއްވަމުން ނެވެ.