މާލޭ މެޑިކަލްސްގެ ހެލްތް ކޭމްޕްތަކެއް ކުޅުދުއްފުށީގައި ފަށަނީ

މާލޭ މެޑިކަލްސްގެ ހެލްތް ކޭމްޕްތަކެއް ކުޅުދުއްފުށީގައި ބޭއްވުމަށް ހަމަޖައްސައިފި އެވެ.

މިގޮތުން ދަތުގެ ފަރުވާއަށް ޚާއްސަ ކޭމްޕް ބޭއްވުމަށް ހަމަޖެހިފައިވަނީ މާދަމާއިން ފެށިގެން މިމަހުގެ 12 ގެ ނިޔަލަށެވެ. މަތިވަރު ގޭގައި ކުރިއަށްދާ މި ކޭމްޕްގައި ފަރުވާ ދެއްވާނީ މާލޭ މެޑިކަލްސް އަދި ޓްރިވެންޑްރަމްގެ އޮމެގާ ޑެންޓަލް ކްލިނިކްގެ ޑެންޓަލް ސަރޖަން ޑރ. ޖޯޖީ ސެލްވަރާޖެވެ. ދެއްވާ ފަރުވާތަކުގެ ތެރޭގައި ދަތްއުފުރުން، ފުޓުނިއެޅުން، ދަތް ސާފްކުރުން، ރޫޓްކެނަލް ޓްރީޓްމެންޓް، ނަރުގަނޑު އެޅުވުމާއި ބާރުކުރުން، ދޫރި އެޅުވުން، ދަތްޖެހުން، ދަތްޕިލަހެދުން ހިމެނޭ ކަމަށް މާލޭ މެޑިކަލްސް އިން މައުލޫމާތު ދެއެވެ.

މީގެ އިތުރުން ލޮލުގެ ފަރުވާދޭ ޚާއްސަ ކޭމްޕެއް ބޭއްވުމަށްވެސް މާލޭ މެޑިކަލްސްއިން ވަނީ ނިންމާފައި އެވެ. މިމަހުގެ 10 ން  12 ގެ ނިޔަލަށް ކުރިއަށްދާ މިކޭމްޕްގައި ފަރުވާ ދެއްވާނީ ޓްރިވެންޑްރަމްގެ ވާސަން އައިކެއަރ ހޮސްޕިޓަލްސް ލޮލުގެ ބަލިތަކަށް ޚާއްސަ ޑޮކްޓަރ ޑރ އަސްގަރް އައްބާހާއި އޮޕްޓޮމެޓްރިސްޓް އެމް. ސެލްތިލް ކުމާރެވެ.

މާލޭ މެޑިކަލްސް އިން ބުނިގޮތުގައި، މިކޭމްޕްގައި ފަރުވާދެއްވާ ބަލިތަކުގެ ތެރޭގައި ލޯ ފުސްވުން، ލޯ ރަތްވުން، ލޮލުން ފެން ނުވަތަ މަޑުއައުން ހިމެނެއެވެ. މީގެ އިތުރުން ހަކުރުބައްޔާއި ލޭ މައްޗަށް ދިޔުން ފަދަ ބަލިތަކުގެ ސަބަބުން ލޮލަށް ލިބޭ ގެއްލުންތަކާއި ، ލޮލުގެ އޮޕްރޭޝަން ކުރައްވާފައިވާ ބޭފުޅުން ރިވިއު ކުރެއްވުމާއި މިފަދަ ޕްރޮސީޖަރ ތައް ހަދަން ބޭނުންވާ ފަރާތްތައް ސްކްރީން ކުރުންވެސް ހިމެނެއެވެ. އަދި ނަންބަރު ނެގުމާއި ލެންސް ހެއްދުމާއި، އައިނު ހެއްދުންވެސް މިކޭމްޕްގައި ކުރިއަށްދާނެެ ކަމަށް އެފަރާތުން މައުލޫމާތު ދެއެވެ.

މާލޭ މެޑިކަލްސް ގެ މި ކޭމްޕަކީ ހއ، ހދ އަދި ށ އަތޮޅުގެ ރައްޔިތުންނަށް އަމާޒްކޮށްގެން ހިންގާ ސިއްހީ ހިދުމަތްދޭ ކެމްޕް ތަކުގެ ތެރެއިން ކޭމްޕެކެވެ. ފަހަކަށް އައިސް ކުޅުދުއްފުށީގައި މިފަދަ ކޭމްޕްތައް ވަރަށް ގިނައިން ބާއްވަމުން އާދެއެވެ.