އެންއައިސީޔޫގެ މަސައްކަތް ޖެނުއަރީމަހު ނިމޭނެ: ކުޅުދުއްފުށީ ހޮސްޕިޓަލް

ކުޅުދުއްފުށީ ރީޖަނަލް ހޮސްޕިޓަލުގައި ހަދަމުންދާ ނިއޯނެޓަލް އިންޓެންސިވް ކެއަރ ޔުނިޓް (އެންއައިސީޔޫ) އާއި އެ ހޮސްޕިޓަލުގައި މިހާރު ހުރި އައިސީޔޫގެ ޖާގަ ބޮޑުކުރުމުގެ މަސައްކަތް އަންނަ ޖެނުއަރީ މަހު ނިންމާލެވޭނެ ކަމަށް އެ ހޮސްޕިޓަލުން ބުނެފި އެވެ.

ކުޅުދުއްފުށީ ހޮސްޕިޓަލުގެ އެންއައިސީޔޫގެ މަސައްކަތް ފަށާފައިވަނީ މިއަހަރުގެ ޖުލައި މަހުގެ ތެރޭގައި އެވެ. އެތަނުގެ މަސައްކަތް ނިމި ހިދުމަތް ދެވެން ފެށުމުން ރައްޔިތުންނަށް ވަރަށް ބޮޑެތި ފަސޭހަތަކެއް ވެގެންދާނެ ކަމަށް އެ ހޮސްޕިޓަލުން ބުންޏެވެ. އަލަށް ހަދާ އެންއައިސީޔޫ ހުންނާނީ މިހާރު އެ ހޮސްޕިޓަލުގައި ހުރި ނާސަރީއާ ވަކިންނެވެ.

ކުޅުދުއްފުށީ ހޮސްޕިޓަލުގެ އޮފިޝަލަކު ވިދާޅުވީ އެ ހޮސްޕިޓަލުގައި މިހާރު ބޭނުންކުރަމުން އަންނަ ދެ އެނދުގެ އައިސީޔޫގެ ޖާގަ ބޮޑުކުރުމުގެ މަސައްކަތް ނިމުމުން 6 އެނދުގައި ބަލިމީހުންނަށް ފަރުވާ ދެވޭނެކަމަށެވެ. އައިސީޔޫގެ ޖާގަ ބޮޑުކުރުމުގެ މަސައްކަތްވެސް ޖެނުއަރީމަހުގެ ތެރޭގައި ނިންމާލެވޭނެކަމަށް އެ އޮފިޝަލް ވިދާޅުވި އެވެ.

އަދި އޭގެ އިތުރުން ކައިޓާރސް އިޓާލިއާނާގެ އެހީގެ ދަށުން ކުޅުދުއްފުށީ ހޮސްޕިޓަލަށް ލިބިފައިވާ 2 ޑައިލެސިސް މެޝިންެގެ ޚިދުމަތްވެސް ދެވޭނެ ކަމަށް އޭނާ ވިދާޅުވި އެވެ.

 ކުޅުދުއްފުށީ ރީޖަނަލް ހޮސްޕިޓަލަކީ އެންމެ އުތުރުގެ 3 އަތޮޅުގެ ރައްޔިތުންވެސް ހިދުމަތް ހޯދަމުންއަންނަ ހޮސްޕިޓަލެކެވެ. އެ ހޮސްޕިޓަލުގައި ބަލިތަކަށް ހާއްސަ ޑޮކްޓަރުން މަދުވުމުގެ މައްސަލަގައި ގިނަބަޔަކު ދަނީ ޝަކުވާކުރަމުންނެވެ.