އެމްއެންޑީއެފް އަދި ޕޮލިސް ފަސޭހަކަމާއެކު މޮޅުވެއްޖެ

ޒިގްޒެގް އިންޓަރ އޮފީސް ފުޓްސެލް މުބާރާތުގައި މިއަދު ކުޅުނު މެޗުތަކުން އެމްއެންޑީއެފް އާއި ޕޮލިސް ފަސޭހަކަމާއެކު މޮޅު ވެއްޖެއެވެ.

މިއަދު ކުޅުނު ފުރަތަމަ މެޗްގައި ޕޮލިސް ޓީމުން ކައުންސިލް އިދާރާގެ ޓީމުގެ އަތުން މޮޅުވީ ކައުންސިލް ލަނޑެއްޖަހާފައިވަނިކޮށް ފަހަތުން އަރާ 5-1 އިންނެވެ. މިމެޗްގައި ޕޮލިސް ޓީމުން އެމީހުންގެ ފުރަތަމަ ލަނޑު ޖަހާފައިވަނީ  13 ވަނަ މިނެޓުގައި އަލީ ފިރާގެވެ.  ދެވަނަ ހާފްގައި ޕޮލިހުގެ ފަރުހަތު މުހައްމަދު ވަނީ 2 ލަނޑުޖަހާފައެވެ. އަދި ފަތުހުއްﷲ ވަހީދު ވަނީ މިހާފްގެ   6ވަނަ މިނެޓްގައި ލަނޑެއް ކާމިޔާބްކޮށް ލީޑު ފުޅާކޮށްފައެވެ. އެޓީމުގެ ފަހު ލަނޑު ޖަހާފައިވަނީ މެޗް ނިމުމާއި ދާދި ގާތް ވެފައި ވަނިކޮށް އަހުމަދު މުހައްމަދެވެ. މި މެޗްގައި ކައުންސިލުން ޖެހި ހަމައެކަނި ލަނޑު ޖަހާފައިވަނީ މުހައްމަދު އަލީ އެވެ. މިމެޗްގެ މޮޅު ކުޅުންތެރިއަކަށް ހޮވިފައިވަނީ ޕޮލިސް ޓީމްގެ އަބޫބަކުރު މުހައްމަދެވެ. މިމެޗްގައި ޕޮލިސް ޓީމްގެ ފަރުހަތު މުހައްމަދަށް ވަނީ ރީނދޫ ކާޑެއްވެސް ދައްކާފައެވެ.

މިމުބާރާތުގައި މިއަދު ކުޅުނު ދެވަނަ މެޗް އެމްއެންޑީއެފް އިން ކާމިޔާބް ކުރީ ޕޯޓް ލިމިޓެޑާ ވާދަކޮށް 5 ލަނޑު 2 ލަނޑުންނެވެ. މެޗް ފެށުމާއެކު އެމްއެންޑީއެފް ގެ އަބްދުﷲ ނާސިފް ވަނީ ލަނޑެއް ޖަހާފައެވެ. އަދި މާ ގިނައިރުތަކެއް ނުވަނީސް  އަހުމަދު އަލީ އިތުރު ލަނޑެއް ޖަހާ ލީޑު ފުޅާކުރިއެވެ. ފުރަތަމަ ހާފް ނިމެން 2 މިނެޓަށް ވެފައި ވަނިކޮށް ޕޯޓުގެ މުހައްމަދު ހަސަން ވަނީ ލަނޑެއް ޖަހާ ފަރަގު ކުޑަކޮށްފައެވެ.  ދެވަނަ ހާފްގެ 8 ވަނަ މިނެޓުގައި އަނެއްކާވެސް ފެނިގެން ދިޔައީ އަލީ އަބޫބަކުރު ލަނޑެއްޖެހިތަނެވެ. އަދި ޕޯޓުން ވަނީ މިހާފް ނިމުމުގެ ކުރިން އިތުރު ލަނޑެއް ޖަހާފައެވެ. މި މެޗްގެ މޮޅު ކުޅުންތެރިއަކަށް ހޮވިފައިވަނީ އެމްއެންޑީއެފް ގެ އަލީ އަބޫބަކުރެވެ. މިމެޗްގައި އެމްއެންޑީއެފް ގެ 3 ކުޅުންތެރިއަކަށް ވަނީ ރީނދޫ ކާޑުވެސް ދައްކާފައެވެ. އެއީބައްސާމް  އަބްދުﷲ  އާއި  އަބްދުﷲ ނާސިފް އަދި އަބޫބަކުރު ޒަކަރިއްޔާއެވެ.