އިންތިހާބުކުރިތާ 3 މަސް ނުވަނީސް ކުޅުދުއްފުށީ ޕީޕީއެމް ގޮފީގެ ރައީސްގެ އިތުބާރުނެތްކަމުގެ މައްސަލައެއް

.

ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)ގެ ކުޅުދުއްފުށީ އަސުރުމާ ގޮފީގެ ރައީސް ކުޅުދުއްފުށީ އާވެލި، މުހައްމަދު އަލީ އާއި ދެކޮޅަށް އިތުބާރު ނެތްކަމުގެ ވޯޓެއް ނެގުމަށް ތައްޔާރުވަމުންދާ ކަމަށް ވަރަށް އިތުބާރު ހުރި ގޮތަކަށް ކުޅުުއްފުށީ އޮންލައިނަށް މައުލޫމާތު ލިބިއްޖެ އެވެ.

މި ނޫހަށް މައުލޫމާތު ހިއްސާކުރި އަސުރުމާ ގޮފީގެ އިސް ފަރާތެއް ބުނީ، އަސުރުމާގޮފީގެ ރައީސް ކަމުގެ މަގާމަށް އިންތިހާބުކުރިތާ އަދި 3 މަސްދުވަސް ނުވާ މުހައްމަދު އަލީގެ އަމަލުތައް ހުންނަނީ ވަކި ބައެއްގެ މަސްލަހަތު ހިމާޔަތް ކުރާ އުސޫލުން ކަމަށެވެ. އެގޮތުން ނިމިގެން ދިޔަ އަންހެނުންގެ ތަރައްޤީ އަށް މަސައްކަތް ކުރާ ކޮމިޓީގެ އިންތިޚާބަށް ޕީޕީއެމްގެ ފިކުރުގައި ކުރިމަތިލީ ބައެއް ފަރާތްތަކާއި ދެކޮޅަށް ގޮފީގެ ރައީސް އިސްކޮށް ހުރެގެން މަސައްކަތް ކޮށްފައިވާ ކަމަށެވެ.

އަދި އެ އިންިޚާބު ކުރިއަށް ދަނިކޮށް 1 ނަމްބަރު ވޯޓް ފޮށީގައި ޖެހުނު މައްސަލައިގައި ރައީސްގެ އަމަލުތައް ހުރީ ވަރަށް ދަށު ދަރަޖައިގައި ކަން ފާހަގަކޮށް އެސަރަހައްދަށް އެއްވެ ތިބި މީހުންނަށް އިވޭނެހެން ފުލުހުންނަށާއި އެ ވޯޓުލާ މަރުކަޒުގެ އިސް ވެރިޔާއަށް ހަޑި ހުތުރު ބަހުން މުއާމަލާތު ކުރުމުގެ ސަބަބުން ގޮފީގެ ގިނަ ރައްޔިތުން ތިބީ ވަރަށް ހިތް ހަމަ ނުޖެހިފައިކަމަށް އޭނާ ބުންޏެވެ. ހަމަ އެހެންމެ ރައީސް އަމަލު ކުރަނީ އަމިއްލަ އެޖެންޑާ އަކަށް ކަމަށާއި ކަމަކާމެދު އެހެން މީހެއްގެ ހިޔާލެއް ނުހޯދާ ކަމަށް ވެސް އޭނާ ބުންޏެވެ.

އަސުރުމާގޮފީގެ ރައީސްގެ މައްޗަށް އިތުބާރުނެތްކަމުގެ މައްސަލައެއް ހުށަހަޅަން އެގޮފީގެ އިސް ބައެއް ފަރާތްތަކުން މަސައްކަތްކުރަމުން އަންނައިރު ރައީސާ ދެކޮޅަށް ހުށަހަޅާ ޕެޓިޝަނުގައި މިހާތަނަށް 100 އަށްވުރެ ގިނަ މީހުން ސޮއިކޮށްފައިވާ ކަމަށް އެކަމުގައި އިސްކޮށް ހަރަކާތްތެރިވާ ފަރާތްތަކުން މައުލޫމާތު ދެއެވެ.

އަސުރުމާ ގޮފީގެ ހިންގާ ކޮމިޓީގެ މެމްބަރެއް ބުނީ އެގޮފީގެ އިންތިހާބަށް ފަހު އަދި މިހާތަނަށް ބޭއްވިފައިވަނީ ގާތްގަނޑަކަށް 3 ބައްދަލުވުން ކަމަށާއި ބައެއް ކަންކަމުގައި މަޝްވަރާ ހޯދި ނަމަވެސް ގިނަ ކަންކަން ނިންމުމުގައި ވަކި ބަޔަކާ މަޝްވަރާ ކުރާ ކަމަށެވެ. އަދި ރައީސްގެ އަމަލުތައް ހުންނަނީ އެންމެ ރަނގަޅަށް ނޫންކަން އޭނާ ފާހަގަ ކުރިއެވެ.

މިކަމާމެދު އަސުރުމާ ގޮފިގެ ރައީސް ވިދާޅުވީ އަންހެނުންގެ ކޮމެޓީގެ އިންތިހާބުގައި އެއްވެސް މީހަކާއި ދެކޮޅަށް އެންޓި ކެމްޕެއިން ކޮށްފާ ނުވާނެ ކަމަށާއި އެއީ މުޅިން ދޮގު ތުހުމަތު ތަކެއް ކަމަށެވެ. އަދި އިތުބާރު ނެތްކަމުގެ ވޯޓެއް ނަގަން އުޅޭކަމުގެ އެއްވެސް މައުލޫމާތެއް ލިބިފައި ނުވާ ކަމަށް އޭނާ ވިދާޅުވި އެވެ.

ޕީޕީއެމްގެ ކުޅުދުއްފުށީ އަސުރުމާގޮފީގެ އިންތިހާބު ބާއްވާފައިވަނީ މިދިޔަ ސެޕްޓެމްބަރ މަހުގެ 28 ވަނަ ދުވަހު އެވެ. އަސުރުމާގޮފީގެ ރައީސްކަމުގެ މަގާމަށް މުހައްމަދު އަލީ ހޮވިފައިވަނީ 213 ވޯޓު ލިބިގެންނެވެ. ޕީޕީއެމް ކުޅުދުއްފުށީ އަސުރުމާގޮފީގައި މިވަގުތު ތިބީ 547 މީހުންނެވެ.