ކުޅުދުއްފުށީ “މިމް” ގުރުއާން ކުލާހުގެ އެންމެމޮޅު ދަރިވަރަކަށް ޔުމްނާ މުހައްމަދު ހޮވިއްޖެ

.

ކުޅުދުއްފުށީ “މިމް” ގުރުއާން ކުލާހުގެ ހުރިހާ ގޮތަކުން އެންމެ މޮޅު ދަރިވަރަކަށް އަންޑާޕޫލްގެ، ޔުމްނާ މުހައްމަދު ހޮވިއްޖެ އެވެ.

ހުރިހާ ގޮތަކުން އެންމެ މޮޅު ދަރިވަރަކަށް ހޮވުނު ޔުމްނާ ހޮވާފައިވަނީ މިއަދު ބޭއްވި އެ ގުރުއާން ކުލާހުގެ އިނާމު ދިނުމުގެ ޖަލްސާގައި އެވެ.

މިއަދު ހަވީރު ހދ އަތޮޅު ތައުލީމީ މަރުކަޒުގެ ހޯލުގައި އޮތް މިރަސްމިއްޔާތު ޝަރަފްވެރި ކޮށްދެއްވީ އެ ސްކޫލްގެ ޕްރިންސިޕަލް ޒިޔާދު ރަޝާދެވެ. މިރަސްމިއްޔާތުގައި ވަނަވަނައަށް ނުދާ ކުދިންގެ ތެރެއިން ތުއްތު ކުދިންނަށް ހިތްވަރުދީ އިނާމް ދެއްވީ އަފީފުއްދީން ސްކޫލްގެ ޤްރުއާން މުދައްރިސް ސަމިއްޔާ މުހައްމަދެވެ.

ކަނޑައެޅިފައިވާ މިންވަރަށް ނަމާދުގައި ކިޔާ ތަކެއްޗާއި ސޫރަތްތައް ދަސްކޮށްފައިވާ ދަރިވަރުންނަށްވެސް މިއަދު ވަނީ އިނާމް ދީފައެވެ. މި އިނާމްތައް ދެއްވީ އޭއީސީގެ ޤްރުއާން މުދައްރިސް ހުސައިން އަހުމަދާއި ގްރެޖްއޭޓް ލީޑިން ޓީޗަރ އިބްރާހިމް ހަސަން އެވެ.

މީގެ އިތުރުން އަރަބި އަދި ތާނަ ރީތިކޮށް ލިޔަން ދަސްކުރި ދަރިވަރުންގެ ތެރެއިން ފާހަގަކޮށްލެވުނު 75 ދަރިވަރަކަށްވެސް މިއަދުގެ ރަސްމިއްޔާތުގައިވަނީ އިނާމް ދީފައެވެ. އެދަރިވަރުންނަށް އިނާމް ބައްސަވައިދެއްވީ ކުޅުދުއްފުށީ ކައުންސިލްގެ ރައީސް  އިބްރާޙީމް ރަމީޒެވެ.

ކްލާސްތަކުން 1 ވަނައަށް ދިޔަ ދަރިވަރުން ނަށާއި އަދަބުވެރި ދަރިވަރަށާއި ހުރިހާ ގޮތަކުން އެންމެ މޮޅު ދަރިވަރަށާއި އެކި ގޮތް ގޮތުން ފާހަގަ ކޮށްލެވުނު ބެލެނިވެރިންނަށް އަދި ޚަތިމް ނިންމި 19 ދަރިވަރުންނަށް އިނާމް ބައްސަވައި ދެއްވީ ޝަރަފްވެރި މެހެމާނެވެ.  އަދަބުވެރި ކަމުގެ ގޮތުން އެންމެ ފާހަގަ ކޮށްލެވޭ ދަރިވަރަކަށް ހޮވުނީ ގްރޭޑް 5 ގެ ދަރިވަރު ރައިހާން މުހައްމަދު، ކަށިކެޔޮގަސްދޮށުގެ އެވެ.

މިރަސްމިއްޔާތުގައި ޝަރަފްވެރި މެހެމާނު ދެއްކެވި ވާހަކައިގައި ކީރިތި ޤްރުއާން ކިޔެވުމާއި އުންގަންނައި ދިނުމުގެ މުހިއްމު ކަމުގެ މައްޗަށާއި އެކަމުގެ ފައިދާތަކަށް އަލި އަޅުވާލާ ފައިވެއެވެ. އަދި ކޮންމެ މީހަކީވެސް ޤްރުއާނުގެ އަހުލުވެރިއަކަށް ވުމަށް ގޮވާލެއްވިއެވެ.

މި ހަފްލާގައި މިއަހަރު ހިނގާ ދިޔަ ގޮތުގެ ރިޕޯޓް އިއްވާ ދެއްވީ ކްލާހުގެ މަސްއޫލުވެރިޔާ މަރިއަމް އާދަމްއެވެ. މި ރިޕޯޓުގައި ކްލާސްތައް ހިންގުމަށް ދިމާވާ އެންމެ ބޮޑު ދައްޗަކީ ސްކޫލް ތަކުން ހިންގާ އިތުރު ހަރަކާތްތަކާއި ކްލާހުގެ ގަޑިތައް ފުށު އެރުން ކަން ފާހަގަ ކުރެއްވިއެވެ. އަދި ބެލެނިވެރިންގެ ފަރާތުން ލިބޭ އެއްބާރުލުން ފާހަގަ ކުރެއްވިއެވެ.

މިއަދުގެ ރަސްމިއްޔާތުގައި ކްލާހުގެ މަސްއޫލުވެރިޔާގެ އެހީތެރިޔާ އިބްރާހިމް ހަސަން ޝުކުރު ދެންނެވުމުގެ ގޮތުން ވާހަކަ ދެއްކެވި އިރު ޖަލްސާ ފެށިގެން އަދި ނިމިގެން ދިޔައީވެސް ޤްރުއާނުގެ ބަރަކާތުންނެވެ.

2008 ވަނަ އަހަރުން ފެށިގެން ކުޅުދުއްފުށީ މިދިލިމާގޭގައި ހިންގަމުންދާ މި ޤްރުއާން ކުލާހުގައި 160 ދަރިވަރުން މިއަހަރު ވަނީ ކިޔަވާފައެވެ.