ފަހުގެ ހަބަރު: އިބްރާހީމް ހުސައިން ޒަކީ ކުޅުދުއްފުށީ ހޮސްޕިޓަލުގައި އެޑްމިޓްކޮށްފި

20:58

ރަލުގެ މައްސަލައިގައި ހޮނޑައިދޫއިން ހައްޔަރުކުރި ކުރީގެ ރައީސްގެ ސްޕެޝަލް އެންވޯއީ އިބްރާހީމް ހުސައިން ޒަކީ ދާދި ދެންމެ ކުޅުދުއްފުށީ ހޮސްޕިޓަލަށް ގެނެސްފި.

އެސަރަހައްދުގައި ހުރި ކުޅުދުއްފުށި އޮންލައިންގެ ރިޕޯޓަރ ބުނީ ހޮސްޕިޓަލަށް ގެނެސްފައިވަނީ ޒަކީ އެކަނި ކަމަށާއި އެހެންނަމަވެސް ހައްޔަރުކުރި އެހެން މީހުންނަށްވެސް އަނިޔާ ލިބިފައިވާ ކަމަށް ބައެއް މީހުން ބުނެފައިވާ ކަމަށެވެ.

ނަން ހާމަނުކުރުމަށް ޝަރުތުކޮށް މައުލޫމާތު ދިން މީހަކު ބުނީ ޒަކީ އަށް ވަރަށް ބޮޑަށް އަނިޔާވެފައިވާ ކަމަށާއި އަދި އިތުރު މީހުންނަށް ވެސް އެކިވަރުގެ އަނިޔާ ލިބިފައިހުރި ކަމަށެވެ. ޒަކީގެ ފަޔަށާއި އުނަގނޑުމައްޗަށް އަނިޔާވެފައިވާ ކަމަށް ކުޅުދުއްފުށި އޮންލައިން އަށް މައުލޫމާތު ހިއްސާކުރި މީހާ ބުނެފައިވެއެވެ.

18:00

ހދ. ހޮނޑައިދޫއިން ރަލާއި މަސްތުވާތަކެއްޗާއެކު ހައްޔަރުކުރި 10 މީހުން ކުޅުދުއްފުއްޓަށް ގެނެސްފި އެވެ.

ރޭ ހދ ހޮނޑައިދޫއިން ހައްޔަރުކުރި ރައްޔިތުންގެ މަޖިލީހުގެ ދެ މެމްބަރުންނާއި އެމްޑީޕީގެ ސަރުކާރުގެ އިސް މަގާމުތަކުގައި ތިއްބެވި ބައެއް ބޭފުޅުން ކުޅުދުއްފުއްޓަށް ގެނެސްފައިވަނީ މިއަދު ހަވީރު 5 ޖަހާ އެހާކަންހާއިރު އެވެ.

އެމީހުން ކުޅުދުއްފުއްޓަށް ގެނެސް ބާލާފައިވަނީ ކުޅުދުއްފުށީ ސަރަހައްދީ ބަނދަރަށެވެ. މައުލޫމާތު ލިބިފައިވާ ގޮތުގައި އެމީހުން މިހާރު ތިބީ ކުޅުދުއްފުށީ ޕޮލިސް ސްޓޭޝަންގެ ތެރޭގައި އެވެ.

ހައްޔަރުކުރި މީހުންގެ ބަންދުގެ މުއްދަތު ޖަހަން ގެންދަނީ ކޮން ރަށެއްގެ ކޯޓަކަށް ކަމެއް ފުލުހުން ޔަގީންކޮށްދީފައެއް ނުވެއެވެ. ފުލުހުންގެ މީޑިޔާ އޮފިޝަލް ވިދާޅުވީ ގާނޫނުގައި ބުނާ މުއްދަތަށް ވުރެ އިތުރަށް ބަންދުގައި ބައިތިއްބާނަމަ “ކޮންމެވެސް” ރަށެއްގެ ކޯޓަކަށް އެމީހުން ގެންދާނެ ކަމަށެވެ.

ރޭ ހޮނޑައިދޫން ހައްޔަރުކޮށްފައިވާ މަޖިލިސް މެމްބަރުންނަކީ ކާށިދޫ ދާއިރާގެ މެމްބަރު އަބްދުﷲ ޖާބިރުގެ އިތުރުން ހެންވޭރު ދެކުނު ދާއިރާގެ މެމްބަރު ހާމިދު އަބްދުލްގަފޫރު އެވެ.

އޭގެ އިތުރުން މިމައްސަލައާއި ގުޅިގެން ފުލުހުން ހައްޔަރުކޮށްފައިވަނީ ސ. ހުޅުދޫ، ރީފްސައިޑް ޖާދުﷲ ޖަމީލް އާއި، ހ. ހުޅުގަލި އިބްރާހިމް ޙުސައިން ޒަކީ އާއި ގ. ހިލިހިލާގެ ޙަމްދާން ޒަކީ އާއި، މއ. މަނާގެ މަރިޔަމް ފާއިޒް އާއި މއ. މަނާގެ މުޙައްމަދު ޒުހެއިރު އެވެ.

ރަލުގެ މައްސަލައާ ގުޅިގެން ހޮޑައިދޫން ހައްޔަރުކުރި ބިދޭސީންނަކީ، ސްރީލަންކާގެ ދެ ރައްޔިތުންކަމަށްވާ ރާޖު މޯހަން އާއި އަނޫރު ބަންޑާރަނައިކް އާއި ބަންގްލަދޭޝް ރައްޔިތެއްކަމަށްވާ ސުހައިލް ރަނާ އެވެ.