ހދ އަތޮޅުގެ ފެރީގެ ނިޒާމު ހުއްޓިފައި

ހދ އަތޮޅުގެ ދަތުރުފަތުރުގެ ހިދުމަތް ދެމުން އަންނަ ޓްރައިނަސް ސީއޭއީ ހޯލްޑިންގ ގެ ފެރީ ދަތުރުތައް ހުއްޓާލައިފި އެވެ.

މަތިއުތުރުގެ ދަތުރުފަތުރުގެ ނިޒާމް ހަވާލުކޮށްފައިވާ ޓްރައިނަސްގެ ފަރާތުން ހދ އަތޮޅުގެ ފެރީގެ ހިދުމަތްތަކާ ހަވާލުވެ ހުންނެވި އެކުންފުނީގެ އަދުހަމް ރަފީޤް ވިދާޅުވީ ފެރީގެ ދަތުރުތައް ހުއްޓެން ދިމާވީ ސަރުކާރުން ކޮށްދޭންޖެހޭ ބައެއް ކަންކަން ކޮށްނުދީ ހުރުމުގެ ސަބަބުން ކަމަށެވެ.

ހދ އަތޮޅުގެ ފެރީގެ ދަތުރުތައް ހުއްޓިފައި އޮންނަތާ 3 ހަފުތާވެފައިވާއިރު އަލުން އެ ހިދުމަތް ދޭން ފެށޭނެ ވަކި ދުވަހެއް އެކުންފުނިން ބުނެފައެއް ނުވެއެވެ.

“ސަރުކާރުން ނިންމަންޖެހޭ ކަންތައްތަކެއް ހަމަނުޖެހިގެން ހުއްޓުނީ. މިހާރު ފެށުމަށް އަނެއްކާވެސް މަސައްކަތް ކުރަމުން މިދަނީ.” އަދުހަމް ވިދާޅުވި އެވެ.

އެ ކުންފުނިން ބުނީ ކުރިއަށް އޮތް ދެ ހަފުތާގެ ތެރޭގައި ހުރިހާ ކަމެއް ހަމަޖެހި އަލުން ފެރީގެ ހިދުމަތް ދެވެން ފެށޭނެކަމަށް އުއްމީދު ކުރާ ކަމަށެވެ.

މިކަމާ ގުޅިގެން ޓްރާންސްޕޯޓް އޮތޯރިޓީގެ ބަހެއް ހޯދުމަށް ކުރިމަސައްކަތް ވަނީ ކާމިޔާބުވާ ގޮތް ނުވެފައި އެވެ. އަދި ޓްރައިނަރސްގެ މެނޭޖިން ޑިރެކްޓަރ ރާއްޖޭގައި ނެތުމުން، އެ ކުންފުންޏަށް ސަރުކާރުން ކޮށްނުދީ ހުރިކަމަށް ބުނާ ކަންކަމުގެ ތަފްސީލުވެސް ވަނީ ލިބޭގޮތް ނުވެފައެވެ.

ކުރިން ބޮޑު އަގު ދީގެން ކުޅުދުއްފުއްޓަށް ދަތުރު ކުރަމުން އައި ރައްޔިތުންނަށް ފެރީގެ ނިޒާމުގެ ސަބަބުން ވަނީ އެންމެ 25 ރުފިޔާއަށް ދަތުރު ކުރެވޭނެ މަގު ފަހިވެފައެވެ .ނަމަވެސް ފެރީގެ ނިޒާމްހުއްޓުމަކަށް އައިސްފާވުމުން މިއަތޮޅުގެ ރައްޔިތުންނަށް ދަނީ ދަތިތަކަކާ ކުރިމަތި ވަމުންނެވެ.

ފެރީގެ ނިޒާމުން ރަށްތައް ގުޅާލުމަކީ ކުރީ ސަރުކާރުގެ ވައުދަކަށް ވީއިރު އެ ސަރުކާރުން ފެށި ފެރީގެ ނިޒާމަށް، ވެރިކަން ބަދަލުވުމުން މިދަނީ މައްސަލަ ތަކަކާއި ކުރިމަތި ވަމުންނެވެ. ވެރިކަން ބަދަލުވިއިރުވެސް ސަރުކާރުގެ ފަރާތުން ދަތުރުފަތުރުގެ ހިދުމަތްދޭ ކުންފުނިތަކަށް ދޭންޖެހޭ ރަށްތަކާއި ބިންތައް ދިނުމުގައި ވަނީ މައްސަލަތަކެއް ދިމާވެފައި އެވެ.

ހދ އަތޮޅު ނޫނަސް އެހެން އަތޮޅުތަކުގެ ފެރީގެ ނިޒާމަށްވެސް އަންނަނީ ގިނަ ހުރަސްތަކެއް ކުރިމަތި ވަމުންނެވެ. މިގޮތުން ހއ އަދި ށ އަތޮޅުގެ ފެރީވެސް ވަނީ ދާދި ފަހުން ޚިދުމަތް ދިނުން މެދުކަނޑާލާފައެވެ.