ކުޅުދުއްފުށީ އަންހެނުންގެ ކޮމެޓީގެ ރައީސާއަކަށް އުއްމުކުލްސޫމް ހޮވައިފި

ކުޅުދުއްފުށީ އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ އިފްތިތާހީ ޖަލްސާ ބާއްވާ ރައީސާކަމުގެ މަގާމަށް އުއްމު ކުލްސޫމް އިންތިހާބުކޮށްފި އެވެ.

މިއަދު ކުޅުދުއްފުށީ ކައުންސިލް އިދާރާގައި ބޭއްވި އެ ކޮމެޓީގެ ފުރަތަމަ ބައްދަލުވުމުގައި ރައީސާ ކަމުގެ މަގާމަށް އުއްމުކުލްސޫމް ހޮވާފައިވަނީ ވޯޓު ދިން 8 މެމްބަރުންގެ އިއްތިފާގުންނެވެ. ކޮމެޓީގެ ފުރަތަމަ ބައްދަލުވުމުގައި އެކޮމެޓީގެ އެއް މެމްބަރަކު ބަލިވެ އުޅުއްވާތީ ބައިވެރިވެފައެއް ނުވެއެވެ.

ކޮމެޓީގެ ނައިބު ރައިސާއަކަށް ހޮވާފައިވަނީ، 8 މެމްބަރުންގެ އަޣްލަބިއްޔުން އައިމިނަތު މަޖީދާއެވެ. ކޮމެޓީގެ ރައީސަކު ހޮވުމަށްޓަކައި ބޭއްވި ބައްދަލުވުމުގެ ރިޔާސަތު ފުރަތަމަ ބެލެހެއްޓީ ކައުންސިލުގެ ރައީސް އިބްރާހީމް ރަމީޒް އެވެ. ކޮމެޓީގެ ރައީސާ ހޮވުމަށްފަހު ކޮމެޓީ ކުރިއަށް ގެންގޮސްފައިވަނީ ކޮމެޓީގެ ރައީސާގެ ރިޔާސަތުގެ ދަށުންނެވެ.

އަންހެނުންގެ ކޮމެޓީ އިފްތިތާހުކުރުމަށް މިއަދު ހާއްސަ ޖަލްސާއެއްވެސް ވަނީ ބާއްވާފައި އެވެ. އެޖަލްސާގައި އަންހެނުންގެ ކޮމެޓީގެ މެމްބަރުން މެމްބަރުކަމުގެ އިގްރާރުގައި ސޮއިކުރުން އޮތެވެ.

މިއަދުގެ މިރަސްމިއްޔާތުގައި ކުޅުދުއްފުށީ ކައުންސިލްގެ ރައީސް އިބްރާހިމް ރަމީޒް ދެއްކެވި ވާހަކައިގައި ކޮމިޓީއަށް އިންތިޚާބުވި ފަރާތްތަކަށް މަރުހަބާ ދަންނަވާފައި ވެއެވެ. އަދި މުޖްތަމައެއް ތަރައްޤީވެ ކުރިއަރައިގެންދާނީ އެތަނެއްގައި ދިރިއުޅޭ އަންހެނުންގެ ވަރަށް ބޮޑު ހިއްސާއެއް އެކުލެވިގެންކަން ފާހަގަ ކުރެއްވިއެވެ. އަދި މަތީ ތައުލީމް އުނގެނި ފަންނީ ހުނަރު ހުރި ބަޔަކަށް އަންހެނުން ވުމަށްވެސް ގޮވާލެއްވިއެވެ.

ސަރުކާރުގެ ބައެއް މުއައްސަސާ ތަކުގެ މުއައްޒަފުން ބައިވެރިވި މި ރަސްމިއްޔާތު ނިމިގެން ދިޔައީ ޤައުމީ ސަލާމުންނެވެ.