ކުޅުދުއްފުށި އޮންލައިން ދެވަނަ ކުރުވާހަކަ ލިޔުމުގެ މުބާރާތުގެ އެއްވަނަ ޝާމިލް އިބްރާހިމް ހޯދައިފި

ކުޅުދުއްފުށި އޮންލައިނުން ބޭއްވި ދެވަނަ ކުރުވާހަކަ ލިޔުމުގެ މުބާރާތުގެ އެއްވަނަ ޝާމިލް އިބްރާހިމް ހޯދައިފި އެވެ. މިއީ ޝާމިލް މިމުބާރާތުގެ އެއްވަނަ ހޯދި ދެވަނަ ފަހަރެވެ.

ޖަލާލުއްދީން ސްކޫލުގެ ދިވެހި ޑިޕާޓްމަންޓާއި ގުޅިގެން މިދިޔަ އަހަރުން ފެށިގެން ބާއްވަމުން އަންނަ މި މުބާރާތުގެ އެއްވަނަ އަށް ދިޔަ އެސްކޫލުގެ 12 ސީގެ ދަރިވަރު ޝާމިލް އިބްރާހިމް ލިޔެފައިވަނީ “ކުއްވެރިން” ކިޔާ ވާހަކައެކެވެ. މުބާރާތުގެ އެއްވަނަ އަށް ހޮވުމުން ޝާމިލް އަށް ވަނީ އެންޑްރޮއިޑް ޓެބްލެޓެއްގެ އިތުރުން ޓްރޮފީއަކާއި ހަނދާނީ ލިޔުމެއް ދީފައެވެ.

މުބާރާތުގެ ދެވަނަ ލިބުނީ 11 ބީ ގެ ޒިޔާދާ އާދަމް ލިޔެފައިވާ “ޕްލޭން” އަށެވެ. އަދި ތިންވަނަ އަށް ހޮވުނީ 10 އީގެ ސީމާ ހަސަން ލިޔެފައިވާ “މިނެދިން ނާޅިން މިނެދޭކަށް ނުޖެހެއެވެ.” ވާހަކަ އަށެވެ. ދެވަނަ އަދި ތިންވަނަ ހޯދި ދަރިވަރުންނަށް ވަނީ މިއަދުގެ މިރަސްމިއްޔާތުގައި ވަތަނިއްޔާގެ ޑަބްލިޔު މޮޑެމްއަކާއި ޓްރޮފީގެ އިތުރުން ހަނދާނީ ލިޔުމެއް ދީފައެވެ. މީގެ އިތުރުން މުބާރާތުގައި އެންމެ މޮޅު 15 ވާހަކަ ލިޔުނު ދަރިވަރުންނަށް ވެސް ވަނީ ހަނދާނީ ލިޔުން ދީފައެވެ.

މިއަދުގެ މިރަސްމިއްޔާތުގައި ވަނަވަނައަށް ދިޔަ ދަރިވަރުންނަށް އިނާމް ދެއްވުމަށް ފަހު ސްކޫލްގެ ޑެޕިއުޓީ ޕްރިންސިޕަލް އަލީ އިސްމާއިލް ދެއްކެވި ވާހަކައިގައި ކުޅުދުއްފުށީ އޮންލައިނުން ޖަލާލުއްދީން ސްކޫލުގެ ދަރިވަރުންނަށް ހާއްސަ ކޮށްގެން މިފުރުސަތު ހުޅުވާލާ ކަމަށްޓަކައި ޝުކުރު އަދާ ކުރެއްވި އެވެ. އަދި މިދިޔަ އަހަރަށް ވުރެ މިއަހަރު ލިޔެފައިވާ ވާހަކަތަކާއި އިނާމް ތަކުގެ ފެންވަރު ރަނގަޅުކަން ފާހަގަކުރައްވާ ދަރިވަރުން ވާހަކަ ލިޔުމާއިގެން ކުރިއަށް ދިޔުމަށް ގޮވާލެއްވިއެވެ.

ޑެޕިއުޓީ ޕްރިންސިޕަލް އަލީ އިސްމާޢިލް އިތުރަށް ވިދާޅުވީ، ކުދިންނަށް ލިބިފައިވާ ވާހަކަ ލިޔުމުގެ ހުނަރުގެ ބޭނުންކޮށް ކުޅުދުއްފުށީ އޮންލައިން އަށް ވާހަކަ ލިޔެގެންވެސް އާމްދަނީއެއް ހޯދިދާނެއެވެ. އެއީ ކުޅުދުއްފުށީ އޮންލައިން އަކީ ދުވާލަކު 25000 ހިޓްސް ލިބޭ ސައިޓަކަށް ވެފައި، އެފަދަ ނޫހަކަށް ލިޔެގެން ކިޔުންތެރިންގެ ތަރުހީބު ހޯދުމަށް ފަސޭހަވާނެތީކަމަށް ވިދާޅުވިއެވެ. އަދި ޗުއްޓީ ތެރޭގައި ވާހަކަ ލިޔެ ޝާއިއު ކޮށްގެން ފަހުން ބޮޑެތި ނޫސްތަކުން ފުރުސަތު ހޯދިދާނެކަމަށް ވިދާޅުވިއެވެ. އަދި ލިބިފައި ހުރި ހުނަރު އިތުރަށް ތަރައްގީނުކޮށް ބޭނުން ނުހިފާ ނުތިބުމަށް އިލްތިމާސް ކުރެއްވިއެވެ.

މިމުބާރާތުގައި އިނާމްތައް ލިބުނު ދަރިވަރުންގެ ނަންތައް އިއުލާން ކޮށްދެއްވާ ކުޅުދުއްފުށީ އޮންލައިނުން ބައިވެރިންނަށް ހިއްސާ ކުރަން ބޭނުންވި މައުލޫމާތުތައް ހިއްސާ ކުރެއްވީ ގްރެޖްއޭޓް ޓީޗަރ އަހުމަދު ޒަކަރިއްޔާ އެވެ.

މިއަހަރުގެ މުބާރާތުގައި 34 ދަރިވަރަކު ވަނީ ވާހަކަ ލިޔެފައެވެ. އަދި މުބާރާތުގެ އެންމެ މޮޅު 15 ވާހަކަ ވަނީ ކުޅުދުއްފުށީ އޮންލައިނުގައި ޝާއިއުވެސް ކޮށްފައެވެ. މިއަހަރުގެ މުބާރާތުގެ ގަދަ 15 ހިމެނުނު ވާހަކަތައް ލިޔުނު ކުދިންނަށް ވަނީ ހާއްސަ އެދިލެއްވުމުގެ މަތިން ކުޅުދުއްފުށި އޮންލައިން މެދުވެރިކޮށް ރާއްޖޭގެ މަޝްހޫރު ވާހަކަ ލިޔުންތެރިޔާ ބިންމާ އިބްރާހިމް ވަހީދު އިރުޝާދު ދެއްވާފައެވެ.