ޔޫޓިއުބްގައި އެންމެ ގިނައިން ބެލި ވީޑިއޯއަކަށް ގަންޏަމް ސްޓައިލް

މަޝްހޫރު ވީޑިއޯ ޝެއަރިން ވެބްސައިޓް ޔޫޓިއުބުން އެންމެ ގިނަ މީހުން ބެލި ވީޑިއޯއަކަށް ކުޑަދުވަސް ކޮޅެއްގެ ތެރޭގައި މަޝްހޫރުކަން ހޯދާފައިވާ ގަންޏަމް ސްޓައިލް ހޮވިއްޖެ އެވެ.

ދެކުނު ކޮރެއާގެ ޕޮޕް ލަވަ ކިޔުންތެރިޔާ ސައިގެ ގަންޏަމް ސްޓައިލް ލަވައިގެ ވީޑިއޯ މިއަހަރުގެ ޖުލައި މަހު އަޕްލޯޑް ކުރިފަހުން މިހާތަނަށް ވަނީ 814 މިލިޔަން ފަހަރު ބަލާފައެވެ. ކުރިން ޔޫޓިއުބްގައި އެންމެ ގިނަ ފަހަރު ބެލި ވީޑިއޯ އެއްގެ ގޮތުގައި ރިކޯޑް ހިފަހައްޓަމުން ދިޔައީ ޒުވާން ލަވަ ކިޔުންތެރިޔާ ޖަސްޓިން ބީބާގެ “ބޭބީ” ލަވައިގެ ވީޑިއޯއެވެ. ތިންވަނާގައި އޮތީ ޖެނިފާ ލޮޕޭޒް އާއި ޕިޓްބުލްގެ “އޮން ދަ ފްލޯ” އެވެ.

ގަންޏަމް ސްޓައިލްގެ ވީޑިއޯ ފުރަތަމަ އެމެރިކާގައި ޓްވީޓް ކޮށްފައިވަނީ ވެސް ޖަސްޓިން ބީބާގެ މެނޭޖަރ ސްކޫޓަރ ބްރައުން އެވެ.

މިއަހަރުގެ އެމްޓީވީ މިއުޒިކް އެވޯޑްސް ގައި ވެސް އެންމެ މޮޅު ވީޑިއޯގެ މަގާމް ހޯދި ގަންޏަމް ސްޓައިލް ވަނީ 28 ގައުމެއްގެ މިއުޒިކް ޗާޓުތަކުގެ އެއްވަނަ ހޯދާފައެވެ. އަދި ތަފާތު ޝޯވް ތަކުގައި އެލަވަޔަށް ޑާސްތައް އަންނަނީ ހަދަމުންނެވެ. އަދި ކޮލެޖްތަކާއި ޔުނިވާސިޓީތަކުގެ ކުދިންގެ އެ ލަވަ ތީމް އަކަށް ބަލައިގެން ތަފާތު އައިޓަމްތައް އަންނަނީ ހުށަހަޅައިދެމުނެވެ.