ކުޅުދުއްފުށީ ކޮޑި ފިހާރައިން ވަގަށް ނެގި ބައެއް ތަކެތި ހޯދައި، އެމައްސަލައިގައި 3 މީހަކު ހައްޔަރުކޮށްފި

ރޭ ކުޅުދުއްފުށީ ކޮޑި ފިހާރަ ފަޅާލާ އެތަނުން ވަގަށް ނެގި ބައެއް ތަކެތި ހޯދައި، އެމައްސަލައާ ގުޅުންހުރި 3 މީހަކު ފުލުހުން ހައްޔަރު ކޮށްފި އެވެ.

ފުލުހުން ބުނީ ކުޅުދުއްފުށީ ޕޮލިސް ސްޓޭޝަނަށް އެ މައްސަލަ ހުށަހެޅުނުތާ 7 ގަޑިއިރުގެ ތެރޭގައި ވަގަށް ނެގި ބައެއް ތަކެތި ހޯދިފައިވާ ކަމަށެވެ. އެމައްސަލައިގައި ހައްޔަރު ކޮށްފައިވަނީ އުމުރުން 26 އަހަރުގެ ދެ މީހުންނާއި 19 އަހަރުގެ މީހެކެވެ. އެމީހުންގެ ނަމެއް ފުލުހުން ހާމައެއް ނުކުރެއެވެ.

ފުލުހުންގެ މީޑިޔާއިން ބުނި ގޮތުގައި ކޮޑި ފިހާރައިން ވަގަށް ނެގި ތަކެތީގެ ތެރެއިން ފުލުހުންނަށް މިހާތަނަށް ހޯދިފައިވަނީ ލެޕްޓޮޕަކާއި މޯޑަމް އެއްގެ އިތުރުން އެފިހާރައިން ވަގަށްނެގި 10,000 ހާސް ރުފިޔާގެ ތެރެއިން 2980 ރުފިޔާ އެވެ.

އޭގެ ތެރެއިން ލެޕްޓޮޕާއި މޯޑަމް ފެނިފައިވަނީ ފަޅުގެއެއްގެ ތެރެއިން ކަމަށާއި އަދި ފައިސާ ހޯދާފައިވަނީ މިމައްސަލައިގައި ހައްޔަރުކުރި 3 މީހުންގެ ތެރެއިން 19 އަހަރުގެ މީހާ ދިރިއުޅޭ ގޭގެ ތެރެއިން ކަމަށް ފުލުހުން މައުލޫމާތު ދެއެވެ.

މި މައްސަލަ ހދ. ކުޅުދުއްފުށި ޕޮލިސް ސްޓޭޝަނުން މިހާރު ދަނީ ތަހުޤީޤް ކުރަމުންނެވެ.

ކޮޑި ފިހާރައިގެ ވެރިޔާ މުހައްމަދު ބުނިގޮތުގައި އެ ފިހާރަ ފަޅާލާފައިވަނީ ފިހާރައިގެ އިރުމަތީ މަގުގެ ފާރުމަތިން އަރައި ފިހާރައިގެ ފަހަތުން ވަދެވޭގޮތަށް ހުރި ދޮރެއްގެ ތަޅު ހަލާކުކޮށްލައިގެން ނެވެ.

“އެ ބޭރު ދޮރުގައި އިންނާނެ ދެ ތަޅު. އެލުވޭ ގޮތަށް މިހުންނަ ވައްތަރުގެ ދެ ތަޅު. އެ  ދެ ތަޅު ހަލާކުކޮށްލައިގެން ވަދެ، އަދި އެތެރެއިން އިންނާނެ އެހެން ދޮރެއް. އެ ދޮރު ތަޅު ހަލާކުނުކޮށްލެވުނީމަ އެދޮރުފަތް ފަޅާލައިގެން އެތެރެއަށް ވަދެފަ އެހުރީ” މުހައްމަދު ބުންޏެވެ. “އެވަގުތަކީ އިޝާ ނަމާދު ވަގުތުކަމަށް މި ބެލެވެނީ. އަޅުގަނޑުގެ ދަރިފުޅު ގެންގުޅޭ ލެޕްޓޮޕަކާއި ދަރިފުޅާ އަޅުގަނޑުގެ ކޭޝް ކައުންޓަރަށް އެމީހުން ޓާގެޓް ކޮށްފަ އެހުރީ”

ކޮޑި ފިހާރައިގެ ވެރިޔާ ބުނިގޮތުގައި އެ ފިހާރައިން ވައްކަން ކޮށްފައިވަނީ ބަޔަކު ވަރަށް ބޮޑަށް ރާވައިގެންނެވެ.