ހަނިމާދޫ ސަޢާދާ ޕްރީސްކޫލްގެ ދަސްވެނިވުމުގެ ރަސްމިއްޔާތު ބާއްވައިފި

ހދ ހަނިމާދޫ ސަޢާދާ ޕްރީސްކޫލްގެ ދަސްވެނިވުމުގެ ރަސްމިއްޔާތު ބާއްވައިފިއެވެ.

މި ނޮވެމްބަރ މަހުގެ 21 ވަނަ ދުވަހު ހަވީރު ހަނިމާދޫ އިޖްތިމާއީ މަރްކަޒުގެ ހޯލްގައި އޮތް މިރަސްމިއްޔާތު ކީރިތި ޤްރުއާނުގެ ބަރަކާތުން ފައްޓައިދިނީ އަތޫފް އަބްދުއްރަހީމެވެ. ހަނިމާދޫ ޒުވާނުން ޖަމިއްޔާގެ ނައިބު ރައީސް މުހައްމަދު އަޝްރަފް އެޖެންޑާ ހުށައަޅައިދިން މިރަސްމިއްޔާތުގައި ދަސްވެނިމުނު ކުދިންގެ ނަންތައް އިއްވައިދެއްވީ ދަސްވެނިމުނު ދަރިވަރުންގެ ތެރެއިން މުހައްމަދު އައިހަމްއެވެ. އަދި ޕޯޓްފޯލިއޯ ހަވާލު ކުރެއްވުމަށް ނަންއިއްވެވީ މުހައްމަދު އަލީއެވެ.

ދަރިވަރުންނަށް ޕޯޓްފޯލިއޯއާއި ޕީޓީއޭގެ ފަރާތުން ހުށައެޅުނު އިނާމްތައް ހަވާލު ކޮށްދެއްވީ، ހަނިމާދޫ ކައުންސިލް އާރިފާ އަލީ އާއި ނާޒިޔާ ހަސަނާއި، މުހައްމަދު ނާސިރު އަދި ޖަމިއްޔާގެ ނައިބުރައީސް އިބްރާހިމް ހުސެންފުޅުގެ އިތުރުން ޕީޓީއޭގެ ނައިބު ރައީސް ޒުނެރާއަލީއެވެ. ދަސްވެނިމުނު ކުދީންނަށް އެކަމުގެ ލިޔުމާއި ސެޓްފިކެޓް ދެއްވީ ރަސްމިއްޔާތުގެ ޝަރަފްވެރި މެހެމާނު އަދި ކައުންސިލްގެ ރައީސް އަބްދުއްސަލާމް އަލީއެވެ.

މިއަހަރު އެސްކޫލުގައި ކިޔަވައިދީފައިވަނީ 10 އަހަރުވީ އިމާރާތުގައި އަޅާފައިވާ އައު ކްލާސްރޫމް ތަކާއި އެކުގައެވެ. އެސްކޫލްގެ ޕީޓީއޭގެ އިސްނެންގެވުމުގެ މަތިން މިއަހަރު ވަނީ ކުޅުދުއްފުށީ އަމީރު އަމީން ސްކޫލަށް ތަޖްރިބާ ހޯދުމަށް ޒިޔާރަތް ކޮށްފައެވެ. އަންނަ 2013 ވަނަ އަހަރު ސްކޫލްގައި ކިޔަވައިދޭ މުދައްރިސުންނަށް ފަސޭހަވާނޭހެން މަސައްކަތު މީހެއް ނެގުމަށް ސްކޫލުން ވިސްނަމުންދާކަމަށް އެސްކޫލުން މައުލޫމާތު ދެއްވައެވެ.

ހަނިމާދޫ ޒުވާނުން ޖަމިއްޔާގެ ބެލުމުގެ ދަށުން ހިންގާ ސަޢާދާ ޕްރީސްކޫލުގެ 35 ދަރިވަރަކު މިއަހަރު ދަސްވެނިވި އިރު އެސްކޫލްގައި މިއަހަރު 125 ދަރިވަރަކު ވަނީ ތައުލީމް ހާސިލްކޮށްފައެވެ.