މީރާގެ އޮފީހެއް ކުޅުދުއްފުށީގައި ހުޅުވައިފި

މޯލްޑިވްސް އިންލެންޑް ރެވެނިޔު އޮތޯރިޓީ (މީރާ) އޮފީހެއް ކުޅުދުއްފުށީގައި ހުޅުވައިފި އެވެ.

ކުރިން ގައުމީ އިދާރާ ހިންގަމުން އައި އިމާރާތުގައި ހުޅުވި އޮފީހަކީ ޓެކްސް ދައްކާ ފަރާތްތަކާ ވީހާވެސް ގާތުން ހިދުމަށް ދިނުމަށް މީރާ އިން ކުރަމުން އަންނަ މަސައްކަތުގެ ދަށުން ހުޅުވި އޮފީހެއް ކަމަށް އެ އޮތޯރިޓީން ބުނެއެވެ.

މީރާގެ ކުޅުދުއްފުށީ ބްރާންޗުގެ ހިދުމަތް އިއްޔެ ފެއްޓިއިރު، ކުރިން ހދ އަތޮޅު ކައުންސިލުން ދެމުން އައި ޓެކްސްއާ ގުޅޭ ހުރިހާ ހިދުމަތްތަކެއް އެ ބްރާންޗުން ލިބެން ހުރެއެވެ. އަދި މީރާ ގެ ޓެކްސް ޕޭޔަރ ސާރވިސް ސެންޓަރުން ދޭ ހުރިހާ ހިދުމަތްތަކެއް ވެސް މީރާގެ ކުޅުދުއްފުށީ ބްރާންޗުން ލިބެން ހުންނާނެ ކަމަށް އެ އިދާރާއިން ބުނެއެވެ.

މީރާއިން ބުނިގޮތުގައި، ޖީ.އެސް.ޓީ ބަޔާނާއި ބީ.ޕީ.ޓީ ބަޔާން ބަލައިގަތުމާއި، ފައިސާ ބަލައިގަތުމާއި، ޓެކްސް ދައްކާ ފަރާތްތައް ރަޖިސްޓަރީ ކުރުމާއި، ޓެކްސް ބަޔާން ފުރުމުގައި އެހީތެރިކަން ފޯރުވައިދިނުމާއި، ޓެކުހާއި ގުޅޭ މަޢުލޫމާތު ފޯރުވައި ދިނުންފަދަ ތަފާތު ޚިދުމަތްތަކާއި ދައުލަތަށް ނަގަމުންދާ ތަފާތު ފީ އާއި ކުލިވެސް ކުޅުދުއްފުށީ ބުރާންޗުން ބަލައިގަންނަމުން ދާނެއެވެ.

މީރާގެ ކުޅުދުއްފުށީ ބްރާންޗް ހުންނަނީ ކުޅުދުއްފުށީގައި ހުންނަ ގައުމީ އިދާރާ ކުރިން ހިންގަމުން އައި ބިލްޑިންގ ގެ ދެވަނަ ފަންގިފިލާގައި އެވެ.

މީރާ ގެ ދަފްތަރުގައި 12000 އަށްވުރެ ގިނަ ވިޔަފާރި ރަޖިސްޓްރީކުރެވިފައިވާއިރު އޭގެ ތެރެއިން 900 އަށްވުރެ ގިނަ ވިޔަފާރި އަކީ އުތުރުގެ އަތޮޅުތަކުގެ ވިޔަފާރިތަކެވެ.