ބައިނަލްއަޤްވާމީ އެއިޑްސް ދުވަސް ފާހަގަ ކުރުމުގެ ގޮތުން ކުޅުދުއްފުށީގައި ހިނގާލުމެއް ބާއްވައިފި

ބައިނަލްއަޤްވާމީ އެއިޑްސް ދުވަސް ފާހަގަ ކުރުމުގެ ގޮތުން ކުޅުދުއްފުށީގައި ހިނގާލުމެއް ބާއްވައިފި އެވެ.

މި ހިނގާލުމަކީ އަމިއްލަ ޖަމިއްޔާއެއްކަމުގައިވާ ޖާރނީގެ ފަރާތުން ކުޅުދުއްފުށީގައި ބޭއްވި ވޯރކްޝޮޕްގެ ބައިވެރިންނާއި ކުޅުދުއްފުށީގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީއާ ގުޅިގެން ދުނިޔޭގެ އެއިޑްސް ދުވަސް ފާހަގަކުރުމުގެ ގޮތުން ބޭއްވި ހިނގާލުމެކެވެ.

މި ހިނގާލުމުގައި އެއިޑްސްއާބެހޭ ތަފާތު މައުލޫމާތު ހިމެނޭ ބޯޑުތައްވަނީ ބޭނުންކޮށްފައެވެ. އަދި އެޗްއައިވީ އެއިޑްސް ފެތުރެން ދިމާވާ ގޮތްތަކާއި އެފަދަ މައުލޫމާތުތައް ވަނީ އަޑުގަދަ ކުރާއިން ރައްޔިތުންނާއި ހިއްސާކޮށްފައެވެ.

މިއަދު ހަވީރު އަމީރު އަމީން ސްކޫލާއި ދިމާ އަތިރިމަތިން ފެށުނު މި ހިނގާލުން ދޮޅު ގަޑިއިރަށް ވަނީ ކުރިއަށް ގެންގޮސްފައެވެ.

މިއަހަރުގެ އެއިޑްސް ދުވަހުގެ ޝިއާރަކީ “ގެޓިންގ ޓު ޒީރޯ” އެވެ.